作者：石牧民
歇熱過一半，koh一個外月，今年高中畢業ê學生囡仔就beh入去大學讀冊。各大學leh歡喜迎接新生。台大學生會迎接新生ê說明書，出台文版本；看無ê人tī社交媒體投，講bē輸hōo人phì-siùnn做tshenn-mê牛。Tsit款狀況，lán是慣勢慣勢。見若台語hōo人聽無，親像陳柏惟iáu leh做立委hit-tsūn beh用台語質詢；iah是台文hōo人看無，親像迎新手冊用台文，就ē致使人不滿。不滿ê人若投，iah是tiunn，lán就thìng好來戰台語、戰台文--ah。
論真，隨在佗一種語言kap文字，伊ê使命kám是hōo人「看有」、「聽有」？貴君請慢且回答。Lán先來坐火車去台北城。Tann火車ē講話，台北teh-beh到，伊代先kā你講：『台北，快到了；』伊無án-ne就準拄煞，繼續講：「We are now arriving at Taipei；Tâi-pak, teh-beh kàu--ah；Toiˇ bedˋ oi do leˇ。」貴君請想看māi，火車講話hōo你聽，kám是beh hōo你「聽有」？伊講四種語言，對象kám講lóng是你？Tsit个答案真顯然。火車講華語，講hōo華語人聽，英語hōo英語人聽，台語hōo台語人聽，客語hōo客語人聽。
事實無一種語言、文字ê使命是beh hōo人聽有、看有。伊ê使命是hōo已經聽有ê人聽，hōo已經看有ê人看。若是無本底就聽有、看有，真歹勢，任何一種特定ê語言、文字無法度幫贊--你。你m̄是伊ê對象。Tsia有一个mê角值得lán來注意：「是iah m̄是」kap「好iah bái」，全然兩回事。是、m̄是，tse是客觀ê精差。好、bái，牽涉著你掠做標準ê價值。是，無法度phì-siùnn m̄是。準做「是台語人」竟然ē-tàng phì-siùnn「m̄是台語人」，kan-na一種可能性：台語khah高級別項，致使台語人mā khah高級別種人。若真正án-ne，就是講「台語乃是tsiânn做人ê標準」、「台語ê價值khah kuân別種語言」。也就是leh講：「你定著ài ē-hiáu台語tsiah ē-sái！」
Lán lóng知影，事實to m̄是án-ne。Lán lóng知影，tī台灣現此時有leh使用ê自然語言內底，kan-na華語bat通過無正義koh粗殘ê步數來得著hit款地位——「你定著ài ē-hiáu華語tsiah ē-sái！」
M̄-nā án-ne niā-niā ooh。頭前bat講，語言、文字kan-na beh hōo已經聽有、看有ê人來聽、來看。總--是，「聽有」、「看有」，kám真正hiah-nī仔簡單？逐个字lóng bat，鬥--起-來tsua̋nn lóng看無；tsit款經驗，lán逐家lóng mā有。華語作家王文興kā《背海的人》寫kah無啥人看有，kám有人去投「王文興寫《背海的人》phì-siùnn我tshenn-mê牛」？Kám有人去投中央研究院翁啟惠前院長ê卵白疫苗論文「phì-siùnn lán tshenn-mê牛」？顛倒，王文興寫文章寫kah「假鬼假怪」，濟濟人mā bē感覺奇怪。是按怎ē án-ne？Hit个因端獨獨是he lóng華文--lah！見若華文就無要緊。因為「定著ài ē-hiáu華語、華文tsiah ē-sái」，結局ē變做「ē-hiáu華語、華文就ē-sái」。王文興寫kah我看lóng無mā無要緊，翁啟惠寫kah我看lóng無mā無要緊。
台語、台文bē輸新婦仔。台語獨獨beh hōo已經聽有ê人聽，台文獨獨beh hōo已經看有ê人看；m̄是台語、台文對象ê人講：「Án-ne m̄-thang！」正正是隔壁ta-ke、ta-kuann來tī lín兜大細聲。In真正要意--ê，m̄是in看無，是in看台語、台文khah無。Lán台語、台文人無hiah細漢。Hōo人聽有、看有，m̄是台語、台文ê責任kap使命。
Lán m̄-thang hōo人用「語言是溝通ê工具」tsit款鎖鍊kā lán束縛。無m̄-tio̍h，語言、文字是溝通ê工具，he是tī lán箍仔內。Hōo箍仔外口ê人mā ē-tàng參與溝通，he號做翻譯。
別人若án-ne做，伊有誠意；lán主動做，是lán古意。
無hit號應該--ê。
（作者是台灣師範大學台灣語文學系兼任助理教授）
