作者：下厝庄仔
「叫著我，叫著我，黃昏ê故鄉不時leh叫--我……。」初初來到太平洋ê另外一爿，逐工便若到beh暗仔ê時，m̄管偌無閒，lóng ài kā手頭ê khang-khuè先按下。揣一个ǹg西ê窗仔口，斟酌看tuì日頭beh tńg去歇睏ê hit爿，知影lán ê故鄉就tī hit个黃昏ê紅霞mua--leh ê所在。Iáu ē記得出門時老母ê叮嚀，伊kám iáu leh煩惱阮m̄知食有飽、穿有燒--無？
出外ê台灣人，尤其是tī海外，想厝ê時，耳空邊就ē響起《黃昏的故鄉》tsit條歌。有一首英語ê流行歌《Take Me Home, Country Roads》，是leh寫tī美國West Virginia hit州ê人，到外位奮鬥ê時想厝ê心情。Tsit首歌是John Denver hām Bill Danoff kah伊ê牽手Taffy Nivert tī 1970年底ê某一日，三个人鬥陣透暝合作寫--出-來--ê。1970年12月30，John Denver頭擺演唱tsit首歌就tsiok受著歡迎。1971年tī伊ê專輯發行，推出無偌久就tshìng到排行榜（Billboard）ê頭名。其實，Denver、Danoff kah Nivert lóng m̄是West Virginia ê人，m̄-koh in kā hit个山內ê環境kah生活描寫kah真鬥搭，音樂輕快，歌詞有味、有感情。Tsit首歌也已經流行到全世界，受著真濟人ê歡迎kah傳唱，算是一个ē-tàng代表美國流行音樂ê藝術資產。
West Virginia有老山、大樹kah溪水，景緻不止仔suí。早前，tsit个州內有真濟煤炭空，tsit搭ê人mā大部份是做炭工來過日。挖炭，本tsiânn就真辛苦，koh自「保護環境」ê意識開始時行了後，礦工ê khueh mā愈來愈少，山內ê生活就koh-khah歹過，想beh khah有發展ê人lóng ài去外地討趁。M̄-koh，m̄管是在地iah是出外ê人，辛苦ê日子，hōo in比別人khah緊大漢、khah緊bat代誌，kánn-ná真緊就ē tńg大人--ah。
Tsit个州無倚海，若一世人lóng蹛tī山內ê人，就m̄知影海水生做啥款。因為sì-kè leh挖煤炭，規个山頭tiānn-tiānn煙thûn ing-phōng-phōng。Tsia有出產一種Whisky，是早期Scottish hām Irish ê移民tī 1800年代ê時，用in祖傳ê激酒祕方來到Appalachian山區開始製造--ê。山內因為有真濟磅空kah地陷，方便in bih leh激酒kah做生理，mā ē-tàng閃官府來beh khioh稅金。In lóng tī暗時借月娘ê光來做khang-khuè，所以tsit款Whisky ê偏名就hông號做Moonshine（月光酒）。Tsit種運作kah經營ê方式，一直到1910年代美國ê禁酒（Prohibition）期間iáu繼續leh做。後--來，違法激私酒、買賣酒ê人就lóng hōo人叫做Moonshiner。「月光酒」ê好滋味應該是hām tsia甘甜ê溪水kah山泉有關係，因為koh有摻在地種ê番麥做原料，聽講lim--起-來ē感覺有淡薄仔煙薰ê味。
出外ê台灣人，不時ē聽著黃昏ê故鄉leh叫伊ê名；West Virginia ê出外人，上siàu念--ê是hit phiàn伊tī hia大漢ê山林，kah逐工透早親像是阿母leh kā hiàm ê聲——he親切koh熟sāi、kan-na山內tsiah ē-tàng聽--著ê聲。
M̄管tī外地他鄉拍拚ê成就按怎，有時mā ài tńg厝看看--leh，看爸母、看親人，mā tio̍h-ài看細漢時鬥陣thit-thô ê囡仔伴。一路趕beh tńg厝ê心情，ǹg望ē-tàng早一工、早一點鐘，iah是kan-na早一分鐘就到厝ê心情，lóng寫tī歌詞內底，hōo聽著歌ê人mā ē替伊來tio̍h急。
Take Me Home, Country Roads
- John Denver, Bill Danoff & Taffy Nivert (1970)
好親像天堂——hia，是tī倚西爿ê「無錢嶺」。
有藍色ê山脊（suann-tsit），
伴「仙人渡」（Sian-jîn-tōo）ê溪水leh恬恬仔流。
(Almost heaven, West Virginia
Blue Ridge Mountains, Shenandoah River)
Hia-ê性命韌koh老，老kah比樹仔koh-khah老；
雖然，比山khah年少（liân-siáu）……m̄-koh，
無意中，in lóng真緊就ē大漢、就ē老。
(Life is old there, older than the trees
Younger than the mountains, growin' like a breeze)
田庄ê小路hit一條，tshuā我tńg阮兜，
tńg去我應該tńg--去ê hit个庄寮。
Hia，是tī倚西爿ê「無錢嶺」——親像老母ê山頭。
Tshuā我tńg阮兜，田庄ê小路hit一條。
(Country roads, take me home
To the place I belong
West Virginia, mountain mama
Take me home, country roads)
我所有ê記持，lóng脫bē離hit个老山頭；
親像挖炭工in兜ê查某人，
從來m̄ bat看過藍色ê海水是按怎漲退流。
(All my memories gather 'round her
Miner's lady, stranger to blue water)
所bat ê天空，kan-na是hit phiàn hōo烏暗kah煙thûn所漆--過ê了後。
Hia-ê「悶心酒」， lim--起-來mā有bông-bông ê喙尾留tī嚨喉頭。
想起hit个滋味……目屎kâm--leh，m̄甘háu。
(Dark and dusty, painted on the sky
Misty taste of Moonshine, teardrop in my eye)
田庄ê小路hit一條，tshuā我tńg阮兜，
tńg去我應該tńg--去ê hit个庄寮。
Hia，是tī倚西爿ê「無錢嶺」——親像老母ê山頭。
Tshuā我tńg阮兜，田庄ê小路hit一條。
(Country roads, take me home
To the place I belong
West Virginia, mountain mama
Take me home, country roads)
透早，不時ē聽著伊leh叫--我ê hit个熟sāi ê聲嗽。
Tsit一路，車內leh tân--ê、生份ê la-jí-ooh，
bē輸一直leh kā我提醒：到厝ê路途iáu-koh真遠、真遙迢（iâu-tiâu）。
(I hear her voice in the mornin' hour, she calls me
The radio reminds me of my home far away)
沿tsit條田庄ê路，我愈駛心愈急……
「為啥mi̍h，哪bē-tàng昨hng就到阮兜？昨hng就到？」
(Drivin' down the road, I get a feelin'
That I should've been home yesterday, yesterday)
田庄ê小路hit一條，tshuā我tńg阮兜，
tńg去我應該tńg--去ê hit个庄寮。
Hia，是tī倚西爿ê「無錢嶺」——親像老母ê山頭。
Tshuā我tńg阮兜，田庄ê小路hit一條……
(Country roads, take me home
To the place I belong
West Virginia, mountain mama
Take me home, country roads...)
