作者：陳建町
我自舊年參與一个社交網站自由軟體Pleroma〔1〕 ê台文化翻譯，因為tse是少少人踏入ê領域，雖bóng自由軟體華文化tshui-sak起碼20冬--ah，下跤我就來介紹有關參與軟體台文化ê經過kap一寡想法。
 |
| 圖1：2013年Gaeilge語ê Firefox界面，授權：CC BY-SA 3.0，作者：Kevin Scannell |
 |
| 圖2：翻譯界面 |
 |
| 圖3：翻譯ê結果 |
我是按怎beh參與
台語雖然有kài濟有志投入自然語言處理ê領域（比論輸入法、機器翻譯），m̄-koh kap Gaeilge（Irish、『愛爾蘭語』）等等ê語言比--起-來，iáu是有ài koh-khah進步ê所在，其中一个就是軟體界面siunn濟人慣勢華文。若準無hōo台文tī網路世界ê「展現程度」khah kuân--leh，就無法度起造台文友善ê網路環境。而且真濟台語使用者對台語ê myth（迷思）是「台文讀寫無必要」，kám是án-ne？只有真濟台語人kā台文書寫普及化，tsiah有píng盤ê機會。
商業軟體有成本考量，通常bē進行界面ê台文化，主張逐家貢獻才能ê自由軟體是一个選擇，但是目前除了閩南語Wikipedia用ê MediaWiki，tsit站仔suah無別个台文化ê軟體。因為我khah tsia̍p用tsit个開放原始碼ê社交網站，而且想beh hōo逐家tī線頂增加台文ê接觸程度，所以我就加入in開發kap翻譯ê團隊。
按怎beh用 ISO 639 碼
Tī頭前先開pull request〔2〕，加添台語ê翻譯界面。但是因為自由軟體界tiānn-tiānn用 ISO 639 khòo-loh（code）來區別在地化（L10N〔3〕）ê語言，台語照現此時ê規定，分類碼是nan-TW，意思是「台灣閩南語」。我知影m̄是逐家lóng thang接受tsit个用詞，m̄-koh tī申請變體iáu未過ê時tsūn，按怎也只ē-tàng接受。一寡代誌beh ài tshui-sak，bē-tàng等待萬事tsiâu備tsiah起行。
Tī tsit个軟體專案，翻譯m̄免家己編輯「在地化文字檔」，ē有一个在地化專用頁面，kan-ta tī頁面輸入逐个訊息ê翻譯內容就ē-sái，m̄-koh mā是tio̍h面對一寡詞彙kap其他ê問題，he tsiah是重點。
書寫系統、方言
逐派書寫系統lóng有伊ê支持者kap伊後壁ê意識形態，tse mā是其他語言ē拄--著ê現象。但是界面kap路--裡ê指標仝款，tio̍h考慮著按怎hōo人快讀快bat。
以kap台語仝款有多書寫系統ê日語來做例，就算逐个日本人lóng知影「とうきょう」是「東京」，但是濟濟人讀「とうきょう」ê速度khah慢，有漢字ê時tsūn就khah緊。考慮著真濟台文使用者lóng了解bē少漢字智識，而且台語語詞來源多元，koh有真濟外來語，所以就羅馬字、漢字lām用，ǹg望ē-tàng hōo人khah緊理解界面ê內容是啥mi̍h。若是牽涉著腔口ê羅馬字，為著beh hōo khah濟台語人了解界面，我建議盡量用優勢腔來寫。
詞彙ê問題
Bat聽一位牧師講，Atayal（『泰雅』）語無「船」tsit个詞，所以聖經翻譯者kā「船」翻做「柴盒仔」。埋tī塗跤--ê是棺柴，hē tī水--裡--ê是船隻。目前台語人tiānn-tiānn自華語iah是英語直接kā新詞「ngeh來配」，雖bóng無翻譯mā是一款翻譯策略，但是面對現代社會真濟新代誌，若是基本ê資訊詞彙無翻譯（就是用台語ê角度思想，來造一个新詞），對台語ê發展真不利，ē hōo台語變做tuè無時行ê語言。
雖bóng教育部字典有一寡資訊新詞，其他字典mā有，甚至公視台語台koh有創新字詞，m̄-koh án-ne iáu是無夠。為著確保翻譯用詞ê一致性，兼整合聚集逐位所翻譯ê新詞，需要開一个術語表；若是有志想beh hām別人合作，建議開一个wiki iah是線頂筆記頁面。
翻譯「copy、paste、delete」hit款--ê真簡單，就是「khóo-pih、貼、刣掉」。但是一寡漢字詞，若準無想beh獨獨照華語ê翻譯，參考日語、韓語ê漢字詞mā是一條路。另外，翻譯ê時為著避免意義無清楚，mā ē-sái參考其他語言是按怎翻--ê，m̄-koh mài hōo外語ê語法束tiâu--leh，tsiah thang翻hōo khah自然。
若準拄著『掛載』（mount，kā設備掛tī作業系統）tsit款華語漢字詞，台文翻譯ē khah礙虐，因為台語語詞在來無tsit个概念。比Linux用ê Caja檔案管理器〔4〕ê「Unable to mount location」tsit个例，我家己ê做法是參考英英辭典，kā翻做一句話，mài用單詞，就翻做「Bē-tàng kā位置掛tī檔案系統」，雖bóng長lò-lò，總--是khah自然，當然mā期待有khah好koh自然ê翻譯。若準拄著「daemon」tsit款無好翻譯--ê，mā是照仝款ê方式譯做「tī後壁pháng ê程序」，後壁tsiah加註英語ê原文。
結論
台語文現代化行到tann，tio̍h-ài面對真濟新詞引入社會、mā有tsiok濟外來新詞需要翻譯ê情形。為著hōo台語tuè ē著現代ê跤步，創造電腦科技等等ê新詞tsiânn重要。其中自由軟體ê翻譯，是值得逐家投入ê領域，連Gaeilge tsit款母語人無夠100萬ê語言，Firefox瀏覽器tī十冬外前就有Gaeilge ê界面--ah。
Tsit-má中國資訊用語直直piànn到台灣，有ê人煩惱台灣華語在地化ê資訊用語ē受著入侵。M̄是本土語言ê華語to有人leh煩惱--ah，lán本土語言資訊用語ê在地化翻譯，kám無值得逐家關心？
總--是ǹg望列位讀者，無論你ê母語是啥mi̍h，逐家lóng ē-tàng起來起造家己ê在地化社群（community），tàu翻譯家己所kah意ê自由軟體，hōo lán ê語言jiok ē著新科技、新文化。
2.建議維護團隊接納別人所修改ê原始碼。
3.就是kā別个語言ê軟體翻做本地語言，包含kā數字格式改做khah ha̍h在地ê用法。
4.https://github.com/mate-desktop/caja
