作者：蕭聿萱
阮抽塔羅牌ê時tsūn，上驚抽著第16號牌——塔。
塔羅牌有分做正位kah反位，通常正位kah反位ê意思ē顛倒píng；譬如講第13號死神牌，正位代表死亡，看--起-來是無啥好ê牌，但是反位ê意思就完全無仝，是khah正面ê意思。Iáu-m̄-koh塔tsit張牌就真正奇怪，無論是正位iah是反位lóng bái-bái--à；單純看牌面ê圖，一群人hông關tī塔內底，m̄-koh雷就beh摃著塔--ah，唯一ê出口是頂樓ê窗仔門，in只有兩條路，跳--落-來，無，就ē hōo雷公摃hōo死；所以若是抽著tsit張牌，通常就是叫你bē-tàng躊躇，一定ài做一寡改變。
偏偏就是有人逐擺lóng ē抽著tsit張牌。
無論是問感情iah是學業，tsit張牌就是kā伊膏膏纏；我bat替伊算過半冬ê感情運勢，伊mā是抽著tsit張，我就直接講「我看你tsit半冬好好仔讀冊就好」；凡勢是已經慣勢--ah，伊mā無特別失望ê感覺，kan-na講一句：「Tsit半冬lán幾个lóng mài siàu想講beh『脫魯』--ah。」真正是有分張ê好朋友neh！
伊就是kah我uì小學到高中lóng仝間學校ê同學，名叫做鈞鈞。
無m̄-tio̍h，伊ê本名就是兩个字lóng仝款。Bat有查埔囡仔叫伊ê本名就hōo無熟sāi--伊ê人叫是講是leh叫伊ê小名，koh想講哪ē hiah-nī親密。
橫直真正是感謝鈞鈞hit句「半冬說」neh，m̄-nā半冬，我看是差不多beh兩冬ê時間，阮四个人除了我，lóng是獨身ê狀態。你就知影是為啥mi̍h飯ē-sái烏白食，話suah bē-tàng烏白講。
Tio̍h--lah，tú-tsiah我有講著「阮四个人」，意思就是講除了鈞鈞kah我，koh有兩位受害者，其中一位ê「半冬」到tsit-má iáu未結束，多謝鈞鈞ê拍拚。
受害者一號，是我kah鈞鈞ê高中同學——宜秀。M̄-koh伊ê半冬已經結束，我就來講伊ê半冬是按怎結束ê故事。
He是tī大學三年仔ê歇寒，一个拜二ê早起，阮真正是食飽siunn閒，就tī高中母校附近揣一間咖啡廳坐--leh，開始算塔羅牌。
除了感情問題以外，阮koh ē算學業問題；m̄-koh逐家上愛--ê，iáu是「半冬ê整體運勢」。
半冬整體ê運勢ài抽13張牌，tsit 13張牌分別代表感情、財運、學業、事業、人際、家庭等等。若是ē-tàng知影未來ê代誌，上好是ē-tàng全部lóng知影。逐家上愛tsit个牌型，m̄-koh我顛倒上討厭--伊，因為13張牌lóng ài解sueh實在是tsiânn費氣。
橫直宜秀就是beh算半冬ê運勢，我mā真認份開始洗牌。
塔羅牌是án-ne，ài先確定問題kah beh使用ê牌型，suà--落-來洗牌，最後hōo求問者切牌、抽牌。
我kā伊抽ê牌排hōo好勢，到tsia lóng無啥問題。
「好，開牌！」
Tī tsit工進前，tī tsit擺開牌進前，我一直m̄知影我算塔羅牌是為著啥，我叫是逐家lóng是感覺好sńg niā-niā。
我叫是我算命ê結果，bē影響著別人ê生活，mā無可能tī別人ê人生決定內底摻一跤。
「Tse是？」
代表友情ê hit个位置，出現第六號牌——戀人。
「Tse……我mā是頭擺看--著……」
阮兩个人lóng想著仝一種解sueh，就是ē有一个宜秀ê朋友變做伊ê情人。
「Kám有可能？」宜秀mā有淡薄仔懷疑。
結果證明阮是tio̍h--ê，kan-na過兩個月niā-niā，宜秀就kah阮另外一个高中同學交往--ah。恭喜宜秀ê「半冬」總算結束--lah！
受害者二號，mā是阮高中同學——愛玲，伊koh-khah悽慘，伊ê半冬uì大學拄開始一直到tann已經讀研究所--ah，lóng iáu未結束。
M̄-koh伊kah鈞鈞仝款，基本上逐擺抽牌lóng ē抽著「塔」，特別是kah感情有關係ê問題，所以應該mā bē-tàng kā錯誤lóng the卸hōo鈞鈞。
「我真正m̄敢koh抽你ê牌--lah，逐擺算，逐擺lóng bái。」
我已經bē記得tsit句話是鈞鈞iah是愛玲講--ê--ah，橫直in兩个無論是啥人講tsit句lóng感覺tsiok合理。
我一開始講--過，阮抽塔羅牌ê時tsūn，上驚抽著第16號牌——塔。
Tsit張牌就是一群人hông關tī塔內底，m̄-koh雷就beh摃著塔--ah，唯一ê出口是頂樓ê窗仔門，in只有兩條路，跳--落-來，無，就ē hōo雷公摃hōo死；所以若是抽著tsit張牌，通常就是叫你bē-tàng躊躇，一定ài做一寡改變。
「就算無算塔羅牌，時間iáu是leh走，日子iáu是ài過。」
我mā tiānn-tiānn leh想，就算我hit工無替宜秀算塔羅牌，伊kám就bē kah伊ê男朋友做伙？
Tsit件代誌阮mā無法度確認--ah。
塔羅牌，應該是一个警戒，一个提醒，無應該是一个煩惱。
我m̄知鈞鈞kah愛玲kám有做出啥mih改變，m̄-koh阮四个人一定是沓沓仔leh改變，沓沓仔變做家己心目中kah意ê hit个形。
