作者：蔡惠芬 Tshuà Huī-hun
ak--著。講到世間事未免得ē遭遇一寡歹liú-la̍k ê代誌，一般人ê心態，ǹg望ē-tàng拄著貴人來牽溝過隙。M̄-koh，lán ê貴人tī佗落？星雲大師講：「世間上ê貴人真oh揣，tī我一生90外年ê歲月中，我ê體驗，登天難，求人koh-khah難！不如家己做家己ê貴人。」
Tsit句話hōo我真大ê鼓勵，有一句俗語講了好：「家己栽一欉，khah贏看別人。」食頭路45冬以來，翻頭看是啥mih人？啥mih事？Hōo我ē-tàng平順--ā做到退休？斟酌kā想，大面是看冊ê習慣，加添我應對職場試煉ê khuì力，mā幫贊我行出開闊ê人生。
1974年政府推動改善基礎設施、產業升級提出十大建設工程，國家需要大量進用人才，考選部除了逐年ê高普考，mā iáu有濟濟公家機關各種特考iah是就近tī當地招考新人。
真有福氣趁tsit幫順風車，高中出業做過短期ê代課老師、就考tiâu公務員，頭擺領著薪水交hōo阿母，序大人喙笑目笑，講：「Tann以後，lín阿爸就m̄免tiānn-tiānn加班，lán mā m̄免為著六个囡仔ê註冊費標會仔--ah！」阿母suà手提20箍銀「Tse hōo--你，m̄-thang hōo小弟小妹知--ooh！」頭擺有家己ê sai-khia，想起bat讀過清朝曾國藩寫hōo後生ê批：「讀冊ē-tàng改變氣質……」。主心定，隔工下班就去冊店用15箍買一本《中國成語大辭典》，tsit種工具冊bē退時，規家伙仔lóng ē-sái kong-ke看，當然是算khah ē和盤。提著家己趁錢買ê第一本冊，樂暢ê心親像風吹飛--起-來，徛tī港口，對拍箍飛ê bā-hio̍h大聲講：若是阿母逐個月hōo我所費，定著beh去買冊、看冊，日後就ē-tàng改變氣質、改變命運。
青春少年時，貪戀瓊瑤ê愛情小說，hit款「Suí bái無比止，愛--著khah慘死ê故事」，tī hit个年代轟動一時。逐個月買冊，養成愛看冊ê習慣，開始感覺一本實在是無夠khuì。儉幾若年，買著人生第一套冊「金庸全集」36本，每一系列內面ê角色tsiok濟，好人、歹人交纏出場；m̄-koh，大部份ê主角lóng是英雄出少年，武藝高強，一生受盡風霜，食苦當做食補，終其尾達成人生追求ê目標。武俠小說hōo人了解，隱喻無論啥mih世代lóng仝款，有夢想就ài行動、就ài堅持，緊tsua̍h慢定著ē成功。斯當時，機房接電話ê小姐有tsiânn百人，管理m̄-nā硬piàng-piàng koh規矩khah濟過貓仔毛，我就綿爛收集無ha̍h時代ê規定，提出建議改善ê意見。Hit个受過日本教育ê主管，對tsit款不sám時kā考試ê下跤手人，百面是真惱氣。Suà--落-來，九歌出版倪匡科幻小說全集，tsiah知影寫作ê世界有無限ê可能性，引發日後khang-khuè上，有濟濟創作性ê思考。
有一站仔，ná上班，ná想beh tsiânn做一个文藝青年，頭一項代誌就是ài有好底蒂，就大量買九歌文庫、洪範書局、皇冠叢書出版ê冊，斯當時ê作家：琦君、張曉風、三毛、廖輝英……，lóng是我真欣賞ê作者。Hit寡作品大部份ē買--tńg-來，囥tī厝內，落尾手年歲增加，重koh提出來讀，suah有無仝ê體悟kap自省。Koh ná看冊ná練寫短文，包括：雜文、小品、隨筆、報導文章等，投稿《青年戰士報》、《電信之聲》、《電信局務月刊》等等。本是心適興，suah koh有稿費！Tsit條外路仔ē-tàng tshuā小弟小妹去se̍h廟口，tām-sám--一-下-仔。
Tī基隆上班20冬，拄著幾若位貴人長官ê牽成，有機緣擔起主管職，m̄-koh真欠缺管理ê智識hām溝通ê技巧。天下文化ê名人傳記：孫運璿、趙耀東、高清愿、星雲大師；遠流出版心理學作者：鄭石岩、簡宛；希代出版心理生活叢書：劉必榮ê《談判孫子兵法》、《談判藝術》、劉瀚平ê《易經也解風情》、《生活易經》……，tsiânn做我走揣解答ê引導冊。了後，調動去北區分公司、總公司，參有緣鬥陣ê同事，殺膽迎接挑戰，承擔特別任務，加添單位ê聲望。
公司安排任務ê時，做掌頭--ê雖bóng有諸葛亮，mā ài有子龍將。部門內一人一个心，無錢thang買針；魚食溪水，人食喙水。人氣若好，做khang-khuè就輕可。同僚分會ê時，有風m̄-thang駛盡帆；忌剋贏kiáu koh贏話。若歹性地，人人lóng是冤仇人；若好性地，人人lóng是貴人。
因為愛看冊，日日粒積，當做是提升涵養ê操練。慣勢正面思考、認份頂真作穡，事事項項mài khîng分、mài比較。愛看冊，認同布施種福田，有量就有福，hùn開人生道路，做家己ê貴人。
