「台語就是台語」連署文：
2019年，「國家語言發展法」正式公布，tse是一phō確保台灣多元語言文化共榮並存ê重要法規。M̄-koh，tsit phō法並無明確列出國家語言ê名稱，致使各政府單位執行ê時欠缺明確憑據，造成困擾。
2022年，行政院發布一份公文，明確列出台灣各語言ê「建議使用名稱」。Tse是根據七萬份問卷調查koh考慮多方意見ê結果，上尾推薦「臺灣台語」tsit个名稱。M̄-koh，因為tsit份公文ê用語是「建議」，並無明確規定ê法令，教育部就表示，科目名稱kah教育部相關成果，lóng無法度照tsit份公文kā「閩南語」正名做「台語」。
阮需要強調，「閩南語」是一个學術名詞，包含真濟無仝ê語言，無法度準確指稱台語；而且，tsit个名稱tī過去hōo政治勢力利用來壓制台語，有帶壓迫族群ê歷史記憶；「名從主人」，講台語ê族群久年來lóng叫tsit个語言做「台語」，過去hōo人強制改名，tsit-má阮有權利、mā有必要kā阮ê名揣倒tńg--來。
因為án-ne，阮懇請文化部擔責任，正式訂定台語ê語言名稱，hōo各部會，尤其是主管國民教育ê教育部，ē-tàng依法行政、隨來配合。Tse m̄-nā是對台語族群ê尊重，mā是對台灣歷史正義ê復原，是轉型正義中bē-sái欠缺ê一塊鬥圖。
共同發起單位：李江却台語文教基金會、台灣母語聯盟、台灣台語路協會
#台文通訊BONG報 364期，2024年7月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
