作者：謝豐顁
Beh倚兩冬前，一个兩歲外拄開始ē-hiáu講話ê幼囡仔問in阿爸：「阿爸，『沙灘』ê台語beh按怎講 ? 」阿爸suah應bē出--來，tsit个阿爸想想--leh，用伊淡薄仔無自信ê喙，kā in囝講：「Lán lóng講 “海邊仔”，無，mā ē-sái講 “海岸”。」囡仔聽著是無啥理解，tsit兩个詞thài lóng無伊上要意ê 「沙」tī內底，m̄-koh he是阿爸教--ê，定著是bē m̄-tio̍h，就án-ne規家伙仔，歡頭喜面起行，beh去阿爸喙leh講ê『沙灘』。
有影tsiânn現世--啊！一个tuì出世就tī tsit塊土地生活beh 50冬ê人，竟然無才調用正確ê母語來牽教序細，koh敢tī囡仔bat代誌了後，就要求in ài用母語來講話，tsiânn實是家己phóng屎抹面，擔半桶屎就tī囡仔面頭前起leh搖，卸世卸眾m̄-tsiah án-ne！
免猜疑，tsit个阿爸就是我，囡仔leh問ê hit時，我真想beh塗跤挖一空kā家己埋埋--落-去。想著少年時，家己一个tuì下港來台北拍拚beh 20冬久，所有tsih接--著koh精差無幾歲ê仝沿，lóng褒阮台語有夠suí-khuì，想bē到tann，我kan-na是一个台語半桶師仔niā-niā。想著hiah兩光ê家己，有影是對家己tsiânn tsheh心，心內tng-leh鬱卒ê時，雄雄pok出一个想法，我穩當ài用正pān ê台語去牽教序細，bē-tàng koh用tsit款三跤貓ê工夫。
Tī年外前對本土語言發展狀況無智覺ê我，m̄知濟濟齊全ê本土語言資源早就tī lán ê身驅邊。有一日tng-leh掠無頭tsáng、beh按怎教囡仔母語ê時，我專工去網路tshiau揣『沙灘』ê台語講法——tsit个看--起-來真sù常ê華文生活用詞，相信lán iáu未入國校就知影。Suà--落-來，網路連結跳出教典內底「海沙埔」ê網頁，tng giâu疑tse是啥mih網站ê時，無張持影著「教育部」tsit三个字，引起阮tsiânn大ê興頭，時間kā khai--落-去，斟酌tī網站se̍h規晡。想bē到台語已經有規範ê拼音kap文字，進前掠準台語無字，kan-na有火星文niâ；m̄ bat想著講，lán喙講--出-來ê話，ē-tàng用規範ê文字寫--出-來。
「Ē跋tsiah ē大」，hit擺hōo家己拍銃了後，我tsit隻âm空龜總算tuì hōo「大華文主義」壓迫ê âm空內peh--出-來，看著lán台文闊bóng-bóng ê「海沙埔」。心肝掠坦橫，決心beh拍拚學習台語文。萬事起頭難，拄開始hit半冬，家己tiānn-tiānn用tshap-lām華語文ê思維來看台語文ê世界，孤人tī tsit phiàn「海沙埔」沓沓仔趖，學習ê過程tsiânn實是有夠慢。無論是羅馬字iah是變調，koh有漢字ê書寫，hân-bān ê我一直leh tiâu車，無法度掌握台語文ê奧妙。想想--leh，án-ne落--去m̄是頭路，bē-sái koh ná「秀才看遺言書」放hòng-hòng leh學，定著ài走揣外口ê資源來練工夫。
年初，有緣去參加台語文ê羅馬字班kap讀冊會，he有影親像龜kā三太子借風火輪，m̄免koh「和尚頭掠sat母」。目標總算有khah明顯--ah，感覺家己tī台語文tsit phiàn海沙埔頂亂亂tsông，油門催盡磅，sì-kè ná tsông ná看，殘殘蹽落去學。M̄-koh海沙埔闊lòng-lòng ，一隻龜koh再按怎出力爬，beh爬到邊墘iáu是tsiok oh，我m̄知ài偌濟時間tsiah thang hōo家己台語文ê智識khah飽tīnn，但是我ē堅持一步一跤印，khuann-khuann仔學、沓沓仔教，kā我感覺tsit个世間上suí ê語言，學hōo好來傳hōo阮序細。
想著家己tuì細漢到tann，所接觸--著ê環境lóng受著「大華文主義」ê thún踏。所有行跤到ê所在kap拄--著ê人，lóng用華語文leh交流，愈來愈罕得有人用母語來溝通，koh-khah免講用母語來寫字。朋友有ê是自khah早就m̄ bat tī生活內底用母語，有ê是bat無幾句。Mā有一寡人是細漢就ē-hiáu母語--ê，m̄-koh tī濟濟場合kan-na用華語來交流。
我mā bat問過幾个朋友，是按怎我用母語kap你講話，你suah用華語應--我 ? In tsiânn濟lóng應講：『這種場合說台語，給人感覺很 “台”！』Tsiok『台』，自tsit个字詞出現tī lán身軀邊了後，我到tann mā-koh giâu疑，in是leh講「你tsiok有台灣味」iah是講「你tsiok sông--ê」？Tsit个詞到底是khau洗iah是呵咾--leh？我揣無答案。Koh-khah悲哀ê事實是，tī tsit塊土地bē少序大人去uè著「越頭症」，致使序細學母語ê環境愈來愈bái。無論阮tsit沿iah是頂兩輩，tsit个症頭一直leh湠，kám講tī台灣無講華語、無用華文，就是無ha̍h？母語ê選項，kám獨獨賰tī厝內kap序大人溝通ê功能niā-niā？
無錯，過去hit个夭壽ê殖民政權，有影打壓著lán本土語言ê傳承，有按算beh規欉連根斬斷，hōo lán產生錯誤ê民族身份認同，但是tsia-ê láu仔並無成功。Lán母語ê種iáu tī塗--裡，精差未puh-ínn，in就親像紅嬰仔仝款，tio̍h-ài lán kā tshiânn養大漢，hōo in生枝湠葉。百面m̄-thang有hit-lō「bē-hiáu駛船嫌溪彎」ê心態，koh leh怨嘆殖民政權ê惡質。
過去35冬是lán家己棄嫌母語，造成tsit个橫逆ê「大華語主義」環境，kám講50冬後，lán tsit塊土地kan-na賰華語iah是英語leh溝通niâ？我m̄是leh gōng想，mā m̄是leh heh驚，只不過leh煩惱母語ê跤步beh tuì佗行--落-去，kám有影tī阮tsit沿就行bē落--去、斷種--ah？2010年，上尾一个用Pazeh（『巴宰語』）做母語ê潘金玉阿媽過身--去--ah。Tann救Pazeh ê khang-khuè是khám-khám-khia̍t-khia̍t，m̄是hiah簡單就thang恢復íng過ê光彩。目睭前有tsit款例，lán就m̄-thang koh等台灣母語ê神主牌仔tshāi tī尪架桌頂ê時，tsiah beh來祭祀。
母語是文化ê底蒂，一款語言tī伊原底生湠ê環境無--去ê時，mā表示一个民族ê滅亡。面對lán母語kiōng-beh消失ê危機，傳承母語是濟濟母語使用者ê khang-khuè，客話有一句諺語講：「寧賣祖宗田，勿忘祖宗言；寧賣祖宗坑，不忘祖宗聲。（Nenˇ mai zuˋ zungˊ tienˇ, budˋ mong zuˋ zungˊ ngienˇ; nenˇ mai zuˋ zungˊ hangˊ, budˋ mong zuˋ zungˊ sangˊ.）」，堅持kā阿爸、阿母教--lán ê話，koh再傳承落去hōo lán ê序細。Mài驚音無正、mài驚詞用m̄-tio̍h，khuann-khuann仔學、沓沓仔教，kā厝內人lóng箍踮母語ê環境內底，年久月深，「戲館邊ê豬母，bē pûn簫mā ē拍phik」。番薯m̄驚落塗爛，只求枝葉代代湠，tī lán生活內底堅持用母語，早慢有一日，母語ê番薯園ē生koh-khah ba̍t、湠koh-khah闊。
