◎A-him
病毒是一種一定ài用電子顯微鏡tsiah看ē著ê微生物，伊對lán人ê健康有種種ê威脅。Tī tsit篇文章內底，beh來kā逐家káng一个全世界上危險ê病毒－Ī-bó͘-lah（Ebola）病毒。
1976年6--月，tī非洲東爿ê Su-tàn（Sudan）共和國，Ī-bó͘-lah病毒第一擺造成時疫，284人tio̍h病，151人khiau--去，死亡率53 pha。無偌久，9--月，中部ê Tsái-i-ò（Zaïre）共和國1 mā出現Ī-bó͘-lah病症，318人tio̍h病，280人不幸過身，死亡率88 pha。Ī-bó͘-lah時疫tī tse兩个國家重了重出現，到1979年以後tsiah暫時消失。因為tsit款病毒造成ê病，致死ê機率kuân kah ē驚--人，世界衛生組織（WHO）自hit-tia̍p 就一直有teh督察tsit號病毒是m̄是有出現tī人ê社區內底。
Uì 1979年以後，非洲地區有十五冬ê時間lóng無Ī-bó͘-lah病症發生。到1994年，Ī-bó͘-lah時疫koh再tī非洲ê Ke-bōng（Gabon）kap Ái-bo-lī Khò͘-su-toh（Ivory Coast）發生，好佳哉，tse兩擺ê時疫真緊就得著控制，致病ê人無到一百个，大恐怖ê代誌並無發生。Koh來，連suà到1996年，làng一个縫到2000年，以及以後，Ī-bó͘-lah時疫lân-lân-san-san lóng有teh發生，m̄-koh，大部份to tī非洲國家，真少發生tī別ê所在；見擺發生，WHO跤手lóng真mé，控制kah tsiâⁿ好勢，狀況lóng無比1976年hit時khah害。
舊年（2013）12--月，非洲地區koh一擺有人去染著Ī-bó͘-lah病毒，到今年3--月，Ī-bó͘-lah時疫規个to̍h火。Tsit擺ê狀況kán-ná kap往過無仝，到taⁿ（2014/8/8），已經有1779人tio̍h病，其中有961人死亡，死亡率54 pha。Tsit擺ê Ī-bó͘-lah時疫是tsīng到taⁿ上嚴重ê一擺，sì-kuè湠ê病毒看--來to無法thang控制--ah，甚至，有幾若个醫生去hō͘ uè--著，資深醫生，Samuel Brisbane，竟然tio̍h病死--ah。Tse到底是按怎樣--leh？Tsit个háⁿ--人ê病毒kám ē湠kah通世界？
上代先--ê，lán來認bat Ī-bó͘-lah病毒。Ī-bó͘-lah病毒是絲病毒科（Filoviridae）內底ê成員。絲病毒ê特色是：In ê形體ná一條絲線，tsit條絲線ê主要成分是一寡卵白質（protein），絲線ê表面koh有一phok一phok ê糖卵白質（glycoprotein），看--起-來就像圖片án-ne；絲線內底有一條相連suà、無斷kue̍h ê RNA分子（He 是tsit號病毒ê遺傳因子（tsí），lán人--ê是DNA分子）。到taⁿ所知--ê，絲病毒科ê病毒ē uè hō͘ 人kap一寡飼奶動物（mammalian，包括猩猩、猴、豬、niau鼠），人iah是動物若無細膩去染--著，活命ê機會無大。因為án-ne，科學家除了煩惱伊ē造成人類ê大災厄，mā焦心伊ē kā一寡保育動物－比論大猩猩（Gorilla）kap烏猩猩（Chimpanzee）－逼kah ǹg滅族ê界線去。
到taⁿ lán知ê Ī-bó͘-lah病毒有五種：Bundibugyo ebolavirus、Zaire ebolavirus、Sudan ebolavirus、Taï Forest ebolavirus kap Reston ebolavirus；尾--à兩種病毒掠外，頭三種病毒，雖bóng毒性有分kuân低，lóng ē uè--人mā ē死人。Ī-bó͘-lah病毒tī野外ê天然厝主（natural reservoir）真有可能是夜婆。直接摸著有tài病毒ê動物ê sio̍h，食無煮熟ê染病動物ê肉，接觸ka-sàu phùn--出-去ê喙瀾ia̍h是空喙、死體流ê湯，lóng是tsit號病毒tī動物kap人，以及人kap人之間相uè ê路途；lán人若去染--著，上緊兩工，慢--者經過三禮拜，就ē發病。所以，beh控制Ī-bó͘-lah時疫，上要緊--ê，就是tsa̍h斷染病動物（以及人）kap健康人接觸ê機會。
Ī-bó͘-lah病毒tī 1976年就hō͘科學家發現--ah，kám講到taⁿ，lán iáu koh無伊ê法？事實tī過去tsit段時間，科學家lóng一直有teh骨力，想beh發明出ē-tàng治療Ī-bó͘-lah病症ê藥仔ia̍h是抗體（antibody），甚至是疫苗，thang好koh khah有效率來控制Ī-bó͘-lah時疫。骨力卻是骨力，藥仔koh tī實驗室teh開發，抗體kap疫苗到taⁿ mā無創好。抗體kap疫苗是對付病毒上好ê武器，m̄-koh，無人敢kā開發iáu未好勢ê抗體ia̍h疫苗，提去用tī非洲tng有Ī-bó͘-lah時疫ê所在。雖bóng兩个tī非洲染著Ī-bó͘-lah病毒ê美國衛生人員，接受試驗中ê ZMapp單生成抗體（monoclonal antibody）治療，效果bē bái，但是，beh tī疫區針對無瞭解生物醫學智識ê一般人，大範圍來使用，猶原有道德ê問題－nā是無效ia̍h是對人體造成意外傷害，啥mih人來擔？
Tsit擺Ī-bó͘-lah時疫tsiah-nī嚴重，是tsiâⁿ值得lán探討ê代誌。今年代先發生Ī-bó͘-lah時疫ê地區是tī非洲Gí-nih（Guinea）共和國ê南爿，後來tsiah koh湠去伊附近tau ê Sī-e-la-lī-óng（Sierra Leone）共和國kap Lāi-bió-lī-à（Liberia）共和國。Zaire ebolavirus是造成tsit擺時疫ê病毒，怪奇ê是，tsit款病毒往過kan-taⁿ tī中非洲出現，tsit-táu suah tī m̄-bat有Ī-bó͘-lah時疫ê國家teh流行！Tsit款病毒是目前知影--ê，上毒ê Ī-bó͘-lah病毒，上kuân ē造成90 pha ê死亡率；tse是tsit擺代誌嚴重ê第一个原因。
Zaire ebolavirus有可能是hō͘飛長途ê夜婆，uì中非洲tsah來西非洲ê Gí-nih共和國。準算是án-ne，時疫為啥mi̍h ē爆發kah tsiah害？科學家推測有三个可能性。第一，Gí-nih共和國是非洲夭壽散赤ê國家，原因是in ê政府腐敗、貪污，過去一段時間koh bat發生內戰，致使in國內ê公共衛生系統to真害真bái。第二，散赤人為beh生存，in ē想辦法擴大家己ê生活空間，thang提著khah濟生活物資（比論水、果子、肉類），tsit款求生存ê行為suah hō͘附近ê森林受破壞，mā hō͘ hit-tah ê人kap野生動物接觸ê機會增加。第三，Ī-bó͘-lah時疫爆發ê所在，特別是tī Gí-nih共和國hia，有tsiâⁿ濟過去m̄-bat kap外界tsih-tsiap ê族群；時疫爆發了後，WHO kap歐美各國ê醫護人員beh tī hia做事工，suah一直發生kap當地族群ê文化sio-ta̍h-thut ê代誌。聯合國兒童基金會（UNICEF）tī中非kap西非ê區域主任，Manuel Fontaine，表示講：「無實ê風聲kap m̄肯承認（Ī-bó͘-lah病症存在）ê態度tī tsia sì-kuè thuàⁿ.....tsia-ê人ê反應已經m̄是醫學有法度thang處理--ê，若beh tsa̍h斷Ī-bó͘-lah ê傳染路途，gún ài去消滅tsit-tah規sì-kuè ê驚惶，mā ài kap tsia-ê社區建立互相信任ê關係。」
Kā頂頭tse三个論點kap--起-來，tsit擺tsiah-nī害ê Ī-bó͘-lah時疫m̄是天災，是人teh作孽--啊！
簡單講，影響時疫大細--ê，其實kap當地ê社會文化因素（sociocultural factors）有tsiâⁿ大ê牽連，mā因為án-ne，有學者認為，tsit擺Ī-bó͘-lah時疫對通世界ê威脅無大。M̄-koh，mā有學者認為，因為世界交通發達，病毒真簡單就有機會thuàⁿ到世界各國。Mā確實，Tsit个病毒有走到非洲以外ê國家，m̄-koh lóng真緊就hông控制tiâu--leh。
規局看--來，Ī-bó͘-lah時疫成（tsiâⁿ）做一个區域災厄ê機會，khah贏過去害著通世界。WHO放送消息ài逐國tio̍h細膩Ī-bó͘-lah病毒ê威脅，tsit款做法是tio̍h--ê：in是teh提醒逐國家kap世界各地ê人，bē-sái放外外，hō͘ Ī-bó͘-lah病毒sa著機會，伊就ē sāi-thái到極！
＊註解：
1 現此時，tsit个國家號做Khóng-gò͘（Congo）共和國。
參考資料
2014/7/28 ê VOX新聞，”Ebola outbreak worsens: Liberian doctor dies, virus spreads to Nigeria”，http://www.vox.com/2014/7/23/5930311/ebola-virus-disease-outbreak-africa-facts-guinea
Olival, K., & Hayman, D. （2014). Filoviruses in Bats: Current Knowledge and Future Directions. Viruses, 6（4), 1759–1788. doi:10.3390/v6041759
Report of a WHO/International Study Team. （1978) Ebola haemorrhagic fever in Sudan, 1976. Bulletin of the World Health Organization, 56（2), 247–270.
Report of an International Commission. （1978) Ebola haemorrhagic fever in Zaire, 1976. Bulletin of the World Health Organization, 56（2), 271–293.
Stephenson, J.（2014) Largest-Ever Ebola Outbreak Still Simmering in West Africa. JAMA. 2014;312（5):476. doi:10.1001/jama.2014.9757.
Science：”How two U.S. patients changed the debate about using untested Ebola drugs？”，http://news.sciencemag.org/health/2014/08/how-two-u-s-patients-changed-debate-about-using-untested-ebola-drugs
UNICEF：”Misconceptions Fuel Ebola Outbreak in West Africa.”，http://www.unicefusa.org/press/releases/misconceptions-fuel-ebola-outbreak-west-africa/17712
美國疾病管制中心（Center for disease control and prevention）ê Ī-bó͘-lah時疫年表：http://www.cdc.gov/vhf/ebola/resources/outbreak-table.html#thirtytwo
（作者是德國Köln大學發育生物學（Entwicklungsbiologie）研究所自然科學博士）
