作者：黃偉嘉
日本人統治台灣50年，也將lán tsia一寡地號名kā改--過。改地號名主要ê目的，是希望台灣ê地名看--起-來hām殖民母國koh-khah sio-siāng，方便in用in ê語言來讀、寫。今仔日lán看--著ê鄉鎮市區名，大部份lóng是tī大正9年（1920年）配合行政區調整tsiah改--過-來--ê，到tann也用超過一百年--ah。
新北市ê「枋橋」，就是tī hit當時去hōo改做「板橋」（日本話讀做itahashi）。總--是lán台灣人無論是台語iah是客語，到tann讀做「枋橋（Pang-kiô、biongˊ kieuˇ 1）」、寫做「板橋」慣勢。Án-ne用百外年，加上「枋」、「板」ê意思sio倚，顛倒tsiok濟人拄著tsit兩字ê時tsūn就án-ne hue--去--ah。
「枋」、「板」若參考《教典》，in原本ê意思應該是：
「枋（pang）」：柴枋（『木板』）。Tī地號名tsia̍p看--著。比如講屏東縣「枋寮（Pang-liâu）」、宜蘭縣頭城鎮「梗枋（Ngē-pang）」。
「板（pán）」：也有柴枋ê意思，但是台語koh有kā當做橋ê數量詞，tī地號名mā tsia̍p看--著。比如講台北市有「三板橋（Sann-pán-kiô）」、南投縣草屯鎮有「五板橋仔（Gōo-pán-kiô-á）」，lóng tuè tī數字ê後壁。
Án-ne一下看，就知影日本人雖然kan-na改一字，事實上是將原底有分別ê「枋」、「板」lām做伙--ah。結果就造成新ê複合詞，親像「板新路」、「板南線」，hōo人煩惱ài按怎唸khah好——是照「枋橋」讀做「pang」？Iah是照漢字讀做「pán」？
先講「板南線」，台北捷運一直以來lóng是照漢字讀做「Pán-lâm-suànn」，經過十外年ê強力放送，可能連bē-hiáu講台語ê旅客也聽kah tsiânn慣勢；接suà，是板橋車頭北爿ê「板新路」，「Pán-sin-lōo」、「Pang-sin-lōo」lóng bat聽過有人講。總--是2020年1--月環狀線通車以後，tī tsit條路新設一站「板新」，放送kan-na ē-tàng揀一个，lán ài按怎選擇khah好？
阮團隊leh執行教育部「以本土語言標注臺灣地名計畫」ê時tsūn，有tsiânn濟委員建議是照漢字讀做「Pán-sin」。但是考慮著計畫是到2020年ê 6月30為止，公告是tī 9月中，hit時環狀線已經通車beh一冬，捷運公司代先錄好ê讀音「Pang-sin」早就湠--出-去。因為兩个lóng講ē通，落尾就決定順現況讀做「Pang-sin」。
就án-ne，仝款「板」--字，台北捷運ê放送tī「板南線」讀做「pán」，若到「板新」就讀做「pang」，你kám bat注意--過？
1.客語標音使用教育部公告ê「客家語拼音方案」。
（作者是「地圖與多媒體研究室」研究員）
編按：漢羅用字有調整，原文是全漢。全漢版ē囥tī雜誌網站，hōo讀者做參考、對照。
專欄簡介：有人講「台語無字」。事實上台語一直lóng有字，自以早就用漢字來寫lán ê地號名。但是因為借字、借音、走音、腔口差、連音等等各種ê變化，一寡地號名suah hām漢字鬥bē起--來。若到一个生份ê所在，tiānn-tiānn是一開喙讀地號名，就hông隨知影是外地人。台大地理系「地圖與多媒體研究室」一直以來，投入地圖製作、地理教育、地名研究。Tuì 2019年開始，執行教育部「以本土語言標注臺灣地名計畫」，成果已經用tī改善台鐵、捷運ê放送。Tuì tsit月日開始，「地圖與多媒體研究室」逐個月ē tuì台語ê角度，tī雜誌介紹一个地號名，後擺若是坐車、駛車經過，拄好tn̄g--著，一定ē koh-khah疼惜lán tsit塊土地ê大細項代誌！
以本土語言標注臺灣地名計畫 https://reurl.cc/XjozaR
---------------------
全漢版
日本人統治臺灣50年，也將咱遮一寡地號名共改過。改地號名主要的目的，是希望臺灣的地名看起來和殖民母國閣較相siāng，方便in用in的語言來讀、寫。今仔日咱看著的鄉鎮市區名，大部份攏是佇大正9年（1920年）配合行政區調整才改過來的，到今也用超過一百年矣。
新北市的「枋橋」，就是佇彼當時去予改做「板橋」（日本語讀做itahashi）。總是咱臺灣人無論是臺語抑是客語，到今讀做「枋橋（Pang-kiô、biongˊ
kieuˇ）」、寫做「板橋」慣勢。按呢用百外年，加上「枋」、「板」的意思相倚，顛倒足濟人拄著這兩字的時陣就按呢花去矣。
「枋」、「板」若參考《教典》，𪜶原本的意思應該是：
「枋（pang）」：柴枋（『木板』）。佇地號名捷看著。比如講屏東縣「枋寮（Pang-liâu）」、宜蘭縣頭城鎮「梗枋（Ngē-pang）」。
「板（pán）」：也有柴枋的意思，但是臺語閣有共當做橋的數量詞，佇地號名嘛捷看著。比如講臺北市有「三板橋（Sann-pán-kiô）」、南投縣草屯鎮有「五板橋仔（Gōo-pán-kiô-á）」，攏綴佇數字的後壁。
按呢一下看，就知影日本人雖然干焦改一字，事實上是將原底有分的「枋」、「板」濫做伙矣。結果就造成新的複合詞，親像「板新路」、「板南線」，就予人煩惱愛按怎唸較好——是照「枋橋」讀做「pang」？抑是照漢字讀做「pán」？
先講「板南線」，臺北捷運一直以來攏是照漢字讀做「Pán-lâm-suànn」，經過十外年的強力放送，可能連袂曉講臺語的旅客也聽甲誠慣勢；接紲，是板橋車頭北爿的「板新路」，「Pán-sin-lōo」、「Pang-sin-lōo」攏捌聽過有人講。總是2020年1月環狀線通車以後，佇這條路新設一站「板新」，放送干焦會當揀一个，咱愛按怎選擇較好？
阮團隊咧執行教育部「以本土語言標注臺灣地名計畫」的時陣，有誠濟委員建議是照漢字讀做「Pán-sin」。但是考慮著計畫是到2020年的6月30為止，公告是佇9月中，彼時環狀線已經通車欲一冬，捷運公司代先錄好的讀音「Pang-sin」早就湠出去。因為兩个攏講會通，落尾就決定順現況讀做「Pang-sin」。
就按呢，仝款「板」字，臺北捷運的放送佇「板南線」讀做「pán」，若到「板新」就讀做「pang」，你敢捌注意過？
---------------------
