作者：蔣為文
編按：原文tī 1994年5--月，《台文通訊》第30期，第8頁刊出；漢羅用字有koh調整--過，羅馬字部份保留原本使用ê傳統白話字。
西元1895年清廷戰敗，將「鳥不語、花不香、男無情、女無義」ê台灣割hō͘日本帝國。到1945年日本戰敗，koh將番薯仔島割hō͘中國ê國民黨政權。Tùi古早到chit-má，chit粒番薯仔就親像án-ne一直hō͘人割來割去、tàn來tàn去，siáng mā無法度保證後手bē koh割hō͘中國ê共產黨政權？！如果講中國ê近代史是苦難--ê，kám講台灣就無苦悶？
日本發動太平洋戰爭並實施「皇民化運動」，改名姓、廢漢文、禁台語、表揚「國語家庭」。日本總督加強語言控制ê目的，就是beh消除愈來愈koân ê台灣意識，beh hō͘台灣人m̄知影家己ê台灣人，beh用壓霸ê方法逼台灣人做二等ê日本人，beh叫二等ê日本人替一等ê日本人服務，做in ê砲灰！
國民黨拄接收台灣ê時tsūn，因為屬tī過渡時機，學校iáu bat出現過台語kap北京語ê「雙語教學」，m̄-koh，無到兩冬，「二二八」發生，「皇民化運動」再度借屍還魂，二等ê中國人koh ài替一等ê中國人服務，做in ê炮灰！
第一，tī學校內底實施單語教育，而且真粗殘禁止講台語，講台語就ài罰錢、就ài掛狗牌仔，hō͘學生產生講台語就是無水準、就是罪惡ê自卑感。課本mā bē講台灣ê代誌，kan-na欺騙講台灣是中國不可分割ê一部份，hō͘你甘願做二等ê中國人，m̄甘願做一等ê台灣人。
第二，tī社會上，不准踮公共場合講台灣話，因為講「國語」逐家聽khah有，台語kan-na ē-tàng bih tī厝內偷偷仔講？！語言若kan-na是溝通工具，án-ne，為啥mi̍h lán無愛自細漢就學英文就好，何必學「國文」造成世界溝通ê困難？
第三，tī電視媒體頂面，刁工醜化講台語ê人，若無，就是減少製作經費，造成品質無好，hō͘人認為講台語ê人是一寡下階層、a-sa-puh-luh、不三不四ê人，若是beh做一个有水準ê智識份子，就ài講北京話。而且將台語ê使用定位tī鄉土--ê、阿公阿媽ê話，tèⁿ死台語ê成長空間，kánn-ná台語kan-na ē-tàng hām阿公阿媽in老大人講，siáng講同學之間就bē-tàng用台語講？Siáng講兄弟姊妹中間就ài用北京話？
語言除了溝通以外，同時也保存著chit塊土地hō͘人感動ê歷史上、生活上、感情上ê族群文化。消滅chit个語族ê母語，就親像將一欉樹仔tùi根挖--起-來；今仔日，保存母語就是beh保存chit个語族ê族群文化，就是beh hō͘ chit欉樹仔大欉。換一个角度來看，就是beh爭取做台灣人ê尊嚴，lán無需要講壓迫lán ê統治者ê語言，lán無需要繼續做人ê新婦仔囝，lán更加beh爭取用台灣文化做主體ê台灣國；見若有認同台灣ê人，無分大陸、原住民、客家、鶴佬（Hō-ló）lóng是chit个主體ê一份子，lán做伙sio-thīn，徛出來要求：
- 語言平等：hō͘原住民ê話、客話、鶴佬（Hō-ló）話、北京話lóng chiâⁿ做台灣ê正式語言，是台灣ê「國語」。
- 實施母語教育：hō͘每一个語族有教in ê後代講母語ê權利kap義務，人民mā有受母語教育ê權利kap義務。
- 消除廣電惡法ê陰影：拍開心內ê門窗，發展全面性ê台語節目、全面性ê台語文學、全面性ê台語用語。
- 實施台灣化、世界觀ê教育：台灣是中國bē-sái分割ê一部份，台灣「反共（產黨）復國（民黨）」ê時代已經過--去，現此時台灣是世界ê一部份，台灣有伊主體性ê政治、經濟kap文化地位，台灣是台灣人ê台灣！
（淡江大學台語文社第二屆徵文比賽鶴佬〈Hō-ló〉組佳作，作者hit-chūn是淡江大學機械系四年學生）
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
三十而立．台文通訊30週年徵稿啟事
