主講／林大米（Podcast「米米之音」主持人）
吳秀娟、馬愛雲（「台灣生態飲食設計中心」共同發起人）
記錄／顏郁珊
「米米之音」是一个農村廣播節目，自2015年開播。主持人林大米當初辭頭路、搬去宜蘭，決定家己製作網路廣播，beh做「農民生活聲音紀錄者」。大米行踏全台灣，分享農業議題，記錄作穡人ê生活kap種作理念；ǹg望透過節目，走揣農村hām農業ê價值。Tsit篇是2021/11/7節目ê文字記錄，雜誌設「農民食堂」專欄kā刊出。
米米之音
Tsit集ê節目內容ē-sái tī tsia收聽：
「生態島物產讀書會」是由台灣生態飲食設計中心ê吳秀娟老師kap馬愛雲老師（小馬老師）所舉辦--ê，兩個月ē舉辦一擺，今年來到第三場。Tsit个特別ê讀冊會是beh讀啥mi̍h--leh？今仔日主持人邀請著兩位讀冊會ê創辦人來kā lán分享in對生態教育kap生態總鋪ê看法。
Ē有tsit个生態飲食計畫kap讀冊會，上主要是因為創辦人之一——自2017年就開始sak環境教育，用環境議題ê角度進入學校來推動ê秀娟老師——伊想beh kā環境教育囥入去囡仔ê公民運動，koh beh加入料理、美學ê合作。Tse就需要有市場經驗kap煮食、美感專長ê小馬老師來kā tàu幫贊。秀娟老師ê專長是公民運動、小馬老師ê專長是食si̍t研究，ē-sái講in兩位ê合作實在是真拄好。比論講hōo囡仔ê野生植物環島教育：野生植物ê味對囡仔來講tsiok有挑戰性，lán ài先hōo囡仔知影食材背後ê故事，koh來in tsiah ē了解ài kā土地守護--起-來，án-ne其他物種tsiah ē-tàng活--落-來。Tī環島ê過程當中，囡仔自然ē知影大自然延續ê重要。M̄-nā是料理niā-niā，koh有美學ê培養。
Tse就是lán leh講ê食農教育。M̄-koh lán以早講ê食農教育是無包括美感培養--ê，兩位老師要意--ê是公共關係kap美學ê牽連。Lán kap自然倚khah近ê時，生活就有色彩，土地kap人是互相幫助--ê。Tuì tsit个概念來講，「食」tsit項代誌是tsiok有成就感--ê，lán應該kā生態、幸福食倒tńg--來。
Koh來，討論--著--ê是生態農友kap生態總舖。生態農友是用作穡kap in ê農作物來守護台灣土地；生態總舖是kā農友ê心變做料理，hōo lán食著土地ê愛。所以講農友是主角，總舖是配角。M̄管lán是農友、總舖iah是食ê人，lóng ē-tàng tī食ê過程當中發覺著自我價值，知影家己ê義務。
「生態島讀書會」是啥mi̍h--leh？頭起先，農民kap漁民ē先來分享in ê物產背後ê耕作故事，了後，總舖mā ē講in ê想法。自án-ne，總舖變做學生beh來料理tsia-ê食材。了解食材，就ē建立信任關係。透過信任kap信念來sio-kīng。生態總舖ē-tàng kā全世界變做台灣，mā ē-tàng kā台灣變做全世界。頭一句是講只要總舖了解台灣ê食材，就有法度用各種ê手路料理；後尾句是文化ê層次，台灣kap別个國家ê精神ē-tàng是sio通--ê——就算講是看--起-來無仝ê料理，伊背後ê文化發展mā是有sio仝ê所在。
馬老師講，lán世界ê食si̍t其實就是生態食si̍t，生態食si̍t ê重點是新鮮、保存。全世界各地發展出無仝ê「保存史、新鮮史」，koh來，有節日、感情ê記憶加入，就án-ne所有ê mi̍h件自然kap食si̍t牽牽做伙--ah。
Tsit款對生態總舖kap食si̍t計畫ê堅持，到底是uì佗位來--ê？兩位老師講，農業tsiah是建國ê基礎，lán ài tiānn-tiānn問家己：「我kám有好好仔對待lán ê土地？」有好ê土地，tsiah有好ê食mi̍h、tsiah有健康ê人。所以講土地是人ê根，koh-khah是國家ê根。Tse就是in ê信念，mā是台灣人ài共同拍拚ê課題。
