作者：吳孟儒 （作者是翻譯學碩士、tng-leh讀語言社會學博士班）
《人間失格》tsit本日本經典，今年台文版beh拚出版，tng-leh改kah無暝無日〔1〕。其他先mài講，日語人名若無漢字beh按怎翻，就已經十喙九kha-tshng。
台灣國內翻譯文學是翻做華語上濟，翻譯手路無定ē-tàng提來參考看māi。華語若拄著英、法、德、西tsit類羅馬字語言，一般是用漢字來鬥倚音，比如《Harry Potter》翻做《哈利波特》。一寡tiānn看--著ê人名翻法已經大概固定--落-來，像Bill一般台灣華語翻做『比爾』，Mary慣勢翻做『瑪麗』。除了考慮呼音有倚--無，mā ē盡量揀字來表現人物ê性別、性癖。譬論講，人名ê姓原本無男女之分，《Harry Potter》作者Rowling tsit个姓suah翻做『羅琳』（m̄是『羅凌』），就是刁工用玉字爿tsit字「琳」來暗示tse查某名。
華語譯名ē用得借漢字來sńg倚音，台語當然mā ē-sái。《都柏林人》kā Eveline tse名翻做「依芙蓮」（I-hû-liân），mā是用花草當做性別符號來kā讀者點tuh tse角色是女兒身，koh附台羅點醒讀者tse台語名，m̄-thang用華語唸。
若án-ne，日翻台拄著人名m̄是全漢字--ê，無定mā ē用得照án-ne處理。比如講《人間失格》有一个苦命查某人叫做「ヨシ子」，日語羅馬拼音寫做Yoshiko。若beh鬥倚音漢字，翻做「姚思珂」（Iô-su-kho）tsit个漢字名，三字呼音算有sio倚，用字mā看ē出是查某名。M̄-koh，故事內底叫「〇〇子」ê女性角色幾若个，「ツネ子」、「シヅ子」、「シゲ子」，kám講lóng beh鬥做「〇〇珂」？
是講，英翻華人名仝音無一定ài仝字，日翻台用其他漢字來鬥應該mā無算離經。比如「シヅ子」（Shizuko）kah「シゲ子」（Shigeko）tsit對母女ē-tàng翻做「史慈苦」（Sú-tsû-khóo）佮「史藝孤」（Sú-gē-koo），順suà暗示tse做老母--ê歹命，翁早死，tse做查某囡仔--ê iáu細漢、驚孤單。
小等--一-下。Tse日本人名若全假名，借漢字來鬥倚音是姑不而將，m̄-koh tsit字「子」明明就漢字，哪無beh直接借？M̄-koh……若借--過-來，台日漢字lām做伙，變「姚思子」，án-ne有聲冊beh叫配音員唸「Iô-su-kho」抑是「Iô-su-tsú」？
頂kuân舉ê人名，大部份lóng鬥做三字，除了原名拄仔好三个音節，台灣人名本來就單字姓kap雙字名占大面。《Gone with the Wind》tsit本1936年ê英語小說（就是後--來拍做電影，華語名號做《亂世佳人》hit齣），女主角Scarlett O'Hara華語翻做『郝思嘉』，Rhett Butler變『白瑞德』，就是姓提頭一个音、名取頭兩个音，án-ne來鬥做三字名。M̄-koh，日語小說配角tiānn-tiānn m̄是有名無姓（例：ヨシ子），就是有姓無名（例：渋田）。「ヨシ子」若翻做「姚思珂」，讀者mā有可能誤會伊姓「姚」名「思珂」。
話koh講倒tńg--來，既然是討論日翻台，參考英翻華不如參考日翻華。目前華語leh翻日本人名，仝款是漢字有thang借就盡量借，極ke是異體字改--一-下（例：「渋」改做「澀」）。M̄-koh若無漢字，日翻華一般bē揣華語漢字來tàu日語呼音，是去借仝音人名ê日語漢字來鬥。仝款是借漢字，日翻華是借日語ê仝音漢字，m̄是借漢語ê倚音漢字。
譬如講「ヨシ子」tsit个名，木馬《人間失格》華語版翻做『好子』。論真，kah「ヨシ子」仝音ê日本漢字名bē少，「好子」、「芳子」、「美子」、「佳子」lóng是。揀「好子」tsit个名，無定是tsit个角色天真可愛koh不幸hōo人欺負，譯者beh借漢字來kā讀者點tuh--一-下，暗示佳人性地「好」、「好」鬥陣。若án-ne，「ヨシ子」翻做「好子」，台語就唸做「Hó-tsú」，代誌m̄就解決--ah？
代誌當然無tsiah-nī簡單。日語leh叫--人，有一个叫法是「〇〇ちゃん」，tiānn leh看日本bàng-gà--ê lóng知，tse是khah親ê叫法，差不多就是lán台語有時ē kā「林美玉」叫做「阿玉」hit个意思。「ヨシ子」若翻做「好子」（Hó-tsú），「ヨシちゃん」m̄就變「阿好」（A-hó）a̍h是「阿好仔」（A-hó--à）？雖然台語mā有「阿好姨」、「阿好嬸」tsit類ê稱呼，m̄-koh「阿好」聽--起-來kánn-ná khah有歲，無一定ha̍h tsit个天真可愛查某囡仔ê角色。翻譯leh處理人名，m̄是kan-na看hit个人名，mā ài看hit个人名出現tī佗位、按怎用、kám有啥mih象徵，甚至有啥mih變化。
既然「好子」tsit个譯名beh鬥小名歹鬥，規氣換一个漢字名？日語內底「芳子」、「美子」kah「ヨシ子」仝音，án-ne「ヨシ子」翻做「芳子」，「ヨシちゃん」就ē用得翻做「阿芳」，聽--起-來mā bē-bái？若翻做「美子」，「ヨシちゃん」m̄管翻做「阿美」a̍h是「阿美仔」，聽--起-來lóng真有台語khuì。不而過，現此時ê台文讀者，濟濟lóng是先讀過華文版tsiah-koh來讀台文，kám bē想講：奇怪，仝一个故事，人名翻m̄-tio̍h--去，是譯者moo-hui，編輯mā目睭去hōo蜊仔肉糊--著？
《人間失格》故事內底有時叫「子」有時叫「ちゃん」ê人物koh m̄-nā一个，「シゲ子」tsit个五歲查某囡仔有時就叫「シゲちゃん」。「ヨシ子／ヨシちゃん」若翻做「美子／阿美仔」，án-ne「シゲ子／シゲちゃん」mā照仝理路翻做「成子／阿成」……m̄-tio̍h，án-ne台語讀者ē誤會tse是查埔名，翻做「慈子／阿慈」可能khah妥當？
M̄-koh，koh去看華文版，發現譯者無特別區分「シゲ子」kah「シゲちゃん」，lóng翻做「好子」，無定是因為故事內底其實語感無差hiah-nī濟，無，就是驚讀者ē誤會做兩个人。
不而過，既然原文人名無漢字，lán翻做台文kám一定ài鬥漢字？
1.編註：本文作者是《人間失格》台文版ê譯者。
（後期繼續）
