台文通訊BONG報: 本土語言政策ê再轉型正義

主講／許慧如

記錄／江宥呈

Tsit改「全國台語民間會議暨台語政策論壇」邀請著臺灣師範大學ê許慧如教授來討論「本土語言政策ê再轉型正義」。Tī演講當中，伊提出目前台語政策ê四大問題，koh有對應ê解方。

問題一：「本土語」地位並無實際提升

許教授首先tshuā lán來看台語ê社會地位，uì戒嚴時期叫做「方言」，用政策kā壓落底；到1990年代，台語、客語、原住民語開始號做「鄉土語言」、「母語」，tī民間kah地方政府推動。2001年開始，一禮拜一節課ê鄉土語言課正式起磅；到kah 2019年，《國家語言發展法》公佈，鄉土語言koh添台灣手語、馬祖話等，lóng tsiânn做「國家語言」。Uì tsit个角度來看，台語kah其他本土語言是m̄是有大發展，地位提升不止濟--leh？

Lán kā視角giú遠，看規个社會ê語言使用tsiah ē-tàng回答tsit个問題。社會語言學有一个概念：「高階語言」，就是tī正式場合，包括揣頭路、教育使用ê語言；相對來講，「低階語言」就kan-na用tī非正式、私人都合ê層次。頭先講ê演變，不管名按怎改，台語其實lóng無liòng開「低階語言」ê身份，進入到「高階語言」。華語tī台灣絕對ê優勢，uân-á在在在，tsit-má又koh ke一个英語出--來。台語ê資源是有愈來愈濟，但是華語kah英語kám講就無？甚至拍算增加koh-khah濟--leh。所以講，有華語kah英語硩tī頭頂，本土語言ê地位其實並無實際提kuân。

問題二：「本土語」形式上ê「平等」，無看見台語ê通用語地位

M̄-nā本土語言實際ê地位無提升，本土語言內部問題mā tsiânn大。Kā課綱thián開來看，有國（華）語文、英語文，suah看無著台語，kan-na「本土語言」tsit个分類niā-niā。Tsit類又koh包含新住民語言，bē輸是一種「其他」類，別所在囥無路--ê lóng總tàn來tsia。台語kan-na是tsit幾十種語言內底ê一種niā-niā。

M̄-koh若斟酌看台語tī台灣歷史上ê地位，絕對m̄-nā án-ne。日本時代1915年做ê調查，全台灣khah無0.03% ê人講華語，suah有85% lóng講台語。其中母語m̄是台語--者，mā有將近30% ē-hiáu講台語，大大超過hit久日本政府beh sak ê日本話。許教授講--著，大部份ê國家lóng m̄是kan-na一種語言，m̄-koh語言之間有「共通語」kah「族群語言」ê區別，其中共通語tiānn-tiānn是自然形成--ê。Tī華語來台灣以前，台語就是事實上ê共通語；客語、原住民族語是族群語言。華語若無入--來，現此時華語ê擔頭就是台語leh擔--ah，iah若客語kah原住民族語仝款ē需要復振，tse是無仝ê社會基礎。

Lán ài知影台灣上大ê霸權是華語，m̄-thang kan-na tī「本土語言」ê箍仔要求平等，落尾講台語suah變做損害著別个族群ê權利，結果「逐家lóng是台灣人，所以逐家lóng bē-sái講台灣話」，無看見台語是台灣ê自然通用語án-ne ê社會功能。

問題三：無kā「復振」hām「推廣」tsit兩个觀念hut清楚

「復振」是原本有ê mi̍h件，lán beh恢復；「推廣」是原本無ê mi̍h件，beh kā sak--出-去。Tse是無仝ê目標。親像頭先講--ê，客話、原住民族語ê分佈是有區域性--ê，tī tsia-ê客庄、部落內底確實tio̍h-ài復振；但是以外--ê、無社會基礎ê所在，就是leh「推廣」。一个語言若是beh tī棲地以外ê所在硬beh「復振」，he就bē輸tī無適合ê田種作，m̄-nā收成ē bái，koh ē損害著原生ê物種。

問題四：Siunn過強調「文化」hām「傳承」，本土語言顛倒脫離日常生活

現此時本土語言課產生ê背景，是1990年代開始tshui-sak--ê，hit-tsūn台語對少年人來講，雖然m̄是主要語言，但是逐家iáu-koh lóng ē-hiáu講，所以一禮拜一節ê課檢采iáu有效果。Tsit-má台語流失koh愈嚴重，若是kan-na kā語言復振sak hōo教育部、文化部，he算是『育、樂』，無真正tī lán『食衣住行』逐方面落實，án-ne做是bē通--ê。

建議一：語言復振應該以地區做單位，m̄是個人

Tsit-má ê本土語言課，是以人做單位。不管啥人，tī啥mih所在，準講伊有選修某一種本土語言，學校tio̍h-ài替伊安排hit種語言ê課程。但是親像問題三講--ê，án-ne tī棲地以外ê所在做復振語言ê khang-khuè，m̄-nā效果bē好，顛倒ē去排斥著其他語言ê資源。Iah是譬論講，tī本底是台語通行區ê所在，想beh tshui-sak用台語來教別科ê沉浸式教育，suah因為班--裡有人m̄是台語族群做無路，koh變做頭先所講「逐家lóng是台灣人，所以逐家lóng bē-sái講台灣話」ê狀況。

若以地區做單位，lán ài有ê心態就m̄是「我講某mí話，政府就應該ài提供我ê囡仔某mí話ê課」，應該是「我講A話，m̄-koh生活tī B話區，我ê囡仔就上B話課，甚至老師tio̍h-ài以B話教各種課程」，án-ne語言tshui-sak tsiah ē順序。

建議二：嚴肅看待台語ê「共通語」地位，規畫真正符合台灣語言生態ê語言定位kah環境

第一步就是政府、社會ê頭人應該ài tshuā頭tī公共場合講台語，hōo伊真正有通用語ê功能。其實聽有台語ê人比lán所想--ê ke tsiok濟，許教授以家己ê經驗來講，tsit久18歲、大學一年仔ê新生，lóng講家己聽無台語，但是實際上你若刁工kah in講台語，lóng mā ke減聽有，是濟少ê問題niâ。

建議三：本土語言政策無應該限tī文化部kah教育部，語言ài tńg來到『食衣住行』，bē-tàng kan-na『育樂』

台灣各語言ê定位建議

下面tsit張圖是許教授所看--著--ê，台灣語言目前ê狀況，kah lán應該ài拍拚ê目標。現狀是華語kah英語霸占高階語言ê地位，本土語言tsiah濟種，suah hōo in lóng食仝一碗飯，逐个人koh ài食平濟。可比講一个25歲ê運動員，你mā要求伊食kah五歲囡仔平濟，án-ne伊thài bē勼--去--leh？Lán ê目標應該是hōo逐種語言平行發展，像下跤ê圖，逐種語言uì地位kuân到低ê都合lóng有份。Tī tsit个前提之下，台語tsiânn做社會ê共通語，客語、原住民族語tī in原本ê棲地內底mā tsiânn做社會逐方面lóng用ē著ê語言。