主講／顏綠芬
記錄／李 維
Tsit擺講座邀請顏綠芬博士tshuā lán來認bat台灣ê音樂文化。顏綠芬講，差不多30年前，揣無台灣本土文化ê書，你若講beh來研究、整理kah出版，liam-mi ē hōo人應講：台灣kám有文化、歷史？甚至ē講台灣kan-na「區域史」。Tse完全是烏龍se̍h桌，刁意故beh打壓台灣人ê本土意識，m̄-koh「千年田地八百主」，經過前輩ê拍拚，tsit-má愈來愈濟人leh關心台灣ê本土文化，mā leh走揣lán台灣家己ê故事。
講著台灣ê音樂文化，ài先uì學生仔ê認bat開始。Tsit-má台灣ê音樂課本包山包海，除了基本ê樂理智識，音樂歷史有西洋--ê、中國--ê、世界--ê lóng有。歌曲有民歌、藝術歌曲kah流行歌，來源豐富，除了華語、台語、客語、原住民族語以外，koh有外語歌曲，總算--起-來，lán家己國家ê音樂suah無全部ê十分之一。
因為目前社會環境無啥關心文化類ê課程（音樂、美術等)，hōo台灣人到tann lóng無啥了解家己國家ê音樂文化。多元文化ê認bat當然tsiânn重要，m̄-koh「想beh學飛ài先學行」，家己本土ê音樂tio̍h-ài先學習、熟sāi，培養lán家己ê文化認同、對lán家己ê文化感覺驕傲，tsiah來認bat其他國家ê音樂文化。
若是beh介紹lán台灣ê音樂文化，ài uì台灣社會開始講起，除了原住民族豐富ê音樂文化，台灣koh有福建、廣東移民帶--來ê「戲曲」（北管、南管），koh有in透過生活經驗、傳承--落-來ê「民謠」，荷蘭、西班牙傳教士傳--來ê「聖詩」，hām日本人留--落-來--ê、hit當時ê「流行音樂」。
民謠
顏綠芬說明，民謠是講用hit个族群ê語言，喙傳喙、耳傳耳，通常內容簡單、kah生活經驗結合，ē-tàng反應當時人民ê生活情感，像原住民ê khang-khuè歌、祭典歌、婚禮歌，漢語系族群ê作穡歌、sio褒歌、唸歌ê江湖調等等。其中上出名--ê就是陳達ê恆春民謠〈思想起〉，是移民吸收傳統ê音樂，tī在地蹛久--來創作ê音樂，充滿台灣特色。
聖詩
清國簽《天津條約》了後，台灣ê淡水港、打狗港開港通商，開始有西方人來貿易kah傳教。台灣uì hit時接觸傳教士帶--來ê西方音樂，初初時以教會聖詩為主。西方音樂ê系統包含五線譜、樂理、和聲（hô-siann）ê音樂，koh有合唱團ê表現方式、鋼琴、風琴ê學習。Hit時ê西方音樂，上kài重要--ê是使用白話字，hōo漢人ē-sái快bat字、讀聖經，mā自án-ne留一寡重要ê歷史資料落--來。
流行音樂ê出現
顏綠芬表示，lán leh講ê流行歌，是指20世紀透過大眾媒體（唱片、廣播、電視、網路等）傳播ê音樂，ha̍h民眾口味ê商業創作。流行歌ē-sái反應社會、時代，以愛情題材為主，產量大，m̄-koh kan-na經典ē留--落-來。
台灣頭一改大流行ê歌曲，是古倫美亞（Khoo-lóng-bí-iah）唱片公司發行ê電影宣傳仝名曲〈桃花泣血記〉，七字做一句，四句做一pha，tī形式上是延續唸歌iah是歌仔戲「七字仔」ê傳統。經過故事慢慢推展，沓沓仔講出男女主角tī hit時ê傳統規範之下，所受--著ê壓力kah犧牲。一首歌唱--來，親像電影tī目睭前leh搬，hōo聽者除了欣賞傳統音樂，koh同齊tuè故事ê情緒起起落落；又koh因為是西洋ê樂器伴奏，音樂編曲效果無仝，唱法mā kah傳統戲曲有tsiânn大ê精差，hōo hit時ê人一種全新ê體驗，莫怪tshìng到規台灣，唱片賣kah hì-heh叫。
1930年代ê流行音樂
有〈桃花泣血記〉ê成功，hōo逐間唱片公司開始願意投資，發展tsit款新音樂ê製作，mā鼓勵鄧雨賢、姚讚福等受過西洋音樂訓練ê gâu人投入創作流行音樂。Tsit時流行歌壇濟濟gâu人，作詞有林清月、陳君玉、周添旺、李臨秋、陳達儒等；作曲有王雲峰、鄧雨賢、姚讚福、陳秋霖、吳成家等，歌手有林氏好、純純、愛愛、艷艷、青春美等。In有ê是民間戲班出身、有ê是音樂界、學界出身，lóng是真出tioh ê歌手。
日本皇民化時期
1937年後，日本tshui-sak皇民化運動，強迫台灣人講日本話、穿日本衫，本土語言ê歌曲、戲曲lóng hông禁，幾若間唱片公司倒擔，因為hit時kan-na ē-sái唱日語歌。鄧雨賢化名唐崎夜雨，譜寫〈郷土部隊の勇士から〉、〈蕃社の娘〉等日語歌曲。除了唱日語以外，tsit時ê歌曲若kah當時政策無ha̍h，仝款ē hông禁。
國民政府時期
戰後，國民政府為著in ê政治權力，用高壓ê方式消除日本時代統治ê痕跡，強迫改變台灣文化，無論文學、音樂、藝術，lóng ài配合國家政策。1949年呂泉生因為二二八事件造成ê傷亡太濟，心酸鬱卒，為tse寫出〈杯底不可飼金魚〉〔1〕，是希望台灣各族群ē-tàng像歌詞án-ne「朋友弟兄無議論」，坐落來kā酒lim hōo ta，杯底m̄-thang留酒，歡歡喜喜過生活，化解giâu疑kah冤仇。
當代台灣音樂
台灣自解嚴了後，各種文化活動興起，流行音樂產業發達。顏綠芬特別想beh kā逐家介紹--ê是當時為著記念九二一大地動ê傷亡，由李敏勇作詞、蕭泰然作曲，寫ê《傷痕之歌》，是kā心內ê thàng疼化做ǹg望，希望iáu tī--leh ê人ē-tàng繼續向前、面對生活。
講座上尾，顏綠芬講，台灣因為特殊ê歷史環境kah多元族群，有非常豐富ê音樂文化，uì民謠到流行音樂，有tsiok濟人用音樂記錄tsit塊土地各族群ê生活kah情感。透過認bat台灣音樂文化，培養家己ê文化認同，tsiah thang hōo阮無論徛踮世界啥mih所在，lóng ē-sái維持lán ê驕傲kah自信。
