記錄／吳玉祥
編按：本文是2023/2/22棲地復育台語講座ê摘要記錄，講者何宗勳是台灣動物保護行政監督聯盟秘書長。
台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃有關生態環境議題ê台語講座，歡迎逐家同齊來擴展家己ê台語棲地（tshe-tē）！詳細資料ē-tàng看「台灣蠻野心足生態協會」FB專頁。
何宗勳老師是台南人，目前擔任台灣動物保護行政監督聯盟ê秘書長，「動物福祉、組織再造、公開透明、課責機制、公民參與」是in聯盟ê五个核心價值。為beh推動中央kap地方政府關心動物議題、制訂進步ê動物政策，in透過代議政治運作、運用公部門ê相關資料，來監督各級政府、kap官員溝通、遊說民意代表。
台灣自二次大戰後ê獨裁戒嚴，發展到kah tsit-tsūn 21世紀ê自由民主國家，tsit个過程，mā是「動物福祉」，也就是lán台灣人kap動物伴改變關係ê過程：一、上早期ê 5、60年代，tsit時ê台灣人是有thang食就好，「只求保平安，m̄敢添福壽」。二、70年代是客廳做工場，代工變全民運動，經濟力量展現ê年代，注重、追求愛kap歸屬。三、80年代是社會力量展現ê年代，環保意識提升，突破黨禁、解除戒嚴，要求尊重、自尊。Tī 70年代進前，民間lóng統稱「動物伴」是「精牲」，到80年代因為「精牲」有其他負面ê意思，就hông改號做「犬」。四、90年代是追求自我實現ê年代，自我實現ê關鍵就是公民力量。
90年代正正是社會運動tng tshia-iānn ê十冬，lán台灣人kap動物ê關係koh進一大步，in變做lán ê動物伴，m̄免掠niáu鼠，mā m̄免顧門做免費ê保全。到21世紀koh進一大步，民眾飼動物伴親像teh飼囡仔，kā叫做『毛小孩』。Uì khioh lán人食賰--ê去食ê「精牲」一路行到變『毛小孩』，狗仔kap貓仔ê數量mā已經khah濟過新出世ê紅嬰仔。人kap動物伴之間關係ê變化是tuè社會發展ê跤跡一站一站行--過-來--ê。
另外，lán台灣ê動物保護史幾若个關鍵ê時間點，mā是hām社會對人權、動物權觀念ê改變發展sio牽連：一、1989年制定《野生動物保育法》。二、1994年受國際保育觀念影響kap國際貿易ê制裁壓力，tsiah來修正《野生動物保育法》，開始採取嚴格ê執法〔1〕。三、1998年，為著幾若件流浪狗咬--人ê事件kap公安衛生問題引起社會注意，制定《動物保護法》。四、2010年農委會設立動物保護科，專責辦理動物保護業務。五、2013年由Raye導演、九把刀監製ê記錄片《十二夜》記錄動物入去收容所了後，in ê性命就開始倒踏時，12工內若準無人收養，就ài執行安樂死。影片促成2015年修訂《動物保護法》，kā「12夜條款」〔2〕廢除。六、2022年農委會為beh因應社會飼動物伴ê趨勢kap需求，成立「寵物管理科 」。
當然人權、動物權ē-tàng tī島嶼釘根生湠有受著90年代以後幾若个大型社會運動來影響，親像1995反濱南、反七輕，救烏面lā-pue；2003反湖山水庫，救八色鳥；2006反國光石化，救白海豬（媽祖魚）；2007反對起飯店，救後灣陸蟳；2014反道路kap園區，救石虎。雖bóng運動ê主角是反對嚴重汙染、傷重能源、傷重水源ê環境不利工業，動物kan-na是配角niā-niā。M̄-koh動物ê生存權tī公眾議題ê討論中受著公眾注目，突顯--出-來，mā變做社會關心ê焦點。
未來若是政府通過組織再造，農委會改做農業部，時到有beh成立「動物保護司」，kā動物保護hām畜產分工。未來動物伴ê新世代是m̄是ē有身份證？有醫療保險、有意外險？Tse lóng值得lán繼續期待伊ê發展。
- 1990年代中期，美國用台灣無盡力保育犀牛kap虎做理由，禁止台灣ê珊瑚kap羽毛製品出口美國，hit-tsūn台灣iáu未加入世界貿易組織，無法度用WTO ê爭端解決機制來救濟，姑不將tī 1994年參考國際公約來修正《野生動物保育法》，koh採用嚴格執法，tsiah來免去貿易制裁。
- 《動物保護法》第12條：『經通知或公告超過十二日而無人認領、認養或適當處置之動物，得予以宰殺。』
蠻野講堂
棲地復育台語講座 專欄，本文使用教育部推薦漢字kap台羅。
#台文通訊BONG報 350期，2023年5月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
