作者：黃偉嘉
若kā我問：hōo人問過上濟遍ê地號名是佗一个？答案就是——高雄ê「哈瑪星（Há-má-sing」）！
日本時代ê高雄火車頭，就是tī今仔日高雄輕鐵哈瑪星站ê所在，昭和16年tsiah遷到tsit-má大港（Tāi-káng）ê所在。事實上，「哈瑪星」tsit个地號名就是tuì日本話「濱線（はません、Hamasen）」來--ê，原底是leh講高雄火車頭thàng海墘ê鐵枝路，後--來轉做地號名。
哈瑪星ê範圍，在地人是按怎看--leh？林曙光（1926～2000）是高雄鹽埕出世ê作家，tī伊所寫ê《打狗滄桑》tsit本冊內底，伊將「哈瑪星」寫做「哈馬生」，認為「哈馬生」ê範圍是五福四路ê「四支頕（Sì-ki-tàm，就是平交道）」以西，包括日本時代ê壽町、湊町、新濱町，tsit三町是日本時代tsiah thūn海造--出-來ê新生地。甚至日本時代ê日本人也接受台灣人ê稱呼，tuè leh kā規个新生地稱做「Há-má-sing」。
總--是，逐家來問--ê，是日本話ê Hamasen，是按怎ē tsiânn做台語ê Há-má-sing--leh？
原底阮也無答案。一直到後--來執行文化部國家鐵道博物館籌備處ê計畫，訪問著一位昭和2年出世ê佳里糖廠司機葉永星先生。伊講伊少年ê時tsūn，bat tī哈瑪星ê郵便局上班--過。Tī伊ê發音當中，哈瑪星是讀做「Há-má-sian」！
Án-ne看--起-來，日本時代是「Há-má-sing、Há-má-sian」兩種發音lóng有。後--來「Há-má-sing」khah優勢，加上戰後hōo人寫做「哈馬生」、「哈瑪星」，到tann高雄市民lóng án-ne發音--ah。
最後，是按怎ē揀「哈」、「瑪」、「星」tsit三个字來做「Há-má-sing」ê漢字--leh？根據高雄市政府文化局《哈瑪星的文化故事》tsit本冊訪問耆老ê結果，in是認為tse kap史艷文布袋戲有關係。原來是當中有一个角色「二齒（Jī-khí）」，逐kái一開喙就是先發出「hā-be」ê音tsiah suà落去講話，電視字幕是用「哈瑪」兩字。尾--à當地人就用「哈瑪」koh鬥一字「星」，發明「哈瑪星」ê寫法，一直用到今仔日。
（特別感謝陳坤毅先生提供文獻資料，作者是「地圖與多媒體研究室」研究員。）
編按：漢羅用字有調整，原文是全漢。全漢版ē囥tī雜誌網站，hōo讀者做參考、對照。
專欄簡介：有人講「台語無字」。事實上台語一直lóng有字，自以早就用漢字來寫lán ê地號名。但是因為借字、借音、走音、腔口差、連音等等各種ê變化，一寡地號名suah hām漢字鬥bē起--來。若到一个生份ê所在，tiānn-tiānn是一開喙讀地號名，就hông隨知影是外地人。台大地理系「地圖與多媒體研究室」一直以來，投入地圖製作、地理教育、地名研究。Tuì 2019年開始，執行教育部「以本土語言標注臺灣地名計畫」，成果已經用tī改善台鐵、捷運ê放送。Tuì tsit月日開始，「地圖與多媒體研究室」逐個月ē tuì台語ê角度，tī雜誌介紹一个地號名，後擺若是坐車、駛車經過，拄好tn̄g--著，一定ē koh-khah疼惜lán tsit塊土地ê大細項代誌！
以本土語言標注臺灣地名計畫 https://reurl.cc/XjozaR
---------------------
全漢版
若共我問：予人問過上濟遍的地號名是佗一个？答案就是——高雄的「哈瑪星（Há-má-sing」）！
日本時代的高雄火車頭，就是佇今仔日高雄輕鐵哈瑪星站的所在，昭和16年才遷到這馬大港（Tāi-káng）的所在。事實上，「哈瑪星」這个地號名就是對日本話「濱線（はません、Hamasen）」來的，原底是咧講高雄火車頭迵海墘的鐵枝路，後來轉做地號名。
哈瑪星的範圍，在地人是按怎看咧？林曙光（1926～2000）是高雄鹽埕出世的作家，佇伊所寫的《打狗倉桑》這本冊內底，伊將「哈瑪星」寫做「哈馬生」，認為「哈馬生」的範圍是五福四路的「四支頕（Sì-ki-tàm，就是平交道）」以西，包括日本時代的壽町、湊町、新濱町，這三町是日本時代才坉海造出來的新生地。甚至日本時代的日本人也接受台灣人的稱呼，綴咧共規个新生地稱做「Há-má-sing」。
總是，逐家來問的，是日本話的Hamasen，是按怎會成做台語的Há-má-sing--leh？
原底阮也無答案。一直到後來執行文化部國家鐵道博物館籌備處的計畫，訪問著一位昭和2年出世的佳里糖廠司機葉永星先生。伊講伊少年的時陣，捌佇哈瑪星的郵便局上班過。佇伊的發音當中，哈瑪星是讀做「Há-má-sian」！
按呢看起來，日本時代是「Há-má-sing、Há-má-sian」兩種發音攏有。後來「Há-má-sing」較優勢，加上戰後予人寫做「哈馬生」、「哈瑪星」，到今高雄市民攏按呢發音矣。
最後，是按怎會揀「哈」、「瑪」、「星」這三个字來做「Há-má-sing」ê漢字--leh？根據高雄市政府文化局《哈瑪星的文化故事》這本冊訪問耆老的結果，in是認為這佮史艷文布袋戲有關係。原來是當中有一个角色「二齒（Jī-khí）」，逐改一開喙就是先發出「hā-be」的音才紲落去講話，電視字幕是用「哈瑪」兩字。尾仔當地人就用「哈瑪」閣鬥一字「星」，發明「哈瑪星」的寫法，一直用到今仔日。
---------------------
