主講／賴亦德
記錄／陳亮穎
編按：本文是2022/12/13棲地復育台語講座ê摘要記錄，講者賴亦德是東芬蘭大學生物系博士、《台灣常見蚯蚓、蛭類圖鑑》作者。
台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃有關生態環境議題ê台語講座，歡迎逐家tī逐個月第三禮拜五暗時7點到9點，同齊來「呷米共食廚房」（台北市中正區衡陽路9號3樓）擴展家己ê台語棲地（tshe-tē）！詳細資料ē-tàng看「台灣蠻野心足生態協會」FB專頁。
蠻野講堂邀請研究員賴亦德博士，來參逐家紹介杜蚓仔（tōo-kún-á）ê大細項代。全世界ê杜蚓仔，若論真kā算，到tann已經發現--ê，超過六千種以上。啊若台灣在地ê杜蚓仔，現此時lán所知--ê有百外種，其中七成是特有種。
杜蚓仔ê環帶
Beh按怎知影杜蚓仔「成熟」--ah--未？賴亦德講，lán ài詳細看伊kám有「環帶（khuân-tuà）」。若是一隻杜蚓仔已經生kah ē-tàng開始交配，伊身軀頂就ē出現一tsat「環帶」，表示已經成熟。Beh觀察杜蚓仔，上要緊--ê就是tsit个「環帶」ê位置、形體kap色水，iáu有「攝護腺」生做啥款？看伊生做大塊iah細塊，tsiah thang分別可能是佗一種杜蚓仔。
聽講者紹介杜蚓有「攝護腺」，聽眾就好奇講，杜蚓ài按怎分公--ê kap母--ê？其實每一隻杜蚓lóng是「雌雄仝體」，就是講in身軀頂有公ê器官，mā有母ê器官。Lán若kā杜蚓仔píng過來詳細看頭前腹肚ê部位，除了喙以外，iáu有「受精囊空」、「雌空」kap「雄空」，其中上重要ê特徵就是「雄空」，因為伊ê形體多變化，mā thang幫助研究員判斷杜蚓仔是啥mih種。
杜蚓仔蹛佗位？食啥mi̍h？
Lán ê印象杜蚓仔lóng是tī塗底nǹg，m̄-koh in無一定lóng靠食塗做三頓。濟濟種杜蚓仔當中，有ê蹛tī塗頂面，hia有爛葉仔、堆肥、牛屎、豬屎、爛果子等有機質，in ē-tàng kā當做食物，tsit款--ê叫做「表層型」。蹛tī塗內底--ê，mā ē-tàng分做「內層型」kap「貫穿型」，後--者就是ē tī塗--裡鑽空ê杜蚓仔，in鑽ê空差不多有幾十公分到一公尺hiah深；m̄-nā ē-tàng食植物，mā ē用得食塗。
杜蚓仔本身無喙齒，有時仔食物khah tīng，伊beh按怎食--leh？Tī伊ê喙有「口前葉」，bē輸喙脣仝款，ē-tàng kā一寡khah軟，koh tâm-tâm ê mı̍h件liap--起-來。
杜蚓仔ē叫歌kap發光？
雖然khah罕得有人誤解講杜蚓ē叫出聲，m̄-koh親像《秋風夜雨》tsit條歌有一句歌詞講：「風雨聲音擾亂秋夜靜，時常聽見杜蚓háu悲情」，koh有古早ê歌謠《杜蚓仔歌》mā講著杜蚓仔按怎叫歌。無論文學、歌謠內底按怎流傳，若tuì生物學ê角度，杜蚓仔並bē叫歌。極ke是lán kā in囥tī phun桶iah是tâm-tâm ê塗--裡，in ē活動、發出nǹg塗ê聲nā-tiānn。
Lán若tī暗時看著杜蚓仔，in hōo路燈iah是手電仔tshiō--著，ē規隻金爍爍，就掠準伊家己ē發光；其實tse是因為伊身軀表面有一層特殊ê物質，ē產生kap CD表面反射sio-siâng ê光彩。M̄-koh世間真正有ē發光ê杜蚓仔，親像tī露西亞東爿ê Siberia （『西伯利亞』）地區、歐洲西部、美國南部、中歐kap東歐，lóng有in ê影跡。而且現此時tī台灣上無已經發現兩種ē發光ê杜蚓仔。
濟濟杜蚓仔趖出塗，表示beh地動？
自九二一大地動了後，lán有時ē聽新聞leh報講：「好天ê時，若拄著一陣杜蚓仔tuì塗--裡nǹg--出-來，可能是beh地動ê兆頭。」逐年ê 10--月到12--月，tsit款現象就ē tī媒體引起討論，也就是大概節氣ê白露到霜降中間；但是台灣規年thàng天lóng ē地動，所以lán就知影tsit兩項代誌無牽連。杜蚓仔ē趖出塗，khah有可能參天氣kap塗跤底ê溫度有關係，而且mā m̄是每一種杜蚓仔lóng ē有tsit種行為。
賴亦德bat針對tse去調查，伊講普遍是一款號做「土後腔環蚓」ê杜蚓仔tsiah ē án-ne；因為白露到霜降tsit-tsūn，暗時塗跤底iáu保留日--時曝日累積ê熱氣，塗面頂相對ē khah緊冷，杜蚓感覺著塗底khah熱，就趖起來頂面nah涼；等到日--時，in bē赴趖tńg去塗跤底，拄好去hōo人看--著，tsiah叫是一陣杜蚓仔nǹg出塗是啥mih歹吉兆。
Tsit kái ê「蠻野講堂」，賴亦德tshuā逐家熟sāi杜蚓仔ê習性、構造，mā針對lán普遍對杜蚓仔ê誤解做pué-huē，koh補充tsiânn濟趣味ê智識，逐家若有興趣mā ē-tàng參考講者出版ê《台灣常見蚯蚓、蛭類圖鑑》tsit本冊。
蠻野講堂
棲地復育台語講座 專欄，本文使用教育部推薦漢字kap台羅。
#台文通訊BONG報 348期，2023年3月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
