作者：Aminegy
Góa o͘-tó͘-bái khiâ kàu hāng-á-kháu, sió tòng--chi̍t-ē, beh tán-thāi sî-ki, tò-oat ji̍p-khì tōa-lō͘. Hong-hiòng-teng sih--leh sih--leh.
Hit-chūn, góa khòaⁿ-tio̍h 1 ê siàu-liân-á, mā sī khiâ o͘-tó͘-bái, ùi góa ê āu-piah nǹg--chhut-lâi, m̄-koh i bô thêng--lo̍h-lâi, chhut hāng-á-kháu chiū sûi-sî tò-oat, ge̍k-hiòng khiâ tī tōa-lō͘ téng-koân, khiâ beh 5 kong-chhioh, ná khiâ ná thâu oa̍t chiàⁿ-pêng lió--chi̍t-ē koh tò-pêng lió--chi̍t-ē, hit ê chu-sè ná-chhiūⁿ niáu-chhí-á chhut piah-kha ê tōng-hia̍t, ng-ng-iap-iap, bih-bih-chhih-chhih.
Kó-jiân, i ê chhiàng-sù kàu--ah, iû chhui--lo̍h hāⁿ-kòe siang-n̂g-sòaⁿ, siu̍h--chi̍t-ê khiâ cháu, bô khòaⁿ-tio̍h iáⁿ--ah. Him-sióng i ê piáu-ián liáu, góa chhùi khui-khui, sim-lāi ka̍p-ka̍p-kiò, “Siáⁿ? Ná ū lâng án-ne khiâ-chhia--lah? Kà-chiàu ke-thúi ōaⁿ--ê? Nā án-ne chhiūⁿ góa chit khoán--ê m̄ to̍h gōng-giàn-thâu?”
O͘-tó͘-bái iáu thêng tī hāng-á-kháu, hong-hiòng-teng sih--chi̍t-ē sih--chi̍t-ē, góa iáu teh tán-thāi góa ê sî-ki. Ná siūⁿ ná khòaⁿ-tio̍h tōa-lō͘ nn̄g-pêng lóng bô chhia, góa chiah khiâ-chhia lu--chhut-khì, ta̍uh-ta̍uh-á tò-oat.
Tńg chhù liáu, góa kā gún ang kóng chit-lō tāi-chì, i ê phêng-lūn kan-taⁿ 1 kù, “Lí gōng-giàn-thâu to tio̍h--m̄?”
