作者：呂美親
已經m̄是紮菜脯飯包去溪埔搬沙石ê時代
（明仔載ê khuì力，機器人kā你tshuân便便）
講一句家己ê話，早就m̄免koh罰一箍
（教台灣話算點鐘--ê，人間國寶thài ē用得刣價？）
庄--裡上優秀ê大學生mā bē koh hông掠--去
（「輕軌」ê鐵枝路代替產業道路tī農村sì-kè趖）
土地仝款hiah-nī狹，總--是無人敢koh嫌台灣
（四面五路ê帝國，tuì 16世紀就輪流來sio爭beh ài）
恩愛規百冬ê枕頭沓沓有記持，線頂拍賣逐時欠貨
（科技進步，少年人失智講mā有藥醫）
夜色ê東門町無koh透風落雨，總--是不時罩bông
（空氣汙染siunn嚴重，台北規市內lóng khàm蓋）
無力宣言ê海翁，揹一身軀厚厚ê重油泅入來港仔喙
（經濟kap國際lóng leh戰爭，飛行機大船逐隻沉落外海）
食麵包、抹牛油ê烏tshiu，tsín逐不時飛tńg來嘉南平原
（基改ê mi̍h件kap塑化劑食久uân-ná ē siān）
老樹落塗tsiok久--ah，向tsiūnn天ê新枝葉全全是進口兼加工過--ê
（無仝皮色ê移民一睏來tsiok濟，無人是正港ê台灣人）
直直眠夢多元ê番薯島，彩筆盒仔內suah賰一色
囡仔無koh叫爸母『ㄅㄚˇㄅㄚˊ』、『ㄇㄚˇㄇㄚˊ』
早起時ê io-tsí-ián，用國際通用語huah精神口號
規大疊ê補充教材，kan-na賰一條「天烏烏，beh落雨……」
阿公阿媽早早就做仙--ah，物資無缺少（khueh-tsió）kah連破鼎lóng ài回收
小可koh-iūnn ê老師，偷偷仔提尪仔冊教囡仔唱hit條
古早古早，為著阻擋「兩岸服貿協議」簽訂ê流行歌
「天色漸漸光，tsia有一陣人，為著守護lán ê夢，tsiânn做更加勇敢ê人……」
2070年ê某一日，全世界ê新聞lóng leh痟tsit層
講hit位有兩个查某囝ê女性太空人
代先飛入去到百冬前iáu無人發見ê銀河系
伊用幾若款地球話kā hia-ê外星人sio借問
聽講其中一句是「Tsia̍h-pá--buē？」
超越光年ê電報，真緊就tī地球所有ê城市播送
番薯島ê老歲仔，目屎大大粒lìn kah規塗跤
島上ê少年人逐个to leh問he啥意思
太空人koh特別錄影分張hōo lán tsit个世界ê公民
Hōo逐家驚疑ê兩項代誌是
Hit條銀河ê水，哪ē tsiah清？
所有ê生物beh徙tín動kám kan-na靠念力？
百冬前ê菜脯飯包，後--來包裝kah suí-tang-tang
Mā bat hōo濟濟國家痟一站。無到幾時
人koh hong講ē拍損健康，mài食khah好
甕仔底臭phú ê鹹mi̍h配iáu未phâng tsiūnn桌
就hōo風颱掃了了。連環保車也艱苦tsē-kuà
做phun做肥ê原料tann tio̍h koh物色
科學家開始研發「無差別廢物處理機」
幾百年來lóng leh煩惱滅亡ê小島，到tann
Iáu無沉落海底，仝款恬恬tshāi tī太平洋西南海邊
接收來自100冬比100冬koh-khah曠闊ê新世界
佳哉！佳哉，暗暝ê月光
猶原tshiō tī kuân-lòng-sòng、好骨路ê玉山山脈
伊ê身軀長lò-lò，m̄ bat變換ê線索
淡薄仔翠青，iáu leh閃閃爍
風若kā雲tshuā--過-來，ē聽著輕輕仔leh牽亡ê歌聲
Bē輸leh唱講，hit條看--起-來tsiah-nī清ê銀河
檢采有時也ē tn̄g著透風落雨
