作者：孫博萮
2022年5月15，tī美國加州Irvine ê台灣基督長老教會發生hōo統派暴徒銃擊ê事件，造成一位台裔醫生過往、幾若位老大人受傷，美方認為tse是族群仇恨ê恐怖攻擊事件，tsiânn濟台灣人mā認為兇手ē去揀tsit間教會行兇，就是因為tse是一間支持台灣獨立ê台語教會。
Tī台灣，台語kah其他語族ê母語，戰後受著中華民國政府ê壓迫，tsit-tsūn已經kiōng-beh死--去--ah，雖bóng有愈來愈濟人開始有意識，開始主動學台語文，想beh搶救家己ê母語，但是現此時，主要leh反對ê人已經m̄是政府，顛倒是一般民眾。
Tī生活各方面已經慣勢使用華語文為主ê人，上驚--ê就是台語文（iah是其他台灣母語）復振了後，in ē失去現有以華語文為主ê語言優勢，就親像戰後來到台灣ê「中華民國政府」，無法度用一般民眾使用ê語言來管理，tsiah開始透過「國語政策」來打壓台灣人ê母語。
已經慣勢用華語文ê人無願意去學新ê文字系統（m̄管是台文漢字iah是羅馬字），是因為tī現有ê華語文社會系統之下，in已經過了tsiânn sù-sī（華語文『舒適圈』），若是tsit个系統去hông拍破，in tsiânn有可能hōo社會淘汰。
Tse就可比hit種講「若是〇〇〇當選，中華民國就ē滅亡」ê言論，in kám真正hiah關心中華民國ê運命？其實in是煩惱若是台灣人出頭天，in現有ê既得利益就ē無--去。
In mā驚講若囡仔tī學校學台語文（iah是其他台灣母語）tńg--來，因為in家己bē-hiáu（mā無想beh學），無才調kā囡仔ê功課tàu-sann-kāng，tsua̋nn批評he是亂七八糟ê mih仔（寫he，阿公阿媽講一世人台語lóng看無--lah！），án-ne in就ē-tàng安心繼續做tshenn-mê牛，甚至因為家己看無，就sì-kè要求別人m̄-thang用。
In講in「厝內mā ē講台語」，真有可能kan-na簡單幾句仔「食飽--未？」、「多謝」、「小等--一-下」，甚至是「哭爸」、「哭iau」、「啥siâu」、「kàn lín娘」tsit款lah-sap話，in就認為家己「ē-hiáu講台語」，其實可能連伊家己kah囡仔ê名to bē-hiáu講。
Koh因為in家己對語文ê認知siunn欠缺，看著漢字kan-na ē-hiáu用華語發音，看著羅馬字kan-na ē-hiáu用英語發音，m̄知「漢字」、「羅馬字」m̄是專門屬tī佗一種語言ê文字系統。仝一字「漢字」，m̄-nā ē-tàng用華語來讀，用台語、客語、香港話、韓語、日語，甚至是越南語lóng ē-tàng讀，「東亞漢字文化圈」無等於「中文圈」，發音有可能sio倚、mā可能完全無仝，尤其台語有文白音，日語koh有訓讀、音讀ê分別。
借問，in kám敢去kā日本人講啥mih『你們日語沒字啦！日文漢字都是用跟中文相近的音去硬湊出來的啦！」iah是『 “七” 應該要讀 “ㄑㄧ”、不是讀 “ㄋㄚㄋㄚ˙” 啦！』tsit款話？
羅馬字（也就是拉丁字母）mā m̄是kan-na「英文」一種語言leh使用，m̄管是歐洲大部份ê語言（德語、法語、意大利語、西班牙語……），甚至是lán台灣ê原住民族語，lóng是用羅馬字來書寫。
M̄-koh hia-ê人可能規世人m̄ bat接觸過華語kah英語以外ê「外國語」，掠準看著羅馬字就是英語，就bē輸看著金毛啄鼻ê外國人，就一定是講Hello、Thank you。
羅馬字學--起-來比漢字khah簡單，對beh查字典mā khah利便，只要透過基礎發音練習，真緊就ē-tàng開始「bat字」；早期台灣教育無普遍，bat漢字ê人真少，外國傳教士來到台灣為著beh hōo台灣人趕緊ē-hiáu讀聖經，透過教羅馬字（白話字）就tsiânn緊ē-hiáu讀、寫，到tann iáu有教會使用台語羅馬字聖經。若m̄是白話字tī戰後hōo中華民國政府強制禁止，無的確tsit-má已經tsiânn普遍。
漢字、羅馬字兩種文字系統有無仝ê優點，台語是按怎ē-tàng「漢羅lām用」？因為台語內底有tsiok濟語詞，是tuì日語來ê外來詞，比如講oo-tóo-bái（オートバイク／autobike）、la-jí-ooh（ラジオ／radio），koh有tuì包括平埔族語ê原住民族語iah是其他語言來ê詞彙，連原底漳泉話mā不止是漢語語源，若無對應漢字thang書寫ê時，用羅馬字寫是koh-khah好。
台灣自早就是多族群社會，經過幾若个殖民者ê統治，地理kah歷史上ê淵源，造成tsit-má複雜、多元ê現狀，未來台灣對「族群」ê 認知，ē tuì以早血緣、字姓ê連結，轉變做地緣ê連結；對在地語言、文化、價值觀、生活習慣ê認同，自然形成新ê族群，mā tsiânn做未來台灣國族認同ê基礎。
人無法度決定家己ê爸母kah出生地，iah是決定伊ê祖先是tuì佗位來，血緣無應該是一个人ê「原罪」，m̄-koh若是伊ê思想kah意識形態欠缺對本土ê認同，koh利用伊ê身份、職權對tsit phiàn土地ê安全造成危害，iah是去迫害其他弱勢族群ê利益，用文化殖民將規个世代種族滅絕，像tsit款--ê當然tio̍h-ài kā hìnn-sak。
種族衝突就是án-ne產生，mā是中國殖民者一直ē hōo台灣人棄嫌ê主因，mā是tsit kái美國長老教會銃擊案ê源頭。 但是tī未來，單純tuì血緣、字姓出發ê觀點，已經無法度形成後一个世代對族群ê認同，對在地語言、文化、價值觀、生活習慣ê認同，tsiah是新ê族群認同。就算厝內家族是幾若代前就來到台灣、家己ē-hiáu講台語，若無本土意識，就bē輸是謝龍介、白賊義hit款人。
台語人寫台文，m̄管是寫漢字、iah是用羅馬字，lóng無需要向任何人交代、mā無需要經過任何人同意，母語人使用家己ê語言kah文字是天公地道，mā是基本人權。華語文無應該是台灣人ê 「預設值」，台語人mā無義務替華語人設想hiah濟，甚至自我設限，無應當為著講、用母語受任何委屈。
總講--一-句，家己ê母語家己救，囡仔若bē-hiáu講爸母話，以後tsit个語族kah文化就ē消失--去，台灣人就ē變做不答不七ê「華人（Chinese）」，koh ài逐工煩惱台灣去hōo對岸ê中國政權併吞、武力統一。
台灣人對抗中國上好ê武器就是台灣意識，按怎來提升台灣意識？就ài tuì台灣母語復振做起，ài先對抗中華民國政權『文化刨根』ê大中華思想殖民，建立家己語族ê核心認同，tsiah ē-tàng tsiânn做一个完整ê Tâi-uân-lâng。
