論注AZ疫苗ê副作用

作者:羅九安


(本文uì Blog「讀台語,學科學 Tha̍k Tâi-gí, o̍h kho-ha̍k」轉載,有得著作者同意,漢羅用字kap內容有小可調整,原文網址是:https://reurl.cc/8ydk7R

由英國ê牛津大學kap藥廠AstraZeneca合作研發ê AZ疫苗,因為tī歐洲濟濟國家發生有少數人tī注了以後出現嚴重ê血角,造成腦部kap腹內內臟ê血管阻that,而且in ê血液中teh參與凝血ê血小板濃度mā siunn低,致到ná來ná濟國家kā AZ疫苗ê使用設定年歲ê限制,比論英國建議30歲以上--ê tsiah注,加拿大55至65歲tsiah建議注,德國65歲以上m̄-thang注等等。雖bóng歐洲藥品管理局有徛出來替AZ疫苗辯護,講伊ê利益贏過風險tsiânn濟,mā無法度消除人ê掛慮,丹麥幾若禮拜前甚至koh開第一銃,代先全面禁止注AZ疫苗。


停止注AZ疫苗ê決定是明智--ê iah是過度反應?血角tsit个副作用是源自疫苗本身iah是製造ê過程受汙染造成--ê?歐洲藥品管理局tī 4月初7發表in ê調查報告。Tī報告--裡,in承認講tsit款罕見ê血角兼血小板濃度低確實是注AZ疫苗可能帶--來ê副作用。患者可能ē有下面幾項症頭:


喘khuì緊koh短

胸坎疼

腹肚疼,跤腿腫

頭疼,目睭看mi̍h件看bē清

注射所在以外ê皮膚生血斑


自體免疫


為怎樣注AZ疫苗了ē有血角ê風險?有兩篇發表tī新英格蘭醫學期刊ê臨床研究提供lán一寡線索。In指出tsit个問題凡勢是源自走精ê免疫反應。Hōo人出現類似使用肝素ê患者可能拄--著ê症頭。


肝素(heparin)是一種抗凝血ê物質,ē-sái用來治療kap防止動脈、靜脈iah是肺部ê血角,mā ē-tàng治療狹心症kap心肌梗that,tī醫學上有不止仔大ê路用。不而過,tī tsiânn罕見ê案例--裡,使用肝素ê患者可能ē出現血小板減少ê副作用,醫學界kā伊號做「肝素引起血小板低下症」,原因是肝素若kap血小板第4因子(PF4)結合tsiânn做肝素——血小板第4因子複合體(heparin-PF4 complex),ē刺激免疫系統生出對抗血小板第4因子ê IgG抗體,tsit个IgG抗體就隨kap tsit个肝素——血小板第4因子複合體結合tsiânn做新ê複合體(IgG-heparin-PF4 complex),tsit个複合體suà--落-去透過血小板表面ê受體刺激血小板,引起血小板釋放愈濟第4因子kap ē促進凝血ê物質,hōo一塊koh一塊ê血小板聚集tsiânn做血角,m̄-nā消耗體內ê血小板,mā致到血管ê阻that。


不而過,hit幾个注AZ疫苗ê人,lóng m̄ bat使用過肝素,mā無去uè著新冠病毒,為怎樣in suah出現tsit號症頭--leh?AZ疫苗設計ê原理,是利用烏猩猩ê腺病毒做載體,kā ē表現新冠病毒ê S受體ê DNA tshuā入去人ê細胞內,suà--落-去病毒ē命令細胞表現新冠病毒ê S受體,刺激免疫系統產生對抗S受體ê抗體。除了AZ以外,因為類似副作用去hōo美國CDC建議暫停使用幾若禮拜ê美國藥廠嬌生(Johnson & Johnson)ê疫苗,mā根據仝款ê原理設計,m̄-koh伊用另外一款ê腺病毒做載體。


Tann,lán iáu m̄知影是啥mih原因hōo少數人tī注AZ或者是嬌生ê疫苗以後,去得著tsit款症頭。雖bóng腺病毒本身ē kap血小板作用,引起生化反應致使血小板ê濃度降低,m̄-koh科學家認為腺病毒載體kap tsit遍ê問題應該無tī代。另外一个受giâu疑ê因素是疫苗內游離ê DNA,伊無的確ē kap血小板第4因子結合去引起免疫反應,m̄-koh iáu未hām別牌ê疫苗做對照,無法度證實tsit个假設。雖bóng衛生專家直直呼籲大眾m̄-thang因為一屑仔罕見ê例就m̄願注疫苗,畢竟koh-khah按怎講伊mā是khah贏去tio̍h武漢肺炎,m̄-koh因為輝瑞kap Moderna兩牌ê RNA疫苗到tann iáu m̄ bat出現tsit號問題,而且tī一般人ê認知--裡,in koh有khah好ê保護力,致到有濟濟人甘願等來注tsit兩牌--ê,m̄願注AZ--ê。Hōo逐國政府煩惱án-ne落--去恐驚ē拖慢著建立群體免疫ê時間表。




#醫學台文 專欄,本文使用教育部推薦漢字kap臺灣閩南語羅馬字拼音方案

#台文通訊BONG報 326期,2021年5月出刊。
 
--------------------------------------------
歡迎捐款贊助 李江却台語文教基金會 (捐款thang抵稅,匯款了後請通知02-23112199)
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox


郵政劃撥:19021486
戶名:財團法人李江却台語文教基金會
電匯:123-20-050514-2
華南銀行士林分行活儲
戶名:財團法人李江却台語文教基金會

李江却台語文教基金會需要你ê定期捐款,逐個月捐助NT$200以上,lán做伙來推動復振台灣語文ê事工,歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會(台文通訊BONG報發行單位)NT$200(iah是逐冬NT$2,400)以上,做伙支持基金會事工kap雜誌編印發行費用。歡迎利用郵局劃撥、信用卡(寫捐款單)、線頂捐款、現金贊助、銀行/ATM轉帳(轉帳了後請通知)、支票、郵局戶頭自動轉帳扣繳(寫授權書),捐款收據ē-tàng做『列舉扣除額』抵稅ê用途。