作者：廖啟助
台語是我ê母語，我感覺台語真suí，可惜tī我服務ê國小有2,300外个學生囡仔，iah是阮查某囝讀ê國中，差不多有2,600外人，下課差不多lóng無人leh用台語開講！Tī兩間tsiah-nī大間ê學校內面，lóng總beh 5,000个囡仔，結果in無leh講母語，我想tī其他ê學校應該mā精差無濟。Tī我蹛ê社區，尤其是公園內，身軀邊--a mā tsiok少聽著人講台語，尤其是40歲以下ê人，ē-tàng講是無tè聽！阿公阿媽kap 40外歲以下ê爸母差不多lóng用華語kap囡仔、孫仔講話，種種ê狀況，hōo我意識著台語真正beh滅亡--ah，所以lán一定ài緊kā tsit个台語beh無--去--ah ê危機講hōo逐家知。
Beh按怎kā母語救--tńg-來，lán ē-tàng án-ne做：
1.Ài有母語beh消失--去ê危機意識
過去是政策對母語ê打壓，tsit-má是逐家無意識著母語beh消失--去，無體會感受著母語消失ê速度kap嚴重性，所以lán ài盡量hōo身軀邊ê人，ē-tàng去意識著母語beh消失--去ê危機，而且ài hōo愈濟人知影愈好，án-ne tsiah有法度鬥陣來挽回。
2.Ài知影語言ê消失就是tsit个文化ê消失
語言是文化ê載體，mā是文化ê一部份，語言一旦消失，tsit个文化就ē tuè leh消失，所以lán ài有傳承母語kap文化ê使命感，hōo lán ê後輩ē-tàng久久長長，去聽著／看著lán ê母語kap文化一代傳一代、流傳--落-去。
3.「Tī學校」：營造講母語ê友善環境
⑴Tuì校長／主任／所有ê老師做伙有意識使用母語
囡仔tī學校ê時間上長，加上同學之間ê影響力是上大--ê，所以教育部kap教育局ài把握tsit段黃金時期，tī上課課程以外，加強營造母語ê友善環境。Ài呼籲lán ê學校，tuì校長／主任／所有ê老師做伙來做起，hōo老師ē-tàng有意識使用母語，平常時仔tsia̍p用台語來溝通，hōo學生囡仔ē-tàng看著原來我ê老師in是tsiah-nī愛用母語來開講、交流。
⑵將母語kap生活結合，所有科目lóng盡量用母語來教課
母語是生活中ê語言，m̄是kan-na上母語課ê語言，所以邀請所有教課ê老師，每一科目lóng ē-tàng ke用寡母語來講課、紹介，hōo囡仔ē-tàng tī生活中看--著、感受--著，原來母語是ē-tàng使用tī其他科目學習頂面，而且傳承母語，是所有老師ê khang-khuè，m̄是kan-na教母語課ê老師ê代誌。
⑶請導師主動kap班--裡ê囡仔講母語
導師kap囡仔鬥陣ê時間上長，對囡仔ê影響力甚至比爸母koh-khah大，所以營造一个友善ê母語環境，真重要ê一部份是請導師主動kap囡仔講母語，尤其是下課時間，án-ne囡仔in就ē感覺我ê老師／校長／主任lóng leh講母語，原來講母語是真sù常ê代誌，免歹勢mā bē奇怪，án-ne ê效果ē上好。
⑷將講母語列入班--裡ê獎勵制度
「賞金若濟，逐項to ē；錢銀出ē起，猛將搶beh去！」仝款ê道理，大部份ê囡仔有榮譽感，所以tī導師ê班--裡，若是ē-tàng將「講母語」設計入去逐工ê獎勵制度內面，án-ne ê tshui-sak效果ē koh-khah好，因為囡仔lóng ē想beh爭取加分，透過獎勵，囡仔ē愈骨力、愈積極使用母語。
⑸Hōo囡仔看ē著／聽ē著／感受ē著，講母語是tsiok sù常ê代誌
任何語言ê學習lóng是透過「聽、講、讀、寫」tsit四个順序。所以lán ê囡仔，tī生活中若是ē-tàng聽著夠額ê母語，in自然就ē-hiáu開喙講母語，hōo in bē感覺講母語是tsiok奇怪iah是礙虐ê代誌。甚至lán若ē-tàng kā講母語營造做時行又koh phānn ê代誌，囡仔kap同伴之間就ē互相影響、siō-thuā，án-ne ê效果ē比老師tī台仔頂leh教koh-khah緊，tse就是「tī學校」營造母語友善環境ê重要性。
4.「Tī厝--裡」爸母有意識先講母語，做囡仔ê模範
⑴爸母先做模範，講hōo囡仔看／聽／學
除了學校老師ê牽教，爸母ê支持kap示範，對囡仔學母語mā是真重要，所以lán做序大人ê人，ài先做模範，講hōo囡仔看／聽／學，囡仔自然就ē來接受兼接收lán ê母語。
⑵Tsia̍p講喙ē順，免有壓力／免驚bē liàn-tńg／免歹勢
學任何語言lóng仝款，tsia̍p講喙ē順，tsia̍p寫手bē鈍，所以lán講母語mā是仝款，ta̋nn開始ê時，一定ē拄著bē-hiáu講，iah是講bē liàn-tńg ê時tsūn，lán m̄免有壓力，ē-hiáu偌濟講偌濟，免驚人笑，中文透lām mā無要緊，lóng免歹勢。相信只要「聽kap講ê量有夠濟」，自然就ē進步！
⑶阿公阿媽ài看重家己ê母語，主動kap囡仔、孫仔講母語
阿公kap阿媽ê母語是厝內面講了上正pān、上純正ê人，所以lán做阿公阿媽ê人ài看重家己ê母語，ài主動kap序細iah是孫仔講母語，án-ne厝內面ê人tsiah有法度去聽著、學著tuann-tiah又koh suí-khuì ê母語，lán ê母語beh久長傳承--落-去ê機會就ē愈kuân，所以一定ài請lán ê阿公阿媽看重家己ê母語，主動kap囡仔、孫仔講母語，hōo母語thang繼續傳承--落-去。
⑷向人請教兼主動查辭典
學語言ê過程中，一定ē去tn̄g著bē-hiáu iah是無確定ê語詞，tsit个時tsūn lán tio̍h-ài發揮「活到老、學到老」ê精神，主動去請教身軀邊ê sia̋n-pái iah是長輩，iah無，tio̍h-ài主動去查辭典，án-ne lán就ē-tàng學著愈來愈濟、愈來愈深、愈來愈闊ê母語。
5.「請政府」拍廣告／影片放送hōo全民知
⑴呼籲大眾母語tit-beh消失--去ê危機
現此時母語無法度復振，上大ê原因就是逐家無母語意識，尤其是m̄知影母語消失ê速度kap嚴重性，以及母語消失對lán文化iah是對lán台灣ê損失，tse是過去lán社會，尤其是升學制度iah是工商社會當中，逐家長期以來無去注重kap意識ê所在。所以tsit-má若是beh hōo母語復振ê工程做ē起--來、有上好ê效率，政府首先ài做--ê，就是拍廣告影片tī電視kap網路頂放送，就親像leh面對COVID-19仝款，逐工拍開電視iah是手機仔lóng看ē著、聽ē著，hōo全民知影母語beh消失--去ê嚴重性。逐家有意識，ē仝心想beh來挽救kiōng-beh無脈ê母語，做伙來拍拚，就親像做伙來防疫仝款，相信beh kā母語救倒tńg--來，一定是緊tsua̍h慢ê代誌！
⑵推廣頂面我建議ê tshui-sak母語ê做法
Koh來，tī廣告影片內面，ài koh將lán日常生活中ē-tàng按怎做ê方式，示範hōo全體ê民眾知影，án-ne逐家tī生活當中就ē-tàng真自然來接觸母語、講母語、聽母語、使用母語，相信友善ê母語環境若建立--起-來，母語復振目標ê達成率，ē愈來愈kuân。
⑶鼓勵政府、私人機關ê考試，有通過母語認證者，提高加分ê比重
考試一直lóng是領導教學、影響學習上關鍵ê因素，現此時lán台灣ê學生囡仔iah是in ê序大人，bē主動學母語真關鍵ê一个因素，就是升學考試無考，iah是政府、私人機關khioh人ê時無考、無加分。所以若是tī未來，政府、私人機關tī beh khioh人入--去ê時，lóng有通過母語認證ê加分制度，相信一定ē-tàng鼓舞koh-khah濟人來注重，甚至ē hōo大部份ê人主動學習母語。該然頂面建議ê方式若是有實現，相信lán就ē-tàng免koh再煩惱母語beh消失--去ê危機。
人講，「有心開山，山tsiânn園；有心拍石，石tsiânn tshng」，雖然頂面ê一寡做法有可能無法度隨做kah到，m̄-koh相信只要lán逐家lóng有心、逐家對母語beh消失--去有強烈ê危機意識，koh有一个想beh鬥陣做伙來創造、經營ê母語友善環境，beh來做伙開始講母語，beh tī生活當中盡量來使用kap看重母語，我有信心，lán一定ē-tàng將母語khioh--tńg-來！
