作者：陳明仁
編按：原文tī 1993年2--月，《台文通訊》第17期，第1-2頁刊出；漢羅用字有koh調整--過，羅馬字部份保留原本使用ê傳統白話字。
母語kap生活、土地ê文化互動關係，母語kap民族前途共生死chit類ê問題，相信《台文通訊》ê讀者lóng真了解，所以對台灣前途ê重要性逐家mā lóng真清楚，本文無想beh koh探討tsit方面ê理論。Khah實際--ê、也是《台文通訊》一向ê態度——lán beh按怎行動？台灣語文按怎hō͘伊tī chit塊土地上koh活？
目前台灣語文學者、工作者、支持者對chit个題目lóng真關心，所以chit幾年來，若開語文方面ê會議，出席lóng真熱烈；可惜見若討論到「台語文字化」ê時，一寡台語「專家」tī台灣文字ê頂頭，時常有爭論，但是若討論著台語ê推行，逐家就lóng有同感。尾--à，我想講，做運動ê原則就是「結合khah大ê力量，攻擊khah細ê點」，iah無，是m̄是ē-tàng kan-na討論按怎做台語運動，暫時mài處理文字共識？Chit个見解隨時得著台語界先進、朋友ê支持，所以，有幾擺ê聚會，目的設定tī語言推廣，效果lóng真好。
逐擺聚會所面對頭一層就是台語定位ê問題；過去台灣社會講著台語就直接反應——Hō-ló話。台語運動人士為beh兼顧各語族ê台灣情感kap相對族群ê尊嚴，感覺台語chiâⁿ做Hō-ló話ê專有名詞無kài妥當，上好將台語解soeh做台灣ê語言。若án-ne，就包含客話、原住民話在內，lóng號做台語。Mā有人講1949年以後來台灣ê所謂「外省人」，in ê母語kám也是台語ê一種？也就是講台灣官方ê「國語」kám oân-á ē-sái講是台語？
照講，本文若beh討論chit个題目ē牽siuⁿ遠，m̄-koh若無小講一下mā bē-sái。1949年以後chiah來--ê，不管是個人主觀上ê意願有承認iah無，tī客觀ê事實上lóng是台灣人，chit點無可爭議，當然in ê母語mā ài受著尊重，問題是——「國語」kám是in ê母語？對in來講，中國ê廣東、四川、河南、北京——各種語言，lóng kap台灣ê「國語」有所差別，台灣ê「國語」m̄是in ê母語，in來自世界各地ê母語mā無可能lóng chiâⁿ做台語ê一種，親像台灣人入美國籍，無法度要求將台語列做美國語ê一種，m̄-koh美國人iah是政府仝款ài尊重台灣人用台語交談、做教材教in ê子弟種種代誌。所以本文所講ê台語就無包含國民黨官訂ê「國語」；「國語」mā無需要lán koh去推廣。
1992年12月20，台灣大選ê隔tńg工，規百个台語人士聚集tī台北市中心ê YMCA，討論台語問題，目的是beh按怎hō͘台語tī lán ê土地koh活。方法上可能ài兵分二路，一方面做民間推廣，一方面爭取法定地位ê確認。Tī爭取法定地位上，ē-sái透過lán新選--出-來ê立委，請in向立法院簽署提案，除了現此時獨霸ê「國語」以外，Hō-ló話、客話、原住民語言mā lóng ài立案chiâⁿ做台灣ê法定語（official languages）。Chit屆新當選ê立委，有真濟位tī競選ê時，是透過台語演講向選民爭取選票，所以in有責任替台語走chông，hō͘台灣chiâⁿ做多語國家。同時mā ē-sái舉辦遊行、請願chit款ê活動來做配合，hō͘ lán ê立委提案ê時khah有khùi力。
比較上，民間ê推廣koh-khah重要。爭取台語ê法定地位，目的mā是為著beh hō͘台灣人民ē-tàng使用，人民若無感覺chit款需要性，立法m̄-nā bē通過，通過了後mā無khah- choa̍h。眼前khah可行ê辦法是透過台語ê消費者運動來做社會推廣，tī公家、半公家ê單位、處所，親像公所、衛生所、鐵路局、台汽公司、圖書館、病院……，lán納稅人有權、也有責任要求辦事人員一定ài尊重台語人ê權利；in若無用台語kā lán回應，lán一定ài堅持。Tī私營ê營業場所，親像餐廳、旅館、超商……lán消費者koh-khah有權利要求服務員用在地ê母語應答。另外，lán mā ē-sái提供「本店可使用客語」iah是「本公司有講台語」chit類ê貼紙，請台語義工去做訪問，有ha̍h lán要求--ê，就將貼紙kā貼leh門口，hō͘消費者ke一个選擇ê機會；店頭家mā ē想講，伊仝款錢beh chhiàⁿ店員，當然mā ài chhiàⁿ「國語」kap台語lóng ē-hiáu ê人。後擺若beh揣頭路ê人，若無將台語學好勢，就真歹kap人競爭，án-ne，學台語可能ē chiâⁿ做一个時行。
另外，mā ē-sái針對傳播媒體做消費者運動，假使若有電台、電視台、報刊、雜誌對台語有所歧視，lán ē-sái直接向媒體提出抗議，iah是向提供廣告ê廠商表達：因為媒體ê語言立場有têng-tâⁿ，致使lán考慮無愛koh再採用in ê產品。親像「退報救台灣運動」了後，真正有廠商聲明無愛koh向聯合報刊廣告，che就是消費者運動ê力量。
無論立法院運作iah是民間推廣，lóng需要人kap一个有全國代表性ê名稱，所以參加12月20「台灣語文運動」ê人士lóng有共識，希望齊心合志，組一个類似「台灣語文運動聯盟」chit款名稱ê組織，結合關心台語文化ê人士kap團體，做伙為lán家己ê母語拍拚。
現此時，chit个組織tng-leh籌備中，計畫1993年3月中成立，期待海內外關心台灣語言ê人士lóng來參加，mā提供chit方面ê意見。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
三十而立．台文通訊30週年徵稿啟事
