作者：本社記者Kaian專訪
編按：原文tī 1993年7--月，《台文通訊》第22期，第2-3頁刊出；漢羅用字有koh調整--過，羅馬字部份保留原本使用ê傳統白話字。Hit-tsūn蘇貞昌是屏東縣縣長。
母語kap文化ê關係
講母語是天經地義ê代誌，使用母語是對序大人、對先祖ê一種尊敬，mā是傳落去hō͘後代囡仔ê一種責任。因為，母語若斷，文化就滅。做一个族群ê一份子，若bē-hiáu講家己ê母語，致使文化來傳bē落--去，我感覺是罪人。所以，過去40外年國民黨ê語言政策無正確，致使lán ê母語就kiōng-beh斷--去--lah。Chit-má我ē-tàng做縣長，屏東縣有四大族群：Hō-ló、客家、Rukai（『魯凱』）、Paiwan（『排灣』），若是有機會，lán ē-tàng來hō͘ lán ê囡仔來講家己ê母語，hō͘文化koh ē-tàng延續--落-去，hō͘族群ē-tàng khah好做伙，我感覺che是我應該做ê khang-khòe。
我kā囡仔講：為著beh考大學，為著十幾年後beh出國、做生理，lín chit-má就開始khai錢學外國人ê話。但是，lín爸母講ê話，lín阿公阿媽講ê話，lín bē-hiáu講，lín看是偌無彩。而且，母語斷，文化滅，lín若beh講一種文化，無用in ê母語，就講bē正、講bē正確。你若睏醒，爸母問你講：「洗喙--ah--未？」你tī學校，老師問--你：『刷牙了沒有？』仝一種生活習慣，仝一種動作，無仝ê語言做無仝ê表達。
拍拚是暴力？
14年前，高雄美麗島事件，我是姚嘉文ê辯護律師，tī軍事法庭頂面，軍法官講lín chia lóng是『暴力份子』。是按怎？因為lín演講lóng叫逐家出來「拍拚」，『又要打，又要拚，不是暴力份子是什麼？』我當場kā軍事法官講：「你che是語言審判！你根本無了解Hō-ló話ê “拍拚” 是北京話『努力』ê意思。你用án-ne講in是暴力份子？14年前暴力份子，14年後國民黨中常會通過宋楚瑜做省主席，伊ê頭一篇演講稿就是呼籲省民逐家做陣來拍拚。差14年nā-tiāⁿ，若án-ne宋楚瑜就是暴力份子。
屏東縣母語教育現況
我去到客庄，hia ê種子老師teh訓練我用客話kā學生囡仔演講，hia-ê學生囡仔teh笑，我講：「我是Hō-ló人，我m̄是客人，我講客話lín笑，是真自然--ê。但是，有一工，lín客家囡仔若講客話人ē笑，『客家就完蛋了』。」老師聽kah流目屎。
有人認為講民進黨執政就lóng總ài改做台灣話，北京話就lóng m̄免koh管--伊。我是感覺，án-ne有khah急。而且，mā無必要，因為當時國民黨政府手頭有力、有刀、有銃，利用政權ê力來壓迫，m̄准lán講家己ê母語。今仔日換lán khah濟人，換lán來壓迫別人，kan-taⁿ ē-tàng講台灣話，án-ne其實講mā是仝款無真好。我是感覺語言本身是工具，mài講我--ê上好，你--ê bái，因為母語本身就是囡仔出母胎以後聽--著ê頭一个聲音。做媽媽--ê kā囝講ê話是上kài súi--ê。去辯講啥mih人--ê上súi，我感覺無啥意義。你尊重--我、我尊重--你，我學你--ê、你學我--ê，án-ne khah有意思。所以目前我tī屏東縣不過是teh推行母語教學，我iáu未推動雙語教學。關於將來是m̄是beh採用雙語教學，或者按怎khah好，我感覺iáu是先hō͘母語mài斷--去khah要緊。母語保存--落-來了後，lán chiah-koh來參詳，研究koh-khah好ê方法，逐个人互相尊重，hō͘伊自然發展就好。
我是決策者，我推動chit个khang-khòe，交hō͘教育局、文化中心ê同事來做，由in提出計劃。屏東縣有八个客家鄉、七个Paiwan鄉、一个Rukai鄉。Tùi Hō-ló、客家、Paiwan、Rukai各選一間學校，開始試驗教學。因為án-ne kā in尊重，所以真好運，像Paiwan、Rukai族ê頭目，lóng出來tàu跤手，庄--裡對語言有研究ê人，lóng配合家長、老師去整理教材，ná教ná改ná整理，差不多一學期了，教材漸漸定形，koh試驗教學。感覺ē-sái了後，chiah落去印課本。試驗一學期了後，感覺真成功，學生真歡喜，家長真支持，老師mā真熱心，就開始做「觀摩教學」，訓練「種子老師」，我lóng親身去kā老師鼓勵。
因為過去tī學校是bē-sái講母語，若講『方言』，m̄-nā ài khiak頭殼，koh ài掛牌仔、罰五角，我讀冊ê時是án-ne。Chit-má你若tī學校ē-hiáu講母語，不但kā呵咾，iáu有縣長來kā你頒獎，所以逐家lóng真歡喜。我有三个原則：本土化、生活化、趣味化。啥mi̍h叫做本土化？就是lóng講lán本土--ê、ha̍h--lán--ê，也就是Hō-ló人講Hō-ló ê代誌，客家人講客家ê代誌；生活化就是現學現ē得用；趣味化就是用真輕鬆，免記、免考、免背ê方式，真自然來學，免koh增加學生ê負擔，而且hō͘ in學kah kài趣味。所以，chit-má in已經ē-hiáu用母語吟唐詩、答喙鼓、唱歌謠、做謎仔猜--ah。
Chit-má全屏東縣ê學生囡仔隨族群情形ê無仝，Hō-ló囡仔讀Hō-ló話，客家囡仔讀客家話，Paiwan、Rukai囡仔讀Paiwan、Rukai話，每一个囡仔lóng免費得著一本課本。全面來推動，得著真大ê歡迎，mā有相當ê成果。阮bat將chit个成果對全國十个縣市發表，相當轟動。不但án-ne，阮也tī屏東縣內所有33个鄉鎮市辦文化廣場，開始hō͘囡仔做母語成果發表，在地ê囡仔表演hō͘在地ê序大人看，社區來表演社區ê節目，非常熱場。
40年教育無做ê問題，雄雄beh做，有ê人主張ài án-ne做，有ê人主張mài án-ne做，我想以後chit方面ài按怎做，有需要koh逐家來參詳。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
三十而立．台文通訊30週年徵稿啟事
