作者：賴朝和
二三十年進前，tī lán台灣，「bàng-gah」是一句逐不時ē-tàng聽--著ê話句，tse是tuì日本語「漫画（まんが）」所轉化而來ê外來語。
「漫画」漢文寫做「漫畫」，台灣人大部份kā叫做是尪仔冊，只是tī日語，用尪仔圖所製作、華語叫做『卡通』ê影片mā叫做まんが。台語戰後bē少語句習慣沿用日語講法，『卡通影片』雖然講台灣是tī民國50 thóng年電視tsiah開始播送，m̄-koh tī台語仝款是借用日語，而且音調台語化變成bàng-gah。
台灣是tuì民國51年台視開播開始有烏白電視，bàng-gah就是當年少數ê娛樂節目之一，也是hit時代大人囡仔lóng上愛看ê電視節目，尤其是54年，開始播送一kái 10分鐘ê『大力水手』，ē-sái講是當時上轟動ê電視節目，後--來電視事業多元發展，電視bàng-gah ê節目也tuè leh彩色化、影集化參電影化，tsit-má第四台kap MOD ê有線電視koh-khah有bē少專業ê頻道，規日24點鐘播送bàng-gah ê節目，只是現時代bàng-gah ê節目觀眾已經變成以囡仔為主，受華語教育影響，tsit-má少年tsit沿已經tsiânn少kā『卡通影片』講做是bàng-gah。
只是m̄管是尪仔冊iah是『卡通影片』，tsiânn濟lóng有khah hàm古iah是科幻hit款超越現實ê劇情，也m̄知是m̄是án-ne，tī過去tsit數十年，台語tsiânn流行用「bàng-gah」tsit个名詞來形容人講話膨風iah是超越現實，針對囡仔ê童言童語、精神失常人士ê胡言亂語、iah是一般人ê膨風臭彈，lán tiānn-tiānn ē用「你是leh講bàng-gah」iah是「lóng想hit款bàng-gah--ê」tsit類ê名詞來suān-siah，由此也可見台語是一種多元、包容、參不斷創新ê語言。
台語用bàng-gah來形容超越現實可能比50年代koh-khah早，農業社會時代，科技kap社會環境ê變化有khah慢，民眾ê思想普遍也khah保守，科幻式ê劇情iah是預言，逐家tiānn-tiānn lóng ē有「無可能」hit款先入為主ê觀念，親像60年代進前，大部份人lóng ē認為登陸月球是leh講bàng-gah；今仔日bá-suh ē-tàng自動駕駛，tī 20年前相信大部份ê人也ē認為是leh講bàng-gah，只是事實上，tsiânn濟以前逐家認為無可能甚至想bē著ê技術，現時代lóng已經實際應用tī lán ê生活中。
另外，tī社會文化ê變化方面，親像「同性婚姻」參借腹生囝等各種非傳統「人工生殖」ê代誌，tī幾十年前大部份人mā lóng ē認為是leh講bàng-gah，時代進步所產生ê道德觀念改變，mā仝款快速leh改變lán ê傳統觀念。
科技參社會倫理ê快速發展，使得民眾mā必需快速tuè leh適應各種時代ê變化，尤其是最近人工智慧ê快速發展，tī未來lán生活模式ê變化一定ē koh-khah快速，過去lán tiānn-tiānn ē用「講bàng-gah」ê口語來界定未來代誌ê可能性，只是過去tsiânn濟被認為是bàng-gah ê代誌tsit-má已經m̄是bàng-gah，lán也m̄-thang koh磕bē著就kā一寡仔khah超越現實ê言論認為是leh講bàng-gah。
Lán來講看māi專欄，本文使用教育部推薦漢字kap臺灣閩南語羅馬字拼音方案。
台文通訊BONG報303期，2019年6月出刊。
--------------------------------------------
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
有固定的長期捐款， 讓更多的台語文相關計畫可以穩定的推行，感謝逐家。
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
