逐年2月21是「世界母語日」（International Mother Language Day, IMLD）。Che是聯合國tùi 1999年開始ê政策。
1947年kap印度做伙tùi英國獨立--出-來ê巴基斯坦國（Dominon of Pakistan），分做東巴基斯坦kap西巴基斯坦。東巴基斯坦就是chit-má ê孟加拉國（Bangladesh）、西巴基斯坦就是現今ê巴基斯坦國（Pakistan）。Hit當時，西巴基斯坦主要語言是『烏爾都』語（Urdu），東巴基斯坦是孟加拉語（Bengali）。1948年巴基斯坦國宣佈唯一官方語言是『烏爾都』語（Urdu），引起東巴基斯坦大部分講孟加拉語人ê不滿，開始積極爭取孟加拉語mā成（chiâⁿ）做官方語言。
1952年2月21，今仔日孟加拉首都ê達卡（Dhaka）大學ê學生kap爭取母語權濟濟群眾tī高等法院附近遊行，hō͘警察開銃掃射，有四个學生死亡，引起暴動！Che可能是人類歷史中因為爭取語言權造成死亡ê頭一擺。後--來巴基斯坦當局tī 1956年2月29宣佈孟加拉語chiâⁿ做第二種官方語言。Chit-má，逐年2月21是孟加拉國ê國定假日。
聯合國一直到1999年11月17 chiah制訂每年2月21做「世界母語日」，tùi 2000年起實施。後來又koh定2008年做「世界母語年」! 不管是母語日iah是母語年，重點是鼓舞保存母語，使用母語，發展母語，促進多語教育kap多元文化。聯合國教科文組織tī會員大會第12號決議案提倡「多語教育」，意思是tī教育中使用上少三種語言，就是母語、地區iah國家ê官方語言kap一个國際性語言。
聯合國對語言人權ê政策是：1945年發表世界人權宣言，確認語言權是普世價值；到1996年koh制定世界語言權宣言，承認所有ê語言lóng有資格成做官方語言（official language），2001年mā發表世界文化多樣性宣言，確認文化多樣性是世界ê財富。
倒轉（tńg）來看台灣，本土語言hō͘外來政權壓迫超過100年。Che 100外年是人類文明發展上濟、上緊koh上關鍵ê坎站；Lán ê本土語言soah一直被蹧躂kap迫害，特別是經過六十年中國國民黨án-ne ê文化大屠殺（culture genocide）了後，lán ê母語已經賰無半條命。
真無簡單，台灣民主化ke減hō͘ lán希望。到1999年當時ê教育部長楊朝祥chiah tī chiâⁿ百位學者、立委kap母語運動人士ê面前親喙答應國民教育一至九年每禮拜beh實施一至兩點鐘母語課，害lán歡喜到半小死！結果--leh？眼時前實際情形是國小一至六年級逐禮拜kan-ta有一點鐘！若用聯合國ê標準來看，che根本是否定台灣人基本人權！
2007年扁政府制訂「台灣母語日」，希望學校每週定一日為母語日，鼓勵學生當日盡量使用個人母語，也呼籲主管機關進行「母語日訪視」，鼓勵師生講母語，發現教學相關問題koh協助解決，本意chiok讚。M̄-kú因為母語成績無列入考核，升學考試mā無納入考試題目，比1996年ê「認識台灣」課程koh-khah無受重視！Chit款政府koh大聲講是「人權立國」？好佳哉，母語教育高雄市iáu算有認真teh做，ē-sái講是全國做了上讚！Lán希望綠色執政十三縣市做伙認真來做，陳市長菊姊應該ē-tàng做示範。
真不幸，到2008年以後馬政府就無koh再要意母語教育。連母語教育經費mā一直減少！本底規定母語老師上慢tī民國100年ài通過認證chiah有資格繼續教，mā是hō͘馬政府硬延後到民國105年；M̄-kú，到時ē koh拖偌久，無人有把握！本來，蔣偉寧部長舊年有答應beh tī新課綱規定國中「必修」母語，勉強符合當初楊部長承諾，但是soah hō͘新任部
長否決！Taⁿ，幾日前新課綱hō͘台北高等行政法院判決「違法」，關心本土教育ê朋友應該繼續爭取台灣囡仔ê基本人權—母語受教權。本土縣市長絕對有責任勇敢來承擔！
上尾後，我用2002年寫ê 二二八台語詩文來結尾，順sòa siàu念二二八和平紀念日（Peace Memorial Day）：
1947 二二八
車聲
掠人ê hoah聲
噪耳ê「國語」聲
銃聲
哭聲
驚惶講bē出ê心聲
Lóng iáu tī lán ê喉管teh喉叫
Lóng iáu tī lán ê心肝íⁿ仔teh滾liòng
Lóng iáu tī lán ê頭殼底teh拍phún
五十五年後ê chit-má
二二八ê銃聲
已經chiâⁿ做台灣新性命ê紅嬰仔聲
二二八ê陰影
變做致蔭台灣ê樹影
二二八ê驚惶
Hō͘ 台灣勇敢向前行
二二八ê傷疼
Hō͘ 台灣人勇健去拍拚
二二八講bē出ê心聲
Lóng chiâⁿ做新台灣ê pho̍k仔聲
Taⁿ
Lán lóng無koh再驚惶
逐家心肝掠hō͘ 在，跤步無牽礙
大pān大pān攑頭向前行
行向光明ê世界
行出美麗台灣ê未來
（本文使用傳統白話字。作者是台灣南社社長、李江却台語文教基金會董事）
