主講／Lîm Sim-an
記錄／吳宛霖
今仔日ê講者是「芋圓台語字典」app開發人Lîm Sim-an，藝名芋圓，伊對語言研究kài有趣味。「芋圓台語字典」是真受歡迎ê台語字典app，thang用華語揣台語詞。Tsit个app m̄-nā是一个字典，若想beh考台語認證，mā ē-tàng透過伊來學習羅馬字、做筆記、複習。今仔日Lîm Sim-an beh來分享伊是按怎beh學台語文，koh有伊開發芋圓台語字典ê動機。
Kā台語khioh--tńg-來ê心路歷程
Lîm Sim-an細漢ê時tsūn，逐禮拜lóng ē tuè爸母去阿公阿媽in兜，tī hia ná食飯ná講台語。M̄-koh，in規家伙仔搬來台北了後，台語環境變少，伊就愈來愈bē-hiáu講，kiōng-beh失去講台語ê能力。Suà--來伊高中畢業，去日本讀早稻田大學，大學畢業了後，koh tī日本食頭路三冬，kah日本人有真濟交流。
Lîm Sim-an發現，日本人便若聽著台灣，十个有九个lóng kah意九份仔，koh bat有日本人問伊「台灣駛車去中國ài偌久？」Tsia-ê代誌顯示日本人對台灣無理解。Koh有日本人問：「台灣人哪ē是講中國話？M̄是講台灣話？」Tsit句話hōo伊受著tsiânn大ê刺激，想起阿媽tiānn講ê一句話：「你是台灣囡仔，哪ē bē-hiáu講台灣話？」對Lîm Sim-an來講，台語是親切ê母語，就án-ne決定beh kā台語khioh--tńg-來，開始學台文。
台文ê重要性
Lîm Sim-an學台語是uì羅馬字開始，ē-hiáu羅馬字了後，看羅馬字就知影一个詞ài按怎讀，發音mā tuè leh進步。後--來，伊bat ê詞彙甚至比in阿母koh-khah濟。有一擺，Lîm Sim-an發現in阿母m̄知「海翁」是啥，hōo伊ke tsiok有自信。學台文ê過程中，Lîm Sim-an mā開始接觸台灣歷史，伊發現台灣tī一百年前就leh用台文寫字，除了寫文學，koh有記錄醫學。
Lîm Sim-an表示，語言m̄-nā是中性ê mi̍h件、溝通ê工具，後壁koh有思想kah意識形態。伊說明，台灣ê華語是過去國民政府tī中國做主體ê背景下去推廣--ê，kah台灣無tī代，是為著beh kā台灣「中國化」，透過華語來培養台灣人ê中國意識。相對來講，台語雖然是uì漳州、泉州傳--來ê語言，m̄-koh經過百年來ê演變、透lām，已經tsiânn做在地ê語言，變做lán tsit-má講ê台語。台語tī台灣各地ê無仝腔口，就是台語在地化ê證明〔1〕。
Lîm Sim-an本來對台語無hiah-nī有感覺，讀台灣歷史了後，suah對tsit塊土地ê感情愈來愈深，因為知影tsit塊土地發生啥mih代誌，所以講台語、寫台文是Lîm Sim-an對家己身份認同ê呈現。Lîm Sim-an koh講，台灣人應該有用家己ê母語受教育ê權利，án-ne tsiah ē-tàng達到語言平權。
創作芋圓字典ê動機、過程kah心得
Lîm Sim-an開始想beh tshui-sak台語文，mā leh思考家己對啥mi̍h有興趣。伊ē-hiáu日文、英文、台文，加上有tī AppWorks School〔2〕學寫程式開發app，就想beh做kah台語文相關ê app。其實，伊tī AppWorks School ê畢業專案就是一个台語文學習app，叫做「Formolingo」。Tsit个app記錄in阿媽ê聲音kah腔口，算是「芋圓台語字典」ê前身。
「Formolingo」製作時間kan-na短短五禮拜，koh kan-na伊一个人做，因為有hit時ê經驗，Lîm Sim-an tsiah有信心進一步做出「芋圓台語字典」。是按怎決定beh做app？Lîm Sim-an講，每一个人逐工lóng ē用手機仔，若是手機仔內有一个台語文學習ê app，就ē-tàng hōo台文學--起-來方便、簡單。
上尾，Lîm Sim-an講，一般學生感覺學台語無路用，無法度用台語揣頭路，m̄-koh伊kā「芋圓台語字典」做--出-來了後ē-tàng營利，mā有市場，tse證明學台語是有路用--ê。目前「芋圓台語字典」kan-na有iOS版，未來mā有按算beh出Android版，Lîm Sim-an希望透過科技、設計kah社群媒體宣傳，hōo koh-khah濟人知影台語文，kā台語文ê市場愈做愈大，最後tsiânn做台灣語言ê Duolingo〔3〕。
