作者：巫素宜
山豬是一个tih-beh 80歲、siùnn豬ê老人，我ài叫伊阿兄，因為伊叫阮阿爸阿叔。伊三不五時lóng ē來載阮阿爸出去ûn-ûn--leh，阮阿爸mā siùnn豬，m̄-koh阮阿爸大伊一紀年，已經90歲--ah！
Tsit工，山豬兄koh來--ah！下早仔9點外，講beh載阮阿爸出去lau-lau--leh。阮tsia-ê序細想講tse是tsiânn sù常ê代誌，mā無ke問。就án-ne，食中晝ê時間到--ah，目睭金金siòng，iáu是無看著人影，想講有tang時仔，tsit个阿兄載阿爸出--去，ē tshuā阿爸去食中晝了後tsiah tńg--來，小等--一-下食飽應該就載伊tńg來歇晝--ah。
下晡，to已經過睏晝ê時間--ah，in iáu無tńg--來。山豬兄到底是kā阿爸載去佗位--leh？心內想講等--一-下in就tńg--來--ah，所以mā無khà電話hōo山豬兄。目一nih，ài來去煮暗頓--ah，應該暗頓時間就tńg--來--ah，啥人知影，飯菜煮好，人iáu是無tńg--來。看m̄是勢，mā是ài khà電話kā山豬兄問看māi。
「Uê！山豬兄，lín tsit-má tī佗位？」
山豬兄講：「Ooh，阮tsit-má tī屏東tsiah beh tsiūnn交流道niā-niā。」
阮心內隨huah：「啥mi̍h？Kám bē siunn hàm？」，m̄-koh喙--裡suah講：「好，án-ne你沓沓仔駛車，細膩--őo！」聽著in走kah tsiah-nī仔遠，阮是tsiok緊張煩惱--ê。
Tsit个beh 80歲ê人，駛車駛到屏東，kan-na來回就駛beh 700外公里，tńg來到厝m̄知ài幾點--ah。Koh再講，in駛暝車，視線khah無好，實在是m̄知tsit个老歲仔leh想啥？等到暗時10點，in總算是平安tńg來到厝。原本阮心內koh想講kám ē有啥mih人載--in，m̄是hiah-nī老ê山豬兄駛車，結果真正有第三个人，是山豬兄ê一个好朋友，施--a，仝款老歲仔一个。平安到厝上重要，阮緊提藥仔hōo阿爸食，洗tn̄g歇睏。
隔tńg工，聽阿爸講in三个人做伙去鵝鑾鼻tshit-thô ê故事，hōo人聽著受氣koh愛笑。In真正是講行就行，lóng無leh計畫，時到時擔當，無米tsiah煮番薯湯。路beh按怎行to m̄知，就án-ne gōng-gōng仔一直駛，先駛起去高速公路一號。施--a講：「無，lán來去台北？」駛車ê山豬據在伊駛，無leh tshap施--a，到嘉義了後，坐車ê兩个人擋bē tiâu--ah，kā山豬問講：「到底是beh去佗位--lah？」
山豬兄講：「Beh載lín去賣掉。」
「啥人beh買tsiah-nī老ê老歲仔？夯枷！」三个人開始答喙鼓。
落尾，山豬兄tsiah講：「Beh載lín來去鵝鑾鼻--lah！」
施--a講：「Beh去鵝鑾鼻m̄就ài走高速公路三號。」
山豬兄講：「M̄ khah早講--leh，tsit-má tsiah講！」
阿爸講：「你kan-na kho̍k-kho̍k一直駛，a̍h m̄講beh去佗，人哪ē知？」就án-ne，in換駛高速公路三號，去東山休息站食中晝。食飽了後，三个老人suah揣無車停tī佗位，揣規半晡，兩个人開始坐tī樹仔跤歇睏，賰山豬家己一个人sì-kè揣伊ê車。
山豬兄講：「Lín lóng m̄ tàu揣！」
「Ē記得停tī頭前tsia--啊！」來來回回行幾若tsuā，就是揣無。
我聽in講到tsia，實在是心驚驚——tsit三个老人是按怎tńg--來--ê？
In koh揣半點鐘了後，原來車是停tī kah in記持顛倒píng ê方向，總算是揣--著--ah。
In ê冒險koh繼續，高速公路三號走到尾，落交流道了後，就ná駛ná問人：「燈塔按怎去？」
阿爸kā山豬講：「你bē-hiáu用tshuā路機？免驚摸無路。」
山豬講：「免--lah！我bē-hiáu用he，路生tī喙--裡，問就有--ah！」就án-ne，in沿路駛沿路問，到鵝鑾鼻ê時tsūn，已經下晡3點外。In lóng當做山豬是leh滾sńg笑，哪ē知真正來到鵝鑾鼻--ah。
山豬講伊進前bat行過鵝鑾鼻步道，m̄-koh hit擺伊行bē出--來，險險仔無--去，是問--人，人tsiah tshuā伊行--出-來。伊m̄信伊家己hiah-nī kha-sau，ē行bē出--來，所以beh koh來行--一-遍。
「Tsit-tsūn已經beh 4點--ah--neh，我無愛行，beh去你家己去！」
「痟--ê，tsit个時間去行，行--出-來天偌暗--ah，你kám知？」
阿爸kah施--a lóng無愛去行，落尾，山豬就家己去行。無偌久，山豬mā行--tńg-來--ah，當然tsit擺mā是無法度行透，意思意思行--一-下niā-niā。
Án-ne甘願beh來tńg--ah，山豬沿路ná駛ná揣路，無細膩駛過頭，結果駛m̄-tio̍h交流道，駛--起-去tsiah發現無油--ah，緊koh駛到後一个交流道，駛落來揣加油站。Honnh，真正是「墓仔埔放炮——驚死人」。Leh揣加油站ê時，施--a一直huah腹肚iau，hit个所在有夠偏僻，連一間店to無，in三个就去七kám仔店食泡麵，算是tsiânn特別ê經驗。
阿爸leh講tsit段冒險hōo阮聽ê時tsūn，逐家lóng笑kah歪腰。M̄-koh tse是平安倒tńg--來，聽--起-來tsiah ē感覺好笑，若是有佗位失覺察，逐家就beh哭無目屎--looh！
Tsit三隻老豬，實在是gōng膽，駛超過12點鐘，700外公里，三个人加--起-來歲數tih-beh 250歲--ah！雖然講是tsiânn佩服山豬兄講行就行，活tī當下ê精神，少年人koh無伊tsit款kioh-siàu--leh。
M̄-koh，駛車是tsiânn損神ê代誌，iáu是ài khah細膩--leh，新聞tiānn-tiānn leh放送老大人駛車反應慢，發生事故ê交通案件。人講：「細膩無蝕本」，建議tsit三隻老豬後擺坐火車tshit-thô khah實在--lah！
