作者：石牧民
頂回，〈歌仔冊ê浪漫〉講著歌仔冊tsiânn做「娛樂產品」tsit个概念，ē-tàng幫贊lán來理解歌仔冊tsit種文化。論真，歌仔冊m̄-nā是娛樂產品孤一種價值。娛樂ti̍k掠外，伊siāng時mā有其他性質。Tsit點，lán ē-tàng用iáu一本歌仔冊來做例。台中瑞成冊局發行，khah uànn嘉義捷發漢書部〈三伯顯聖託夢英台歌〉一冬，是1935年（昭和10年）出版ê〈中部大震災新歌〉。
1935年4月21，台灣中部關刀山發生七級有感大地動。Tng當時台中州、新竹州兩个所在受著真大ê影響。〈中部大震災新歌〉內底拄好有講，民眾厝宅、徛家「倒真雄」。Lán tuì tsit句來講歌仔冊做娛樂產品掠外，別種ê價值。代先，講建築物「倒真雄」，本身就kài心適。Tsit句話bē輸nǹg過時間kap空間ê空縫，來到lán現代，hōo看著「倒真雄」kap華語tsit-má teh講『倒很大』khuì口無koh-iūnn。你kā看，講「倒真雄」，無講「天搖地動，牆頹屋傾」，是正正khah倚口語ê表達方式。Lán m̄-thang bē記--得，雖bóng歌仔冊「七字一句、四句一pha」ê形式hōo lán感覺khah古典；總--是，若kā「書面語」kap「口語」做兩爿極頭giú一條線，歌仔冊tī tsit條線--裡是khah倚近口語hit爿。
現此時，lán teh看歌仔冊，看著濟濟漢字是借伊ê音來寫。比論講beh講「teh」，借「塊」--字來表記；beh講「hōo」，借「互」--字來表記。因端出tī台文書寫iáu未標準化，m̄-koh lán mā ē-sái講，he koh-khah是歌仔冊是一種「聲音」文化ê證明。Hit个聲音，就是台語。若講台語文有teh追求「喙講台灣話，手寫台語文」，án-ne歌仔冊事實上是一種台語文實踐。而且，伊真明確知影目標讀者是台語人。真明確知影消費者ê身份kap需求來生產--ê，拄好號做「產品」。
是啥mih款「產品」？頂回bat講，現代囡仔人一齣一齣teh tuè Marvel bàng-gà改編ê電影，iah是一齣一齣teh tuè韓國電視劇，日本時代消費者一本一本teh tuè歌仔冊三伯英台故事，本質是仝款一回事，tse號做娛樂產品。若是〈中部大震災新歌〉tsit種，m̄是戀愛古，mā m̄是廖添丁hit款有冒險、動作做齣頭--ê，tio̍h-ài按怎看khah好？
先來講幾个事實。1935年4--月發生大地動，瑞成tsit本〈中部大震災新歌〉tī hit冬ê 12--月就出版，甚至khah早日本殖民政府官方《昭和十年臺灣震災誌》四個月。另外一項事實，〈中部大震災新歌〉煞鼓進前，一位一位交代各地死亡人數；提tsia-ê資料比phīng殖民政府官方資料，數字ē-sái講無啥精差。若是參考tsit兩項事實來看，〈中部大震災新歌〉tsit本歌仔冊teh講1935年發生ê大地動，有兩項特色：第一，速度緊；第二，資料準。
速度緊、資料準，tse kám m̄是lán對新聞紙ê要求？〈中部大震災新歌〉是一个新聞性質ê產品。M̄-nā án-ne，〈中部大震災新歌〉內底，teh講各地ê災情，是有故事--ê。后里hit tah位發生ê代誌，東勢hit tah位發生ê代誌……，lóng有詳細講實際ê案例。用lán今仔日ê語言來講，tse號做「深入報導」。〈中部大震災新歌〉ē-sái講是一本地動專題報導。伊ê本質，kap今仔日美國《時代雜誌》iah是英國《經濟學人》出一本烏克蘭戰爭專題是仝款一回事。
Lán ê歌仔冊，有講三伯英台hit款傳統戀愛故事，有講地動tsit種時事新聞。現代角度看--起-來，伊是一種古早ê文化。總--是，講著祝英台，hōo伊穿se-bí-looh，hōo伊坐火車；講著大地動，用新聞報導ê手路。Lán tio̍h知影，歌仔冊tī日本時代就是「當代」ê文化產品，有「現代化」ê眼光。事實，lán離開日本時代無偌久。不才我是昭和時代出世。日本時代結束hit-tsūn，mā是昭和--ooh。Lán teh看歌仔冊，m̄-thang看伊ê舊，tio̍h-ài看伊ê新。
（作者是台灣師範大學台灣語文學系兼任助理教授）
