作者：黃偉嘉
若到新北市ê烏來（U-lai）tshit-thô，tsiok濟人ē順suà坐台車去遊覽。Tsit tsuā台車古早是用人leh sak--ê，主要是leh運柴，ē用得一路透到新店，tsiah接新店線火車運--出-去。後--來因為觀光需求，留一公里外tī 1970年代改做機械動力，終點ê水tshiâng，書面語lóng寫做『烏來瀑布』，伊kuân低差80米，是台灣第一。
Án-ne tsit个『烏來瀑布』，lán台語beh按怎講khah好--leh？
Tsit-má tī台語教學現場，有淡薄仔sionn過強調「正確ê台語」按怎講——認為華語詞就是ài揣出一个對應koh無仝ê台語詞，tsiah有資格是正港ê台語。譬如講，若台語講「瀑布（pho̍k-pòo）」，in就認為是去hōo華語uè--著，正港ê台語是叫「水tshiâng」。總--是，台語是tsiânn幼路、精巧ê語言，除了一般口語以外，也有漢學文言文ê成份。甚至因為是lán ê本土語言，幾百年落--來，也tī地方發展出特有ê講法。
若照研究室ê研究，「瀑布」tī lán台灣，因為kuân度、闊度、水流、地形、外形等等因素，「瀑布（pho̍k-pòo）」、「水雙叉（tsuí-siang-tshe）」、「水沖（tsuí-tshiâng）」，lóng有人leh講1 。Tse就表示「水tshiâng」m̄是唯一ê標準答案，應該實際調查在地人ê講法tsiah tio̍h。
為著了解正確ê講法，阮khà電話請教烏來台車博物館、雲仙樂園tsit兩位ê員工，知影在地有「懸水（kuân-tsuí）」、「雙叉水（siang-tshe-tsuí）」兩種講法。Koh進一步來看2010年出版ê《烏來鄉志》，第256頁也講--著：『烏來的漢人稱瀑布曰「高水」，（kuan tsui）。「高水」是烏來觀光三大資源（溫泉、瀑布、原住民）之一。烏來瀑布高約80公尺，為全台落差最大的瀑布，日治時代被稱為「雲來之瀧」。』
也就是講，『烏來瀑布』無適合講做「烏來水tshiâng」，伊ê名自早就是「懸水（Kuân-tsuí）」。Tse就親像屏東滿洲『佳樂水』，無人kā伊叫做「佳樂水水tshiâng」iah是「滿洲水tshiâng」，台語lóng直接叫「Ka-la̍uh-tsuí」。話講倒tńg--來，「懸水」tsit个名m̄-nā鬥搭，漢字看--起-來koh ná像詩kap畫hiah suí。若是ē用得hōo坐台車ê遊客mā學著「懸水」tsit个正港ê台語名，一定ē對tsit个台灣上kuân、上大ê瀑布，koh-khah有印象！
1.根據台師大韋煙灶教授ê研究，中國閩南語、客話iáu-koh有「漈（tsè）」ê講法，也是leh講瀑布，tī地名tsia̍p看--著。台灣ê客話地區有一寡地號名有kah「寨」--字，就是án-ne來--ê。但是台語目前無看著tsit款用法。
（作者是「地圖與多媒體研究室」研究員）
編按：漢羅用字有調整，原文是全漢。全漢版ē囥tī雜誌網站，hōo讀者做參考、對照。
專欄簡介：有人講「台語無字」。事實上台語一直lóng有字，自以早就用漢字來寫lán ê地號名。但是因為借字、借音、走音、腔口差、連音等等各種ê變化，一寡地號名suah hām漢字鬥bē起--來。若到一个生份ê所在，tiānn-tiānn是一開喙讀地號名，就hông隨知影是外地人。台大地理系「地圖與多媒體研究室」一直以來，投入地圖製作、地理教育、地名研究。Tuì 2019年開始，執行教育部「以本土語言標注臺灣地名計畫」，成果已經用tī改善台鐵、捷運ê放送。Tuì tsit月日開始，「地圖與多媒體研究室」逐個月ē tuì台語ê角度，tī雜誌介紹一个地號名，後擺若是坐車、駛車經過，拄好tn̄g--著，一定ē koh-khah疼惜lán tsit塊土地ê大細項代誌！
以本土語言標注臺灣地名計畫 https://reurl.cc/XjozaR
---------------------
全漢版
若到新北市的烏來（U-lai）𨑨迌，足濟人會順紲坐台車去遊覽。這逝台車古早是用人咧捒的，主要是咧運柴，會用得一路透到新店，才接新店線火車運出去。後來因為觀光需求，留一公里外佇1970年代改做機械動力，終點的水沖，書面語攏寫做『烏來瀑布』，伊懸低差80米，是臺灣第一。
按呢這个『烏來瀑布』，咱台語欲按怎講較好咧？
這馬佇台語教學現場，有淡薄仔傷過強調「正確的台語」按怎講——認為華語詞就是愛揣出一个對應閣無仝的台語詞，才有資格是正港的台語。譬如講，若台語講「瀑布（pho̍k-pòo）」，𪜶就認為是去予華語穢著，正港的台語是叫「水沖」。總是，台語是誠幼路、精巧的語言，除了一般口語以外，也有漢學文言文的成份。甚至因為是咱的本土語言，幾百年落來，也佇地方發展出特有的講法。
若照研究室的研究，「瀑布」佇咱台灣，因為懸度、闊度、水流、地形、外形等等因素，「瀑布（pho̍k-pòo）」、「水雙叉（tsuí-siang-tshe）」、「水沖（tsuí-tshiâng）」，攏有人咧講。這就表示「水沖」毋是唯一的標準答案，應該實際調查在地人的講法才著。
為著了解正確的講法，阮敲電話請教烏來台車博物館、雲仙樂園這兩位的員工，知影在地有「懸水（kuân-tsuí）」、「雙叉水（siang-tshe-tsuí）」兩種講法。閣進一步來看2010年出版的《烏來鄉志》，第256頁也講著：『烏來的漢人稱瀑布曰「高水」，(kuan
tsui)。「高水」是烏來觀光三大資源（溫泉、瀑布、原住民）之一。烏來瀑布高約80公尺，為全台落差最大的瀑布，日治時代被稱為「雲來之瀧」。』
也就是講，『烏來瀑布』無適合講做「烏來水沖」，伊的名自早就是「懸水（Kuân-tsuí）」。這就親像屏東滿洲『佳樂水』，無人共伊叫做「佳樂水水沖」抑是「滿洲水沖」，台語攏直接叫「Ka-la̍uh-tsuí」。話講倒轉來，「懸水」這个名毋但鬥搭，漢字看起來閣若像詩佮畫遐媠。若是會用得予坐台車的遊客嘛學著「懸水」這个正港的台語名，一定會對這个台灣上懸、上大的瀑布，閣較有印象！
---------------------
