作者：Marwin
若準講lán有同意「名從主人」原則，án-ne，地號名是m̄是ài尊重在地人ê講法--leh？「Suann-lîng-poo」〔1〕tsit个地號名，是我自細漢就聽到tann--ê，雖bóng在地人出外--去--ê khah濟，入--來ê外地人也罕得聽著在地人ē按怎講tsit个地號名。總--是，tsit个地號名一直tī我ê腦海中。就準講後--來做兵退伍tńg--來，開始食頭路，lóng tī北部行踏，suah也m̄ bat聽過別人按怎講tsit个所在，問過幾个仔在地iah是非在地--ê，lóng ē講tuì「Sann-tîng-poo」（三重埔）iah是「Sam-tiông-tshī」（三重市），差不多無人bat聽過「Suann-lîng-poo」。
一直到2023年12--月，《花開ê季節》四文版（英文、台文、中文kah日文）小說出版，其中，台文翻譯者林智美教授tī羅馬字版（第163頁第四pha），伊講著「Tuà eh Suann-lîng-poo ê a-koo……」，我tsiah總算揣--著--ah。協助tsit本冊做台文校對ê紀品志tī序文寫講，鼓勵林智美教授用in厝--裡ê腔口、保留原底ê聲音。林智美教授是1944年出世，1966年就去到美國，伊保留tsiânn濟原底老台北人ê腔口，是lán台語人寶貴ê資料庫。以上ê訊息mā有刊tī《台文通訊BONG報》第357期〔2〕。
講--起-來，mā是一个機緣。聽著tsit本冊講beh出版ê時，我就tsiânn有興趣，因為伊是四文版，lán應該lóng小可仔讀有。總--是hit當時無thang直接揣--著iah是隨去買。2024年正--月，台灣教授協會邀請林智美教授來講tsit本小說，我tsiânn期待ē-tàng聽林教授ê分享。可惜hit工林教授聲音小可仔無sù序，無thang來現場分享，m̄-koh好佳哉iáu有幾若个前輩tàu分享hit本小說，我聽了tsiok感動--ê。
Koh-khah感動--ê是，台教會副會長竟然kā hit本冊送hōo每一个來現場ê朋友。本tsiânn，我小可仔uànn到，拄坐--落，in已經差不多beh開始--ah，我看著後壁有囥幾本仔冊，想講驚hōo人買了--去，緊beh去問看kám ē-tàng買，想bē到in直接sio送，感動kah kiōng-beh流目屎。我隨想著lán ê台文前輩，幾若个lóng是無惜金錢，對後輩tsiânn用心。暗頭仔我beh koh去另外一个所在聽演講，hit搭拄好mā有leh賣冊，我本tsiânn就拍算beh買--ah，既然hōo人送lán一本，，時到tsiah順suà koh買一本。
Tsit-má ê台文冊是án-ne，我差不多一睏頭lóng ē買一兩本以上，一方面是想講日後若遇著有緣ê人thang sio送，我想，tse kah台教會副會長hit種kā冊送hōo去現場ê朋友mā仝款仔仝款。另外一方面，tsit-má出版ê台文冊，大多數有kah聲音檔。Tsit本《花開ê季節》mā是án-ne，我提著冊ê第二工，就「拚性命」leh讀。Tng我讀到第126頁第四pha ê時，我讀著「蹛eh三重埔ê阿姑」，就真hònn玄想講林教授ē按怎讀tsit个地號名。對照聲音檔一下聽不得了，真正就是我leh揣ê「Suann-lîng-poo」，總算hōo我揣--著--ah，我有夠感動--ê。
Koh-khah拄好--ê是，進前有tī網路聽「世界台灣文化論壇 aka Sè-kài Tâi-oân Bûn-hòa Lūn-tôaⁿ」，tiānn-tiānn聽著林教授分享伊ê一寡想法，2024年ê頭三個月，in講有beh tńg來台灣。結果，新曆正月14，in舉辦世界台灣文化獎頒獎典禮，我拍算beh去參加。去到現場，in leh紹介參加ê貴賓， 我聽著林教授mā tī現場。中途歇睏ê時，我隨走去揣林教授，kā講我聽著he小說內底講著「Suann-lîng-poo」tsit个地號名ê感動。伊隨牽我去揣品志，講在地人真正是講「Suann-lîng-poo」。
緣份實在是tsiânn奇妙，啥mih時tsūn ē拄著啥mih代誌，你無一定ē按算--得；凡勢，想tsiânn久ê代誌，就ē tī某mí時tsūn hōo你拄--著。「Suann-lîng-poo」tsit个地號名自我開始正式學台語文了後，無tsiânn用心leh揣，總--是我有囥tī心肝底。一直到tsit改，總算hōo我揣--著，我mā tsiah確定he m̄是我家己tī頭殼內底leh烏白想--ê。
我知影台灣頭台灣尾有bē少所在，有beh倚beh倚ê tsit種地號名，新竹地區有、高雄地區mā有。我知影lán ê先民去到逐所在，因為來到台灣進前共同ê經驗，雖bóng in無sio招，suah ē有sio-siāng ê號名理路。總--是，hit種發展ê過程，in ê方向應該mā是有照逐所在無仝特色ê趨勢leh行。每一个人lóng有伊ê特殊性，地號名ê發展mā是，無論是因為省懶音iah是其他因端，終其尾ē行出家己ê特色，tsiânn做本地區kah其他地區無仝ê所在。
以早台北縣iáu未改制進前，bat有三重市、三重埔ê地名，hit時有人ē唸做「Sam-tiông-tshī」kah「Sann-tîng-poo」。教育部辭典收錄ê地號名，有「三重區」（Sam-tiông-khu）、「三重埔」（Sann-tîng-poo），suah無收「Suann-lîng-poo」。我寫電子批去hōo教育部。In mā凊彩kā我應應--leh就準煞。講啥mih已經有收錄「Sam-tiông-khu」kah「Sann-tîng-poo」tsit兩个--ah，我就講雖bóng iáu有leh講「Suann-lîng-poo」ê人數可能m̄是大多數，m̄-koh tsit个議題bē-tàng凊彩處理，in mā是無leh要意。
是講，lán有leh講台語ê人，若準講lóng beh等政府起磅lán tsiah beh做，án-ne tsua̋nn免做！所致，in iáu未回批hōo--我ê時，我就已經決定，beh kā「Suann-lîng-poo」tsiânn做我對外聯絡ê地號名。Lán一般leh留地址ê時，除了地址iáu-koh有郵遞區號，he tsiânn清楚是佗一个鄉鎮市區，án-ne，送批ê人就ē-tàng知影he是啥mih所在。
所致，我期待所有ê朋友，ē-tàng kā「Suann-lîng-poo」tsit个地號名tsiânn做阮「Suann-lîng-poo」地區ê一个特色，kah其他所在無仝ê特色，當然，你若講「Sam-tiông-tshī」iah「Sann-tîng-poo」，我就知影你mā是台灣人。M̄-koh，我若聽著你講「Suann-lîng-poo」ê時，我就ē kā你當做是lán家己人。
