Tī西曆1912年6--月，《Tâi-oân Hú-siâⁿ Kàu-hōe-pò》（台灣府城教會報）有刊一篇文章，篇名號做〈Kong Phòa Tōa-chûn〉（攻破大船）。Tsia ê報紙kap篇名是用教會羅馬字（POJ）當做書寫ê「家私」。論到tsit篇文章，在現今文體ê角度看，ē-sái算講是「報導文學」ê作品。Mā-koh tsit篇文章tiānn-tiānn hông提來做例，紹介lán台語文學發展ê理路；是出tī伊所teh報導ê對象，就是「Titanic」（『鐵達尼號』）ê故事。
Titanic ê故事，百外冬來，已經寫做文學、拍做電影。1997年hit齣美國Hollywood所拍ê〈Titanic〉，一直到2009年，lóng是全世界上趁錢電影ê記錄保持者。出名百外冬，一直存在tī世人記持ê代誌，lán台語文學mā有寫--著，ē-sái講不止仔心適。Tuì án-ne tsiânn做台語文學入門ê教材。總--是，lán kā tsit篇報導文學作品掠做重要ê因端，絕對m̄是kan-ta「Titanic通人知」孤一項niā-niā。
Iáu-koh有tsit篇文章出現ê都合。〈攻破大船〉頭一句就講：「Khah倚北極hia……。」Lán知影Titanic tī北極附近ê所在沉落海。He是tī西曆1912年4--月。大西洋倚北極ê所在離台灣偌遠--leh！Khah無兩個月，致意tī Titanic ê報導已經刊tī《台灣府城教會報》。伊tsiânn做lán台灣頭一份新聞紙，有影真正pān；m̄-nā緊緊報導tsit个致到1,400人身故ê大災難，而且hōo lán知《台灣府城教會報》是致意tī「天下事」ê新聞紙。現此時ê社會giàn要意「國際觀」。Lán 1912年ê新聞紙已經teh觀察世間萬國所發生ê事件。台語文學源起頭就有國際觀，無khah輸別人。
Tsit篇報導講著Titanic沉船事故ê代先，交代北極hit搭位ê環境；伊所使用ê語言，koh-khah值得lán斟酌來看。伊講北極有冰「流落低ná親像做一條冰ê河，」冰河ná流，「已經到海口冰就鑽入水--裡；」Tsit款狀況發展到落尾，「……就大塊冰tsih斷--去浮tī海--裡。」啊！Lán千萬m̄-thang掠做tsia-ê話真平常。伊是teh描述冰河tsit款自然現象ê形態kap伊活跳跳ê「生態」。論真，tse是科學ti̍k ê語言；tsit款語言，出現tī《National Geographic》（國家地理雜誌）mā bē講真奇怪。
貴君kám知，日本海軍大將，日後ê海軍總司令山本五十六，一世人lóng有訂閱《國家地理雜誌》？1912年，猶原是山本五十六海軍學校tú仔出業，少年軍官ê時期。Lán台灣新聞紙面頂報導文學使用ê語言，已經是殖民者山本五十六日常hìng讀ê水準。論到台語文學ê身世，受日本kap中國殖民者打壓、苦毒掠外，lán是m̄免見笑。
M̄-nā án-ne，tsit款科學ti̍k ê語言，m̄是冰河講了就準拄煞。Tsih斷浮tī海--裡ê冰，「人叫做 “冰山”，有時嶄然大塊；離海面幾十丈kuân，也tī海內幾若百丈深。」無講你m̄知，tse是teh講啥？雖bóng無真顯然，總--是，tse是teh講冰浮tī水--裡，水面上ê體積kap水面下體積ê比率大約是一比九。Koh再一擺，tsit篇報導hōo lán看著伊不時teh使用現代化、科學ti̍k ê語言。仝款ê語言，無幾句koh出現；teh講Titanic kap「tuì基隆駛到神戶」ê船來比是七倍大。
短短--à幾句話，lán就看著lán台語文學tī伊ê源起頭已經顯現「現代ti̍k」。人teh講語言本身就代表思考ê工具kap理路。Án-ne lán koh-khah知，台語文學內底是蘊藏現代kap科學，邏輯ti̍k ê思維。思考中ng有邏輯，準定ē有批判。Tse正正是lán台語文學ê底蒂。
1912年--ooh。Hit-tsūn中國文學啥款？Lán歹勢kā人恥笑。Lán台語人tiānn-tiānn講台語文學tī「我手寫我口」khah贏中國（五四運動）。論真，lán tī現代文學要意ê科學kap批判mā贏濟濟--lah！
