Tâi-oân A-bú
作者：陳雷
（本文是漢羅合用kap全羅馬字一段一段對照）
台灣是一个海洋國家，目睭看世界。自來台灣人愛出去外國留學，日本時代去日本，60年代去美國。經濟發展了後，有一站時行送囡仔去美國、Kha-ná-tah留學讀中學，叫做小留學生。因為lóng iáu幼齒，爸母bē放心，所以真濟有大人陪in來留學，蹛做伙照顧。
Tâi-oân sī 1 ê hái-iûⁿ kok-ka, ba̍k-chiu khòaⁿ sè-kài. Chū-lâi Tâi-oân-lâng ài chhut-khì gōa-kok liû-ha̍k, Ji̍t-pún sî-tāi khì Ji̍t-pún, 60 nî-tāi khì Bí-kok. Keng-chè hoat-tián liáu-āu, ū-chi̍t-chām sî-kiâⁿ sàng gín-á khì Bí-kok , Kha-ná-tah liû-ha̍k tha̍k tiong-ha̍k, kiò-chò sió-liû-ha̍k-seng. In-ūi lóng iáu iù-khí, pē-bú bē hòng-sim, só͘-í chin chē ū tōa-lâng pôe in lâi liû-ha̍k, tòa chò-hóe chiàu-kò͘.
Toronto有一位同鄉，人叫伊阿玉姊，就是hit-chūn陪in後生來留學--ê。In翁留tī台灣hōaⁿ生理，兩所在來來去去，叫做「太空人」。
Toronto ū 1 ūi tông-hiong, lâng kiò i A-gio̍k ché, tō sī hit-chūn pôe in hāu-seⁿ lâi liû-ha̍k--ê. In ang lâu tī Tâi-oân hōaⁿ seng-lí, nn̄g só͘-chāi lâi-lâi-khì-khì, kiò-chò ‘thài-khong-jîn’.
無偌久，有一擺一位同鄉kap伊講閒話，講伊一个好朋友tī台灣，最近kap一个生理人結婚，對伊偌好拄偌好。講來講去，chiah知影原來就是in翁，tī台灣偷娶細姨。
Bô gōa kú, ū 1 pái 1 ūi tông-hiong kap i kóng êng-ōe, kóng i 1 ê hó pêng-iú tī Tâi-oân, chòe-kīn kap 1 ê seng-lí-lâng kiat-hun, tùi i gōa hó tú gōa hó. Kóng lâi kóng khì, chiah chai-iáⁿ goân-lâi tō sī in ang, tī Tâi-oân thau chhōa sè-î.
Kap翁chhé了後，家己一个tī chia也beh顧囝，也tio̍h趁錢飼家己飼囝。開始做房地產，真成功趁真濟錢。Tī北爿湖邊有一間別莊，tiāⁿ-tiāⁿ請同鄉去chhit-thô。
Kap ang chhé liáu-āu, ka-tī 1 ê tī chia iā beh kò͘ kiáⁿ, iā tio̍h thàn-chîⁿ chhī ka-tī chhī kiáⁿ. Khai-sí chò pâng-tē-sán, chin sêng-kong thàn chin chē chîⁿ. Tī pak-pêng ô͘-piⁿ ū 1 keng pia̍t-chong, tiāⁿ-tiāⁿ chhiáⁿ tông-hiong khì chhit-thô.
後--來in翁tio̍h癌，台灣ê細姨無beh顧。伊就chhéng in翁來Toronto，kā伊照顧。In翁過身了，細姨tī台灣落魄，伊kā伊mā chhéng來chia蹛。總--是bē慣勢，無偌久就koh tńg去台灣。
Āu--lâi in ang tio̍h-gâm, Tâi-oân ê sè-î bô beh kò͘. I tō chhéng in ang lâi Toronto, kā i chiàu-kò͘. In ang kòe-sin liáu, sè-î tī Tâi-oân lo̍k-phek, i kā i mā chhéng lâi chia tòa. Chóng--sī bē koàn-sì, bô gōa kú tō koh tńg-khì Tâi-oân.
有人暗chīⁿ笑伊gōng，問伊thài chiah有量。伊笑笑仔應：「總--是一點情--lah……。」翁某一點情，iáu ē-tàng理解。總--是像阿玉姊chit款台灣阿母，giám-ngē、擔當、智慧……，lóng總幾點情？Kám算ē chiâu了？
Ū lâng àm-chīⁿ chhiò i gōng, mn̄g i thài chiah ū liōng. I chhiò-chhiò-á ìn: “Chóng--sī chi̍t-tiám chêng--lah...” Ang-bó͘ chi̍t-tiám chêng, iáu ē-tàng lí-kái. Chóng--sī chhiūⁿ A-gio̍k ché chit khoán Tâi-oân a-bú, giám-ngē, tam-tng, tì-hūi..., lóng-chóng kúi tiám chêng? Kám sǹg ē chiâu-liáu?
#寫hō͘學生朋友ê代誌 專欄，本文使用教育部推薦漢字kap傳統白話字。
台文通訊BONG報322期，2021年1月出刊。
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
