作者：蘇聖詠
2020年10月21，成功大學台文系邀請莫渝先生來專題分享，伊是一位詩人，華語hām台語ê詩lóng有創作，一開始伊先紹介別个詩人ê作品。比如講楊華ê〈女工悲曲〉，因為驚bē赴上班，所以天iáu未光就趕緊去，連早頓有時to m̄敢食，描寫女工ê辛苦；另外，iáu有台語真有名ê詩人陳明仁ê〈詩人é-káu〉，用一寡問題hō͘人去思考詩人ê意義是啥mi̍h；koh有一篇chiâⁿ有印象--ê是曾貴海ê〈銀角仔有兩面〉，內底講著m̄管銀角仔兩面有啥mih無仝，世間人認錢無認面，橫直有錢上要緊，形容人現實ê一面。
Suà--落就紹介伊家己，先講起伊出國ê經驗，過--來chiah是作品。第一首講--ê是〈春天ê百合〉，chit首詩是beh寫hō͘歐陽文先生。因為國民政府來台灣，發生「二二八事件」，歐陽文tī嘉義有參加抗爭，結果hông掠去坐監，百合花拄好是3--月開花，所以用chit蕊花代表為和平抗爭ê意義；第二首是〈夜雨〉，描寫「小林村」hō͘『莫拉克』風颱掃--過，造成真嚴重ê水災。因為che是我beh讀大學發生ê代誌，新聞報chiok大，所以真有印象；第三首是〈車頭染色〉，chia-ê車頭是leh講嘉義ê車頭，一開始車頭是紅色--ê，因為畫家陳澄波tī chia hông銃殺，流--出-來ê血，hō͘人感覺kā車頭染紅。第二種是藍色，tī白色恐怖時代，逐家lóng m̄敢出聲，驚一下出聲，人就無--去--ah！第三種是青色，是m̄是lán kah意、lán希望ê色水？作者無講出明確ê答案，kan-na提醒逐家，若是kah意，lán就ài kā永遠留tiâu--leh，好好仔寶惜，m̄-thang hō͘伊koh失--去--ah。
其實我以早讀大學ê時，就有一門「台語文學賞析和寫作」ê課程，老師有教我學練台語詩、文章ê創作。Hit當時我有寫押韻ê七字仔詩〈獅kah鳥鼠〉，就是kā『伊索』寓言ê故事用台語七字仔寫--出-來，koh kā押韻，我總共寫12 pha，每一pha有四句；想想--leh hit-chūn拄起步niâ，就有法度想--出-來，mā是真無簡單ê代誌。因為我感覺寫詩比寫文章koh-khah需要khai時間，上明顯--ê是，ài用短短ê文字表達出規句話ê情境，真需要激頭腦，無像文章想著啥mi̍h就ē-sái隨寫--落-來。詩ē-tàng講是文章ê濃縮版，所以m̄是講愈短愈簡單，kā重點表達--出-來chiah是真工夫。看著莫渝先生一篇koh一篇ê詩作，chiah想起家己已經有一段時間無創作hām投稿--ah；除了tī教冊方面ài繼續拍拚以外，mā提醒家己若是有時間，ài koh kā塵封chiok久ê筆攑出來寫，chiah bē生sian，ke寫一寡詩來豐富家己ê生活。
