作者：Lahjih（蕭平治）
 |
| 來源：作者Lahjih（蕭平治）FB面冊相片 |
《台文通訊》kap「彰化台文通訊讀者聯誼會」因緣有夠深。
1991年5--月，彰化縣政府踮文開國小辦五工半「鄉土文化研習」，安排兩節台語音韻十五音，隔tńg年koh tī鹿港國小辦理五工半研習，有漢學先教反切十五音音韻。蕭平治tī林錦賢ê冊擔仔買一本《彙音寶鑑》開始家己自修。
1993年2--月到6--月，彰化縣教育局推派陳福當、游麗津、王淑芬、洪維彬四位國小老師，去清華大學kah鄭良偉教授學習「台語讀寫」，仝時有台語文研究者張聰敏先生鬥陣上課。1993年8--月歇熱期間，彰化縣政府教育局tī社教館辦理一禮拜五工半台語研習，尾兩工，邀請鄭良偉教授講台語文「漢羅lām寫」觀念。蕭平治就án-ne寫出第一篇台文作品〈阿爸ê鹿角薰吹〉。
1993年9--月陳福當老師成立「彰化縣台文通訊讀者聯誼會」，借用翁金珠立法委員彰化服務處，tī每個月第三禮拜五暗時7點定期聚會。1993年10--月陳福當老師kā〈阿爸ê鹿角薰吹〉手寫稿投稿《台文通訊》。1993年10--月《台文通訊》第24期刊出〈阿爸ê鹿角薰吹〉，得著肯定，開始台文寫作興趣。
《台文通訊》創刊tī 1991年7--月，「彰化縣台文通訊讀者聯誼會」慢兩冬開始tòe伊ê跤步行，阮ná學習ná推銷。聯誼會逐個月聚會，就是讀《台文通訊》，逐家互相làu-khùi求進步。代起先，陳福當、張聰敏、游麗津、楊振裕、廖英雄kap蕭平治chiâⁿ做主要出席成員，參加ê人愈來愈濟，逐擺維持十幾个人數。後--來除了讀、討論以外，開始有人提出家己作品發表，而且探討聲韻白話字，lóng以《台文通訊》做參考標準。陳福當老師真有責任，一年12擺聚會，除了風颱天siàng大雨，罕得歇睏，一直主持到伊退休chiah換林義和hoa̍t-lo̍h。
逐個月第三禮拜五暗時7點，借用翁金珠立法委員彰化服務處定期聚會，研讀1991年7--月踮Los Angeles創刊ê《台文通訊》雜誌，練習台語文閱讀、學習白話字、khe考台文漢字，lóng是陳福當老師chhoā頭帶動，用心經營。雖bóng人數無濟，總--是連sòa十gőa外冬歲月，m̄ bat斷站，我mā chiâⁿ做忠實會員——ùi田中央（Chhân-tiong-ng）駛車準時報到，出席率達到12分之11。手寫稿〈阿爸ê鹿角薰吹〉就是陳福當老師替我投稿--ê，發表tī《台文通訊》第24 期，陳福當老師算是我趣味寫作ê貴人。
1993年周清玉縣長主政期間，tī 10--月～12月底，舉辦「彰化縣中小學教師台語研習」，分南北二區仝時進行，利用禮拜三下晡研習，參加ê老師每區大約100名；講師有陳福當、游麗津、王淑芬、楊振裕、蕭平治，lóng是陳福當老師計畫hoa̍t-lo̍h進行。
後--來，周清玉縣長連任無成，鄉土教學換人hoa̍t-lo̍h，是陳福當老師激烈爭取主導權，堅持用鄭良偉教授《精速台語羅馬字與規律》做研習教材，自án-ne，白話字chiâⁿ做彰化縣台語研習ê重要課題。陳福當、游麗津、王淑芬、楊振裕、蕭平治是斯當時重要推動老師，chit時chiah發覺陳福當老師有運動者ê個性、魄力；因為有伊堅持勇敢爭取，阮chiah有資源進行台語文研習事工，陳福當老師是阮it.-tò͘勇ê前鋒。
2001年8月19，台灣羅馬字協會tī淡水成立，陳福當、楊振裕、蕭平治lóng是創會會員，並擔任第一屆理事，開始參與台語文運動。逐家出錢出力推動白話字、推動漢羅lām寫台語文，每年暑假定期辦理「世界台語文化營」，阮ê跤跡ùi彰化縣擴大到全台灣。
2002～2005年，翁金珠縣長主政期間，是大發揮ê四冬。Tī「彰化縣母語諮詢委員會」中，阮建議採用漢羅lām寫方式，辦理縣內老師台文研習方針，得著認同。因為陳福當老師向教育局極力爭取資源，四年來，辦理八擺36點鐘ê台語讀寫研習，每一擺，全縣分八區仝時進行研習，有講師有助理，mā有辦進階研習，培養講師人才。每擺研習lóng訂規矩，需要符合出席率，需要考試通過，chiah ē-tàng提著研習分數、研習證書，有時koh ē出練習宿題，hō͘少數老師感覺無爽快、有壓力。
Hit-tang-chūn，楊振裕校長、陳福當kap蕭平治老師lóng加入台語輔導團。楊校長人緣好，溝通能力讚，華文台文功力koh強，有伊出面協調，各學校lóng自動配合研習事工；蕭平治負責文書處理、出題，提供參考教材kap一寡個人作品hō͘學員參考；陳福當老師設計課程kah教育局連繫，當然iáu有濟濟老師tàu-saⁿ-kāng。
2001年，楊振裕擔任育新國小校長hit四冬，認真辦理台文讀冊會，培養真濟台語師資，推動全縣台語研習，研究台語音韻kap教會羅馬字；2004年創辦第一屆台語文學創作比賽，並編印紙本《台語文學創作比賽優勝專輯第一屆》，一年一集，連sòa出十幾集。
回想1991年開始傳統音韻研究，想boeh做漢學先--a，到1993年，轉換「漢羅lām寫」寫「生活台語」，歡喜跟tòe《台文通訊》跤步行28冬ê路、做28冬ê工。《台文通訊BONG報》是導引明針，是進修糧食，《台文通訊》創辦人良光兄呵咾我「拍死無退」，確實是實情。行過30年歷史，我有28冬見證，歡喜正確ê路繼續行，有意義ê工繼續做。
#台文通訊30歲 專欄，本文使用教育部推薦漢字kap傳統白話字。
台文通訊BONG報324期，2021年3月出刊。
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
