台文通訊BONG報: 生產再發現 ——台灣女性為啥mi̍h無法度安心生囝？

主講／諶淑婷

記錄／吳玉祥

本文是2023/5/10 ê講座摘要記錄，主講者諶淑婷是生育改革行動聯盟ê理事長。

台語sa攏有 - YouTube 頻道

今仔日ê講座邀請諶淑婷kap逐家分享有關推動「溫柔生產」ê議題。是按怎lán台灣查某人生囝ē tsiah-nī仔艱苦，生囝對查某人來講是改變規个人生ê大代誌，m̄-nā是生囝ê過程、tshuā囝、教囝ê問題，lóng是查某人真大ê挑戰。

Lán tiānn-tiānn聽新聞leh講，少年人ná來ná無愛生囝；新聞koh講，少年人khang-khuè濟、月給少、厝買bē起，所以無法度結婚、無想beh結婚、m̄敢結婚。Lán來看政府ê統計，未婚ê人數是直直tshìng-kuân，未婚男ê比例phīng未婚女ê比例koh-khah kuân。另外，初婚ê平均年紀，查某、查埔分別是30 kap 32。女性生頭tsiūnn仔ê平均年紀是31歲。

真濟人lóng想講，上理想ê家庭就是ài有兩个囡仔，m̄-koh現實上，現時tī台灣平均tshé，一个家庭tsiah kan-na生1.1个囡仔，囡仔ê生育率tī全世界排上尾名；上主要ê原因就是uànn結婚，按2019年開始，35歲以上ê產婦就已經超過30%（tī 1980年iáu無到2%），in若準koh beh生第二胎tio̍h ke真忝頭，甚至無法度koh生。Tse是台灣目前ê狀況。

生育率低，beh鼓勵生產，應該ài對產婦khah好款待--leh tsiah tio̍h，m̄-koh產婦suah感覺入產房kánn-ná工廠進料，醫生ná生產線ê技術工，製程lóng照in認定ê SOP行，被迫ê自費檢查、強力ê醫療介入，無感受著友善ê對待kap真正ê關懷。接生過程中無必要ê醫療介入，自早就變做台灣醫界ê常規，破腹生產、灌腸、剃毛、禁食、吊大筒、人工破水、心音監測、鉸陰門等等lóng是；當然醫生mā有in ê理由，母囝平安、醫病糾紛、跤手無夠……。

2011年，台大醫學系婦產科李建南教授開始做本土友善生產研究，有十間醫療院所、1,500外个產婦參與。參與問卷ê大多數婦產科醫生，lóng同意ē-tàng取消iah是調整一寡醫療介入；另外就是，雖然有經過教育指導，醫護人員ê作業習慣iáu是無法度全面改變。

Tī日本時代引入包括產婆訓練等ê現代醫學智識kap教育進前，台灣iáu無專業ê產婆，產婆並無現代醫學智識kap衛生觀念，接生是靠經驗、舊例、迷信，所以產婦、囡仔ê死亡率lóng真kuân。到kah 1907年總督府制定《助產婦講習生規程》來培養助產婦了後，台灣ê生產tsiah開始換新式ê產婆來接手。1927年，台灣頭一个女醫生蔡阿信成立「清信醫院產婆講習所」；1943年，總督府制定《助產士法》。

一直到戰後，m̄管是去助產所iah是tī厝--裡，生囝lóng mā是揣助產士。到kah 1962年，助產士ê接生率iáu-koh有86%。1964年起，台灣實施家庭計畫，鼓勵女性安裝子宮內避孕器，規定kan-na醫生tsiah ē-tàng安裝tsit種侵略式ê醫療器材，結果五冬內去安裝ê人超過63萬个，mā沓沓仔確立「產科醫師看顧婦女健康」ê地位。八冬後（1972年），醫生接生率就開始超過助產士。Koh來1991年政府全面取消助產教育，suà--來1992年取消公立病院助產士ê編制，就án-ne，lán台灣助產士ê接生率變做世界上尾名。

一直到1994年，大約有200个助產士向政府抗議了後，tsiah爭取著健保局簽約，kā in hông搶--去ê工作權討倒tńg--來，助產所（midwifery clinic）koh再開業。1999年，政府取消違法ê行政命令，消失八冬ê助產教育死後koh活，輔英科技大學助產系（1999年）、台北護理健康大學護理助產研究所（2000年）kap助產及婦女健康照護系（2016年），分別來成立。2003年，為beh提升助產專業，《助產士法》修改做《助產人員法》，除了「助產士」以外，koh增設「助產師」，確立助產人員ê法律定位。

照世界衛生組織ê建議，生囝ê方式是ē-sái討論--ê，tī無仝國家有無仝ê生囝方法。Tī美國、丹麥、荷蘭、英國、紐西蘭、日本等國家，你ē-tàng揀kah意、放心ê所在，看是beh tī厝--裡、生產中心、助產所iah是病院生產，lóng照你ê意思；生產過程有助產士贊手，陪產者mā ē-sái陪伴tī身邊參與規个生產過程。

請教逐家，若準是你beh生囝，你kám有想beh tī佗位生？Kám有想beh按怎生？2000年，台灣ê破腹生產率34.47%，全世界排第三。經過2011年友善生產研究發表、2015年台灣生育改革行動聯盟開始推動生產模式改革。到2023年，破腹生產率仝款占三成（30%至35%），改革ê跤步kám真正hiah-nī慢鈍，是醫療習慣oh改？是社會觀念oh改？Iah是lán無大聲講出lán ê想法？

台灣查某人beh按怎生囝？生囝kám tio̍h-ài照傳統án-ne？囡仔是按怎出--來--ê？有關生產，其實有無仝款ê路thang好選擇。台灣生育改革行動聯盟主張，lán ài尊重女性生囝iah是m̄生囝ê意願；beh生囝--ê，lán ài有充分ê資源kap照顧，mā ài有產後支持kap友善ê飼囝環境，做伙來實踐友善生產。