作者：葉鎧誠
 |
| Teh墓紙煞。hip相：葉英明、葉鎧誠 |
清明是二十四節氣ê其中一个，一般lóng tī新曆ê 4月初5左右。新曆，是陽曆ê一種，tse是根據地球公轉ê週期所制定ê曆法，所以清明雖然是真古早ê傳統節日，m̄-koh伊逐年舊曆ê日子lóng無仝（kāng）。
Tī以早á是農業社會ê時，除了清明，親像過年、五月節、中元、中秋、九月重陽、尾牙等等，lóng ài規家伙仔到神桌來祭拜神明kah祖先，若是hit工無法度拜，就ài提早先拜，bē-sái延期。
以清明做例，中晝進前ài kā祭品tshuân好來拜拜，先拜家神（親像阮兜是太子爺，伊mā稱做三太子，就是哪吒〔Lô-tshia〕，ài拜糖仔），攑香拜好了後ài插香（三欉），koh來，就去門口拜門神（論真應該是簷口夫人〔Tsînn-kháu-hu-lîn〕，香ài插一欉），上（siāng）尾tsiah tńg來公媽龕（kong-má-kham）拜祖先（插三欉）。清明早起mā ài拜地基主，拜過地基主ê祭品bē-tàng koh提來拜神明。等香燒kah差不多bueh一半ê時tsūn，就ē-tàng來pua̍h-pue問祖先「食飽--ah--未」，若是pua̍h著sīn-pue，就表示祖先食有滿意--ah，若無，就ài koh等--一-時-仔tsiah問。等祖先食飽--ah（就是pua̍h有pue--ah），就出去門口埕燒金，仝款是先神明，koh來門神，最後祖先。
燒hōo神明（包括門神）ê紙錢是金紙，一般是用四方金（sù-hong-kim，割金、土地公金）。銀紙是燒hōo祖先--ê，bē-sái燒hōo神明，m̄-thang舞m̄-tio̍h--去。Lóng燒了以後，就ē-tàng準備食晝--ah。
清明koh有一項tsiok重要ê代誌——teh墓紙（teh紙），mā有人講kuì墓紙（kuì紙）、獻紙，也就是去祖墓掃墓，m̄-koh就íng過ê例來講，kan-na囝孫（包括配偶）ē-tàng tshiūnn墓。古早時，若照傳統，嫁--出-去ê查某囝甚至bē-tàng tńg來外家祭祖，何況是外人--leh？M̄-koh，若真正有其他ê人bueh去，in mā bē-sái攑香拜墓（祭墓、孝墓），若無，家族ê福氣就ē pun hōo外人--ah。Teh墓紙無一定tio̍h-ài清明hit工，mā ē-tàng tī三日節（三月節、上巳〔siāng-sū〕），若是客人，普通ē tī過年了後探墓厝（探墓）。若準bueh tī清明teh紙，一般只要tī前後十工以內lóng ē用--得，tsit个期間lóng是好日子，所以m̄免看日，mā bē hōo煞--著，ē-sái動土（tāng-thóo）、修整，m̄-koh若是祖墓已經teh墓紙--ah，就kan-na ē-tàng拜拜，bē-tàng koh teh墓紙--ah，所以兄弟、親tsiânn ài先講hōo好勢，上好是kā時間tshiâu好逐家sio招做伙去，順suà聯絡感情。
 |
| 共祖墓piànn掃清氣了後就Teh紙囥祭品。hip相：葉英明、葉鎧誠 |
到墓仔埔準備bueh硩墓紙ê時，頭起先tio̍h-ài先kā祖墓整理清氣——piànn掃墓埕、用liâm-li̍k仔kā墓龜割草（盡量mài用khau--ê）。若是墓牌（墓碑）lak漆tio̍h-ài循（sūn）墓牌，或者是祖墓有啥mih所在破--去，mā ài趁tsit个時tsūn kā伊修補hōo好。
是按怎號做「teh（kuì）墓紙」--leh？Tse是因為lán kā祖墓piànn掃清氣了後，tio̍h-ài kā墓紙teh tī墓牌kah墓龜ê頂面（mā ē-tàng kuì tī樹枝），意思是為祖先ê陰居khàm厝頂、換新瓦、裝潢厝間。有teh（kuì）紙ê墓，就bē kah草仔墓、破墓壙仝款，hōo人（鬼）當做是無嗣墓（bô-sû-bōng），khah bē受著欺負。墓紙一般有兩種，一種是五色紙（紅、綠、黃、白、藍各一疊），另外一種是黃色ê古仔紙，兩種lóng是長tu--ê，揀其中一種就ē-sái（泉--ê普通用五色紙，漳--ê普通用古仔紙）。
Teh墓紙ài先tuì后土（Hōo-thóo）開始，koh來是龍神（Liông-sîn），最後tsiah是祖先。后土，其實就是土地公，也就是福德正神（Hok-tik-tsìng-sîn），因為人死了後，靈魂lóng是茫茫渺渺，需要土地公來tshuā、來保護，所以每一門風水lóng有后土。一般tī墓ê虎爿（tī墓牌hia面對墓埕ê正手爿，mā叫做小爿）lóng有一塊「后土」ê石碑，有ê甚至koh有神像，用細粒石頭kā墓紙teh一疊tī石碑頂面就ē-sái--ah。另外一爿——龍爿（大爿）——是龍神ê所在，龍神是陪伴祖先ê神明，若是無石碑，就teh tī hit跡ê屈手（墓手）頂面來表示。落尾就是祖先，先tī墓牌頂面teh一疊，koh來就去墓龜teh四排，逐排三疊，tsit 12疊就表示「生、老、病、苦、死」ê循環，上尾一定ài停tī「老」，有ê頂輩ē ná teh ná唸，最後mā一定ài停tī「老」--字。
Teh墓紙一般lóng拜kah khah簡單，紮水果、餅、糖仔等等就ē-sái，m̄免tshuân牲醴。囥祭品（食物kah紙錢）ê順序kah頭前--ê仝款：先后土，tsiah龍神，最後祖先。祖先--ê囥tī墓桌頂，后土kah龍神--ê若無墓桌就囥塗跤，m̄-koh ài先tsū好（用報紙就ē-sái）tsiah ē-tàng囥，koh來就點蠟燭、燒香（點香），蠟燭ài紅--ê，tī三个香爐ê邊--á各佈置一對（mā是仝款ê順序）。Lóng準備好勢了後，上老沿ê序大就ài做主祭，tshuā領規家人祭拜。
拜后土ê時，主祭ài講一寡吉祥話，祈求土地公保庇平安順序，拜好就插三欉香。Koh來就拜龍神，仝款插三欉香。最後拜祖先ê時，主祭ài kā祖先稟告：「囝孫某人（主祭ê名），今仔日kah（tshuā）啥mih人（介紹規家人）來掃墓，有紮水果……，請祖先保庇規家平安、事業（學業）順序……。」然後插三欉香。等香燒kah差不多賰一半ê時tsūn，主祭就tshuā規家人合掌kā祖先請示：「若是祖先有歡喜，請hōo sīn-pue。」講煞就pua̍h-pue。若是無紮pue，mā ē-tàng用錢pue，也就是用銀角仔來代替。
Pua̍h-pue了後，若是無pue，就ài koh等--一-時-仔tsiah請示，一直到pua̍h有pue為止；若是sīn-pue，就去墓埕ê邊--á燒金，順序仝款是后土（金紙）、龍神（金紙）、祖先（銀紙，若是過往幾若冬--ah mā ē-tàng用金紙）。為著安全，燒了一定ài沃水，koh來就ē-tàng kā mi̍h件款款--leh準備來tńg--ah，m̄-koh墓紙、紙錢、蠟燭kah香m̄-thang紮--tńg-去，離開墓仔埔了後ài洗手，án-ne就結束--ah。
 |
| 佇墓埕邊仔燒金。hip相：葉英明、葉鎧誠 |
除了特殊節日（親像清明）以外，平常時是bē-tàng凊彩走去墓仔埔--ê，就算去，mā bē-tàng kā祖墓tín動，kan-na ē-tàng合掌拜拜。M̄-koh若是有發生啥mih大代誌，親像娶新婦（娶某）、生後生（添丁）、換新厝（入厝）、做高官（包含考試登第）等等，有喜事ê hit房就ài看日培墓--ah。
培墓，一般來講一kái tio̍h-ài連suà三年。除了喜事以外，新墓kah祖先入新厝——就是khioh骨（khioh風水）以後koh再安葬——mā ài。祖先落葬差不多七、八冬以後，就ài看日khioh骨，kā骨頭曝hōo ta tsiah囥入金斗甕（黃金〔hông-kim〕）koh重安土，風水ài重做，墓牌mā ài重拍。
培墓ē-tàng得著庇蔭kah福氣，mā是對祖先ê感謝，所以仝款kan-na同宗ê親tsiânn ē-tàng參加。一般認為，若是khah uànn到，甚至無去，án-ne家運ē落衰。Kah teh墓紙比--起-來，培墓是非常慎重ê儀式，ài準備ê祭品tsiânn濟，親像牲醴、菜碗、粿、水果、圓仔（祖先入新厝tsiah需要）、紅卵、燒酒等等。牲醴就是三牲，也就是雞、魚、豬，牲醴ài各tshuân兩份，一份是bueh用來拜后土--ê，一份是bueh用來拜龍神--ê。
菜碗是bueh用來拜祖先--ê，ài準備12碗，若無，十碗mā ē-sái，m̄-koh bē-sái kan-na準備九碗或者八碗，因為「九」kah「狗」仝音，hōo祖先食--ê哪ē-sái tshuân「狗碗」--leh？而且「八」kah「peh（𬦰）」仝音，mā kah「爬」tsiok成--ê，tse就ká-ná leh暗示講囝孫以後ê路ē tsiok忝--ê，所以mā m̄-thang tshuân八碗。
一般來講，菜碗ài有豆乾（表示做官）kah芋仔（「芋囝芋孫」，生tsiânn濟囝孫ê意思）tsit兩項，其他--ê就隨在lán鬥，金針、木耳、排骨、肉片、煙腸等等lóng ē-sái。菜碗一定ài té滿滿，m̄-koh有ê菜無法度囥siunn久，若是臭酸--去--ah，mā是真拍損，所以有一種變竅ê做法：先用菜頭做底，kā菜碗té hōo平，tsiah tī菜頭頂khàm一寡菜，án-ne看--起-來mā是仝款滿滿一碗，koh ē-tàng討一个好彩頭，而且就算囥kah歹--去，因為菜頭khah俗，損失bē傷重。
Koh來就是ài有「山珍海味」，也就是代表山珍ê薑kah代表海味ê鹽（各一份，tse mā ē-tàng算是菜碗ê項目）。有菜，當然tio̍h-ài有飯（mā ē-tàng算是菜碗ê其中一項），飯ài té尖尖，祖墓有幾个祖先，就ài tshuân幾碗ê飯、幾雙ê箸，邊--á koh ài囥面桶水（ē-tàng提tse來kā燒金了後ê火hu沃熄）kah新ê面巾，hōo祖先tī食飯進前來洗手。
培墓ài準備ê粿有tsiok濟款--ê，親像紅龜粿、發粿、丁粿、鼠麴粿（tshí-khak-kué）等等。紅龜粿ài準備兩份，后土、龍神各一份。發粿是表示「發達」、「興旺」ê意思，因為tse是bueh用來拜后土、龍神kah祖先--ê，所以tio̍h-ài準備三份，tī-leh排ê時tsūn，直接囥tī紅龜粿ê頂面就好。丁粿是長ko形--ê，表示出丁ê意思，kah鼠麴粿仝款是bueh用來拜祖先--ê。鼠麴粿，mā叫做草仔粿、烏草仔龜，一般是用粿tshè摻鼠麴草（或者是艾）做皮、內底包菜脯米ê一種青色ê粿。
水果一般ē準備柳丁，意思是出丁，mā ē-tàng用蘋果、柑仔、棗仔……來拜后土、龍神kah祖先，m̄-koh bē-sái提蓮霧來拜祖先，因為蓮霧有陷無滿，傳統認為拜tse ē thap財。若是祖先入新厝，tsit三年培墓就lóng ài準備圓仔來拜，后土kah龍神各三碗，墓--ní ê祖先一个一碗，意思是團圓，tshuân紅色kah白色hit款無包餡ê圓仔就ē-sái，mā ē-tàng改用頂面點一點紅點ê包仔來代替。紅卵，有幾个人來培墓，就ài紮幾粒來拜祖先，準備bueh來tńg ê時tsūn tio̍h-ài現場peh卵殼，全部ê卵殼lóng ài留tī墓--ní。Peh卵殼就是褪殼，意思是kā歹運褪掉，將好運紮--tńg-去。燒酒一般是tshuân米酒，后土、龍神各三杯，墓--ní ê祖先一个一杯，tī燒金燒煞ê時tsūn ài gàn錢——就是將拜--過ê燒酒lâm tī燒金hit跡。Gàn錢ê時tsūn tio̍h-ài細膩，因為燒酒有酒精ê成份，火tiānn-tiānn ē雄雄koh燒--起-來，m̄-thang靠siunn倚。
培墓ê流程hām teh墓紙差不多，m̄-koh最後準備bueh離開ê時tsūn koh ài放炮，附近ê牧童若聽著炮仔聲就ē倚--過-來，lán tio̍h-ài分享（hun-hiáng）一寡喜氣hōo--in——將紅龜粿、鼠麴粿送hōo in提tńg去食，tse叫做挹（ioh）墓粿。Tse m̄-nā是幫助散食囡仔，mā是希望in tī-leh牽牛食草ê時ē-tàng khah注意--leh，m̄-thang破壞著風水（祖墓）。
當然--lah！因為時代變遷，真濟慣俗已經沓沓仔leh改變，甚至消失--去--ah，雖然講祭祀ê智識是序大傳--落-來--ê，序大mā á-koh tī--leh，m̄-koh阮兜其實已經30年無培墓--ah，teh墓紙也簡化tsiânn濟--looh！若有一工將祖先ê遺骨（骨頭hu）tuì祖墓安入靈骨塔內，án-ne bueh祭祖就koh-khah簡單--ah。但是就親像序大講--ê：m̄免hiah厚工，心意khah重要。本底逐人攑三欉香，早就改做合掌拜拜，hōo主祭來代表規家人插香就好，厝--ní mā無leh燒金--ah，拜拜ê祭品kah一寡用品，mā是盡量簡化，減少汙染mài討債，因為風俗習慣ê形式m̄是上重要--ê，ē-tàng規家平安、團圓，逐家做伙來感念祖先，án-ne就已經有夠--ah。
