◎編輯部台譯
想著台語，就想起guán阿母
阿母tī日本時代出世，m̄-bat去學校讀冊，m̄-bat日語kap華語。囝兒幼tsíⁿ ê時，阿母khioh去田--裡ê穡頭，koh有厝--裡大大細細ê代誌lóng ài伊hua̍t-lo̍h，規工無閒tshih-tshih，根本無thang閒。等囝lóng大漢，tsiah沓沓仔有làng縫ê時間，就kō͘聽la-jí-o͘h ê台語放送做唯一ê議量，像林投姊、三國演義、薛丁山kap樊梨花、陳三五娘等等ê節目，差m̄濟ē-hiáu倒頭唸--ah，我hit-tsūn tng teh讀大學，阿母也tiāⁿ-tiāⁿ對我講起。Hit-tong時我無要意，kan-taⁿ是佩服阿母好記才，有才調將聽--來ê古講kah有條有段。Tio̍h等我歲頭khah濟，過了過了後，tsiah雄雄致覺阿母就是電視ê華語節目聽無，tsiah ē去聽la-jí-o͘h ê台語放送--ê。
我bat讀著葉石濤等等文學作家sia̋n-pái in想起khah早ê代誌，講in是tio̍h啞口sua ê世代，bē-tàng取in bat ê日語來創作，無ta-uâ tio̍h學華語，tio̍h thuā二十冬hiah久，tsiah有法度寫文學作品寫hō͘慣手。做一个作家，suah bē用得自由創作，tse是比失去性命koh-khah艱苦ê代誌。阿母m̄是作家，凡勢mā bē想kah hiah濟，m̄-koh伊仝款姑不而將，獨獨賰聽la-jí-o͘h tsit項議量。阿母是一个真有傳統女德ê婦jîn人，無的確m̄知影就是國民黨文化霸權將伊ê權利kā搶搶--去。我見若轉（tńg）厝，伊總是ē kā我講伊聽過ê故事，he mā變做伊孤一項歡喜ê代誌，伊ǹg望透過án-ne kap我溝通，hō͘母仔囝ê感情khah倚。Taⁿ kā想--起-來，tsia-ê過起lóng是我性命中上貴氣ê記持。我若想著阿母，就ē想著伊bat kā我講ê代誌，kap伊活跳自然ê台語話句，自án-ne感覺國民黨政府為著顧in ê政權，suah看台灣人ê感情無tī目地，有影太對不起樸實ê台灣人。
想著台語，就ē想起傳教士
傳教士去到異文化ê地區傳上帝ê福音，ē-sái講是牧者kap醫者ê角色tsiâu兼。tī教堂--裡，伊是傳福音ê牧師；tī社會--裡，伊是有醫學智識ê先生，不時用醫術táⁿ-tia̍p散食破病ê人，hō͘人感動來信上帝。早前來台灣傳教ê馬偕（George Leslie Mackay）、馬雅各（James L. Maxwell）、蘭大衛（David Landsborough），in lóng有tsit款個性。總--是若beh傳教順sī，tio̍h-ài學台語，tsiah有法度參在地人溝通，了解in ê感情，將福音真正傳入去in ê心內。
杜嘉德（Carstairs Douglas）去中國福建傳教，編輯《廈英大辭典》；甘為霖（Campbell, William）來台灣傳教，編輯《廈門音新字典》koh創設盲人教育；巴克禮（Thomas Barclay）來台灣傳教了後，bat擔任台南神學院頭一任ê院長，伊發行台灣第一份報紙《台灣府城教會報》，推sak白話字教育運動。傳教士將台語用kō͘羅馬字kā書寫--出-來，m̄-nā幫助傳教，mā教育台灣人用白話字書寫家己ê語言。
傳福音tio̍h kap土地、人民結合，tsiah ē順sī。Tse是巴克禮牧師鼓吹信徒學白話字ê信念。日本統治者來台灣了後，ài第一線ê警察hām初階官吏tio̍h學台語，tsiah有才調hām台灣人接觸、了解台灣人，thang建立統治ê基礎。日本學者小川尚義也投入台語研究，koh出版《日台大辭典》、《台日大辭典》等等ê冊，來做雙方面溝通學習ê工具冊。
Lán看國民黨來台灣統治了後，顛倒是成立國語推動委員會，推行「國語」政策，將台語當做方言，禁止tī公開場合使用，hō͘台語kiōng-kiōng-beh流--去。國民黨ê統治心態kap傳教士尊重在地語言文化ê心思，有影差大碼tī--leh。兩爿無仝ê心態tiāⁿ-tio̍h有無仝ê歷史評價。
想著台語，就想起為台語文付出拍拚ê人
Tī大中國政策ê下跤，台語tī公開場合hông禁用。電視上，台語節目hām台語歌曲有時間kap數量ê制限，連布袋戲to ài改用華語發音。長老教會ê台語聖經也khit hō͘沒收，koh禁止教會用白話字。環境tsiah-nī仔bái，suah iáu是有人teh關心台語，像：賴仁聲、王育德、吳守禮、蔡培火等等猶原mî-tsiⁿ teh研究台語、推廣台語。
行入1980年代，台灣意識攑頭，台灣文學kap中國文學開始論戰，台灣文學總算脫離中國文學，另家各食。Tsit个影響就是台語文kap台語文學koh興--起-來-ah，逐款拼音符號書寫系統隨个仔隨个出現。1990年代，台語文運動koh-khah發展，台語文社團一个仔一个成立，隨个teh發行台語文刊物。Tsit波體制外ê風潮，將台語文sak來tī體制內ê教育體系，真濟大學院校長長短短成立台灣語文相關ê系所。2001年九年一貫新制課程實施了後，台灣逐種語言有thang包括踮國民中小學ê課程--裡。2006年10--月，教育部正式公布「台灣閩南語羅馬拼音方案」（台羅），thang做台語教學ê憑準。
Tsit二十冬，我接觸一寡台語文工作者，也kap in長期來往。見擺若講（káng）--起-來，lóng ē去談著台語ê書寫kap音標。Tī戒嚴ê年代，台語文beh生存是嶄然仔無簡單，所致beh做台語文ê工作者，tio̍h-ài有熱誠kap鐵板不移ê意志，tsiah有可能tī戒嚴體制下底，m̄驚國民黨ê欺壓，繼續堅持--落-去，出版逐種書寫ê版本。
想著台語，就想起台灣文化ê重建
有人tiāⁿ-tiāⁿ講語言是人kap人之間溝通ê橋，用啥mih語言to ē用--得，均屬ē-tàng溝通就好。其實，tse是無了解語言kap文化深層關係ê講法。語言絕對m̄-kan-taⁿ是溝通ê工具，語言是生活習慣、思考方式參文化意象ê表現。
滿州人自本有滿州語，滿州語kiau滿文無hông使用了後，滿州人就tī漢人社會--裡無--去。平埔族人本底有平埔族ê語言，啊in ê語言一下滅，平埔文化hām平埔人就tuè leh tī漢人社會無--去-ah。現此時ê原住民族mā仝款面對tsit款ê問題，原住民族ê語言假使有一工無koh hông使用，he就是原住民族消失ê hit一日。就是án-ne，原住民族運動ê推動者有認bat著tsit號危機，tsiah ē提出恢復族名、維護母語ê主張。
台灣kài濟地號名kap傳說典故，假使若用台語（包括Hō-ló話kap客話等等）來讀，真簡單就ē-tàng掌握hit个歷史意涵。台語交談kap書寫有台語ê思維方式，華語交談kap書寫有華語ê思維方式，兩个是有tsing差tī--leh-ê。台語演講ê吸引力hām hō͘人感動ê所在，mā tshiâng-tsāi是tī台語ê思維方式，koh有因為kap生活ê情感貼相倚，tsiah ē動人心肝。
設使有一工台語無--去，台語文化tiāⁿ-tio̍h ài tuè leh滅無--去。台灣文化ê重建ia̍h是開創，實在hām台語相黏蒂帶。台語ê存在拄拄就是台灣文化ē hiah特殊ê所在。台語ê書寫是描寫台灣人內心世界上tàu-tah ê方式。現代ê台灣人檢采用華語交談khah自然方便，mā凡勢想講用華語來教小孩，khah ē-tàng kap政治現實配合，自án-ne無將台語kap台語文ê重要性看在眼內。其實ē有tsit款現象，是長期hông殖民ê人民，tī統治者強壓灌輸之下，失去自信，顛倒取統治者ê語言做頭pān ê語言，將家己ê語言當做無水準所致--ê。語言ê背後其實有強勢ê政治力量存在，tsāi-tsuí m̄是kan-taⁿ溝通ê工具niā-niā。
楊允言將tsit本書分做五个單元，有前人ê身影，mā有目今真活動ê意見頭人，有逐種無仝ê書寫方式kap音標方案ê紹介，有台語文刊物、台語文教育、網路參資訊技術發展ê敘述koh有大事記，對tsia thang知台語文歷史ê發展過程。Tsia-ê抾起，koh用受訪者主張ê書寫方式，來紀錄訪問ê內容，而且譯做華語相對照。讀者讀了，ē用得理解逐爿無仝ê講法。Tse是編者tsām-gám ê所在，mā是tsit本書ê特色。
Tsit本書用kō͘時間做順序，將台語文ê發展講hō͘明白。假使若koh再進一步參考台語文學發展ê過程，ē發覺講台語自本底就是台灣上主要ê語言。以早ê人是用台語teh讀古文古詩，mā用漢字teh寫台語。西方傳教士來台灣了後，將羅馬拼音書寫台語ê方式紮--入-來，所致講台語並m̄是原本就無法度寫無法度讀--ê。是因為國民黨來台灣了後，tī強勢ê「國語」政策下跤，致使一般人掠做台語是ē講bē寫--得ê語言。總--是lán翻頭看íng過ê台語書寫，就知tsit種講法是受ut-áu、是m̄-tio̍h--ê。
台語m̄-nā是台語文工作者關心ê課題，koh mā m̄-nā是研究ê對象，伊mā是tī台灣社會活跳跳ê存在，是lán共同使用ê語言。台語內底有phong-phài ê文化意涵、思維方式、生活感情，koh有數百年來粒積ê智慧kap經驗，有才調thang展現台灣文化ê獨特性。所以講立法院tio̍h趕緊通過「語言平等法」，平等來看待逐款語言ê存在。Tse m̄-kan-taⁿ是尊重niā-niā，koh-khah是維護台灣多元文化、書寫人民感情、豐富歷史文化bē用得無--ê，mā是台灣人對家己語言文化信心ê表現。
（作者是前國史館館長、現任ê台灣社社長－lán所敬疼ê台灣史學者，10/3伊雄雄過身，hō͘ lán真心疼kap m̄甘。本文是張教授做館長ê時，國史館出版ê《台語文運動訪談暨史料彙編》序言，原文是華文，編輯部kā翻做台文刊--出-來siàu念伊，紀念伊為台語文運動所奉獻--ê；願伊安歇。）
= = = = =END= = = = =
