主講／李宜龍
記錄／田永承
編按：本文是2022/9/1棲地復育台語講座ê摘要記錄，講者李宜龍是「台灣蜻蜓學會」ê 發起人。
台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃有關生態環境議題ê台語講座，歡迎逐家tī逐個月第三禮拜五暗時7點到9點，同齊來「呷米共食廚房」（台北市中正區衡陽路9號3樓）擴展家己ê台語棲地（tshe-tē）！詳細資料ē-tàng看「台灣蠻野心足生態協會」FB專頁。
田嬰tī地球已經生活真久--ah，根據化石推測，田嬰老早tī兩、三億年前，就存在--ah。歷史久長ê田嬰，tī全世界大概有5,500外種，除了南極kap北極，世界其他地區lóng看ē著田嬰。但是tsit个古老ê生物因為氣候變遷、棲地hông破壞等等ê原因，現此時拄著真大ê生存危機。今仔日ê蠻野講堂邀請「台灣蜻蜓學會」發起人——李宜龍老師，來tshuā逐家熟sāi田嬰，了解怎樣保護田嬰。
田嬰ê身體結構分做頭、胸坎、腹肚。頭前翼kap後壁翼，兩對翼仔hām六肢跤生tī胸坎。兩蕊目睭kheh sio倚，生tī頭殼頂kuân。有ê品種，無仝性別ê田嬰，外觀mā有小寡無仝。譬論講有ê品種，公--ê是hiánn目ê青色，母--ê suah黃黃濁濁，色水phú-phú。M̄-nā án-ne，無仝品種ê田嬰，生殖器mā ē有精差。有ê公田嬰in腹肚頭前ê下跤，ē生「假陰莖」，尾溜koh ē生勾仔。生勾仔是為著趁kap母田嬰交尾ê時tsūn，ē-tàng kā其他公蟲ê精子勾--出-來，增加家己ê精子成功受精ê機率。
田嬰ê一生分做卵、幼蟲kap成蟲，成蟲koh交配生卵，就tsiânn做田嬰性命ê循環。田嬰ê幼蟲號做「水乞食」，因為伊ê ē-hâi ē-tàng tī tn̄g著獵物ê時tsūn伸出去掠食，tsit个伸--出-去ê動作看--起-來ná像乞食仝款，tsiah有tsit个名。水乞食平常時lóng是食肉khah濟，水tshi、tōo-kuai仔、三界娘仔等等，lóng是in愛食ê mi̍h件。水乞食無啥揀食，但是平平lóng是tōo-kuai仔，獨獨tsiunn蜍ê tōo-kuai仔m̄肯食就是m̄肯食。所以老師伊若beh飼水乞食，tio̍h-ài kap研究水雞ê老師借幾隻仔tōo-kuai仔來飼。
幼蟲差不多5到14个齡期就ē生做成蟲，就ē-tàng開始thn̂g後嗣。田嬰beh交配ê時tsūn，公--ê看著母--ê就ē飛tsông去kā khînn-tiâu-tiâu。若講母蟲無意愛，無願意交配，就ē滾liòng飛走；若講母蟲願意，in兩隻蟲就ē交纏做一个心型來交配。交配了，母蟲就ē去生卵，有ê品種ē kā卵生tī倚水ê葉仔後壁，有ê ē飛tī水埤、水田頂kuân，ná飛ná生卵到水--裡，親像一隻「轟炸機」仝款。Tsia-ê卵就ē沓沓仔生出幼蟲，繼續田嬰性命ê循環。
台灣ê田嬰大概有160外種，其中20外種是台灣獨有ê品種，主要分佈tī台北kap高雄、屏東等等雨水厚ê地區。但是tse百外種田嬰當中，有20幾種tsit-má已經完全看無in ê形影--ah。有可能是進前ê記錄有tîng-tânn，mā有真大ê可能是tsia-ê無--去ê田嬰，真正tī台灣tse̍h種--ah。Tsit幾十冬來，田嬰面對真大ê生存壓力，有人為因素mā有氣候變遷ê因素。譬論講都市愈來愈大箍，kā四箍liàn-tńg ê大自然一點仔一點仔食掉掠外；koh有人類為著避免都市受水患，kā溪流ê溪壁、溪底khōng紅毛塗，kā溪邊ê菅芒khau-khau--掉，做河濱公園防大水，lóng hōo田嬰無所在thang蹛kap生湠。一年熱過一年ê天氣，mā押原底蹛南部ê田嬰向北部遷徙。
為著保育田嬰，李宜龍老師kap kah意田嬰ê眾有志，創立「台灣蜻蜓學會」ê面冊迷眾頁，hōo逐家tī迷眾頁頂kuân鋪文分享田嬰ê大細項事。李宜龍in mā有tī iNaturalist自然生物記錄平台起造田嬰頁面，tī iNaturalist鋪田嬰相片，koh ē記錄hip相ê地點，全面記錄台灣各地田嬰ê生存狀況，koh-khah詳細掌握in ê動態，盡心kā保護。
蠻野講堂
