作者：蔡婕馨
頭一kái坐飛行機tuì台灣本島出發到金門五工ê遊覽，到位拄好赴食晝。食飽晝，導遊宓位任kap陳炳輝博士先tshuā逐家到古寧頭〔1〕（Kán-nî-thâu）戰史館參觀。徛tī現場聽專業ê導覽，讀冊ê時tsūn課本頂kuân ê名詞，現此時明明明現tī眼前，戰爭確實無情，心肝內真感念戰地勇士ê犧牲，我tsiah ē-tàng享受寶貴ê民主自由。
Suà--落-去，去北山古洋樓，壁堵面頂一空一空是銃子粗殘ê跤跡，歷史永遠抹bē平ê空喙；心境轉換到慈湖三角堡看海鳥koh食枝仔冰，海風tsūn-tsūn，遠遠ê對面是廈門，完全無仝款ê空氣；翟山坑道是結合智慧kap一陣人流血流汗所換--來ê特殊景緻。
最後一个點安排去后湖（Āu-ôo）海埔，是sńg水ê好所在，下晡5點日頭光khah軟，一陣人tī海沙埔sńg kah親像囡仔，我有khioh著一粒花kap仔，hip相了後放伊tńg去海--裡繼續生湠。暗頓食喬安牧場ê海產麵，雖然伊ê牛肉麵kài出名，m̄-koh我無食牛；店頭家真gâu，想kah真周至，就算是無食牛，行入大門mā絕對hōo你食ē飽。
金門真特別，tsiūnn山落海差無幾分鐘就ē-tàng完成。眠眠仔睏，聽著窗外ê落雨聲，有淡薄仔煩惱，天輪bē著人主宰，就順其自然繼續睏。佳哉睏醒天就開--ah，早頓是微醺民宿提供ê金門在地點心麵線糊，口味hām台灣本島--ê無sio-siâng，配一粒饅頭koh lim一杯『拿鐵』，中式kap西式食著mā真kah喙。
第一站先參觀北門，peh樓梯起--去，有屬於金門ê萬里長城，真適合hip相。行出北門uat一个uat就到明遺老街，he街路雖然無kài長，m̄-koh經過老師ê解sueh，故事bē輸tī眼前演出。建築ê方式mā是智慧ê展現，石仔ê材質決定伊ê kuân度，燒--過--ê千萬m̄-thang倚塗跤，若無，是ē siunn濕--hannh！落番到南洋，tshia-iānn倒tńg--來--ê lóng ē起一間洋樓號家己ê名，tse mā是屬於金門ê特色。
徛tī燕南書院向海ê方向看--過-去，經過昨暝ê雨，空氣中ê細粒塗粉洗了khah清氣，金門大橋kap khah遠ê廈門比較koh-khah清楚，huah幾若冬、幾若任，選舉橋就浮，tsit板金門大橋差不多beh完成--looh〔2〕！同安（Tâng-uann）渡頭望君早歸，金門ê婦jîn人，目屎應該是phīng海水koh-khah鹹；「日軍強徵金門馬伕殉難紀念碑」，是對歷史無聲ê抗議。晝--ah！Tī記德海鮮餐廳食晝補充體力，仝款是金門在地風味餐，大碗koh滿墘。
牧馬侯祠資訊siunn濟，頭殼記無hiah濟，印象上深--ê顛倒是風調雨順，面對不足ài珍惜現此時把握ē tiâu--ê，tse就是人生。陳景蘭洋樓是一棟白色ê建築，內面掛tī壁頂--ê lóng是頭人，m̄-nā有權有勢koh有心，in ê貢獻真正是無簡單；行過車路換去行成功海防坑道，內面有真濟裝置藝術，mā真趣味。
Koh來，到浯江書院來學習朱熹ê精神，聽老師解sueh phīng家己讀kah tuh-ku iáu khah緊，tse智識絕對m̄是三冬五冬有法度粒積。最後一站經過欽旌節孝坊，tī來來去去ê車路邊，金門ê過去透lām金門ê現代化，暗頓就用tso̍k糜（tso̍k-bêr，『廣東粥』）配油tsia̍h粿來止iau，甜甜ê綠豆湯、塗豆仁湯，hōo我愈期待明仔載beh進行ê計畫——金門一條根貼布，我tshuân好--ah。
天光，7點tī民宿大廳集合，tuè炳輝博士行tuì文台寶塔ê路--裡，有經過金門高粱酒史館，hia有一窟水池仔，邊--a lóng用籬笆圍--起-來，是為著beh保護用來激酒重要ê水源，金門高粱酒ē-tàng名聲hiah-nī響，實在ài感謝葉華成先生。繼續向前行無偌久，炳輝博士雄雄停--落-來，提一片鹿仔樹ê葉仔問逐家生活中用tī啥mih所在？原來是用來印新台票ê重要紙料，m̄-nā台灣，koh有真濟國家印錢mā是揀「MIT」ê紙。
行無幾公尺就到文台寶塔，有山有海看--過-去心情做一下tsiâu輕鬆。Tńg到民宿食早頓，tso̍k糜配油tsia̍h粿kap一杯咖啡，khuì力十足準備來去太武山。心存善念行過太武山公墓，一路向前行，kuân度愈kuân看--出-去ê視線愈闊，來到250公尺kuân ê所在，看--出-去規个海岸tuì倒爿看到正爿，金門海岸ê suí lóng收入目睭印tī頭殼內，按怎證明你來--過？家己kap美景hip--一-張是上好ê方法。欣賞倒影塔了後，是太武山頂上濟人愛去hip相ê『毋忘在莒』，逐家lóng用家己上自信ê模樣hip相。
參觀海印寺內面ê安心石，每一个人姿勢差不多，倒手摸家己ê心肝、正手摸安心石，心內唸三kái「南無觀世音菩薩」，虔誠ê心上要緊。
繼續到金門歷史博物館行行看看--leh，tsiah出發去出名ê王阿婆食中晝，順suà參觀山后（Suann-āu）民俗文化村；獅山砲陣地欣賞砲操演練、金合利鋼刀、沙美（Sua-bér）老街，最後tī模範街自由行，江文章江總招待團友食蚵te，坐leh ná食ná開講，雙跤mā趁歇睏，落尾就隨人愛食啥買啥，今仔日ê行程khah硬táu，跤有khah忝，m̄-koh，價值--lah！
坐遊覽車tńg到民宿，tī大廳kā排隊美食提--出-來，bē少團友mā按算坐leh食飽tsiah tńg房間，瑤瑤美女替逐家tshuân一粒高粱酒卵、民宿主人招待金門高粱一罐。Uah！人生頭一kái lim高粱就是tī金門，tse真正是讚--lah！
一醒到天光，早頓食飽，先去參觀水頭聚落ê得月樓，he是真特別ê建築，防守禦敵ê機關真濟，有地下通道、二樓地板偵察窗，外人beh攻占m̄是簡單ê代誌。邊--a是金水國小，內面ê環境清幽，隔間真濟，其中一間展示三跤大、中、細ê皮箱，he是離鄉背井出外拍拚，落番歲月重要ê mi̍h件，內面除了té衫褲應該koh有對故鄉親人滿滿ê思念。
Se̍h kah喙ta喉khuah，點一杯特別ê蔣介石牛奶茶kap高粱酒咖啡試滋味，確實真特別。離開了後就準備坐船過小金門，m̄免20分鐘就到--ah。落船ê所在，民宿ê頭家已經駛車tī現場等beh載阮ê行李，阮只要過車路就ē-tàng入去烈嶼（Le̍h-sīr）遊客中心邊--a行九宮坑道，行一輾出--來拄好赴去餐廳食中晝頓。Tī小金門ê第一頓，芋仔料理是一定有--ê，其中一項kā芋仔處理kah親像雞絲麵hiah幼，食ê時tsūn ài家己用滸苔（hóo-thî）片展工夫捲做手捲，口感真特殊，一大盤lóng hōo阮掃了了。
離開餐廳，阮去媽祖廟、金門區漁會生鮮超市烈嶼店買暗時beh食ê點心，koh來阮就按勇士堡行--入-去，tuì鐵漢堡出--來，一路行行停停真趣味。Koh來，換去后麟營區體驗阿兵哥ê穿插kap拍靶（phah-pé），攑銃體驗對觀光客來講是趣味，對徛第一線ê國軍來講是責任，無簡單。離開營區就坐九人座--ê到小金門ê民宿過暝。今仔日ê暗頓真特別，一陣人散步到海邊吹海風、看日落、食暗頓，hi-hi-hua-hua有講有笑，一直到對面ê廈門五彩ê燈光tshiō tī海面ê光影閃閃爍，阮iáu m̄願離開。
小金門ê吉祥物是風雞（huang-kue），hām大金門ê風獅爺無仝款，妝thānn路燈--ê mā是風雞。最後決定tńg民宿洗掉規身軀黏thi-thi ê ak-tsak tsiah-koh繼續開講練痟話，團友互相分享友情牌ê紅酒、麥仔酒、四秀仔，tse mā是人生另外一種ê快樂。
行程來到第五工，透早6點起床，把握時間緊去民宿附近行行看看--leh，拄著頭家tī菜園仔沃菜、頭家娘挽菜豆kap苦瓜，已經leh秤重，應該有人注文--去--ah，台灣人拍拚ê精神，本島、離島仝款，靠雙手認真過生活。
行一輾tńg來民宿食早頓，落尾就出發去湖井頭（Ôo-tsínn-thâu）戰史館、義女廟、秀才厝、雙口海濱公園、砂溪堡行砂溪坑道、八達樓子，食飽晝坐船tńg大金門看郵票ê主角莒光樓，雖然leh翻修無開放，m̄-koh一陣人mā是看kah真歡喜，當然阮mā有去鼻高粱酒ê芳味，逐項齊全，有ê酒矸根本就是藝術品。
坐tī回程ê飛行機頂，確實有忝ê感覺，m̄-koh心肝內想--ê是金門iáu有真濟所在行無透，金門大橋tsit項建設hōo人期待，我ē koh想beh揣時間去金門tshit-thô。五工ê金門遊結束--ah，我深深體會著遊山玩水除了時間、金錢，koh-khah需要體力kap一雙ē行ē走ê跤。
