作者：黃偉嘉
Tī tsit-tsūn bat字率kuân、網路普遍ê時代，文字比口語ê傳播koh-khah有效率。有一寡原底有台語講法ê地號名，就án-ne顛倒hōo「書面語」寫--出-來ê漢字kā am--起-來，甚至hōo人teh-beh bē記得正確ê台語按怎講——尤其是觀光區ê地號名上kài明顯。
譬如，台東市北爿ê郊區，台11線152公里ê所在，有一个號做『水往上流』ê風景區。Tse是因為旅客所徛ê打馬膠路hām附近ê景色，lóng比圳溝仔koh-khah崎，tsiah產生圳溝仔ê水是ǹg天頂流--去ê錯覺。『水往上流』tsit个觀光區tī大路墘，koh m̄免收門票，自開放「中國大陸」ê觀光客以後，經過旅行社ê推廣，尾--à也tsiânn做一个出名ê國際景點。
阮研究室執行教育部計畫ê時tsūn，因為觀光局ê「台灣好行」公車tī tsia有設站，就tn̄g著『水往上流』beh按怎標注本土語言語音ê問題。Tsit-má ê人lóng慣勢先tuì網路落手，阮研究室mā是án-ne想。阮隨tī YouTube揣著2013年8月19公視中晝新聞有一篇〈台東 “水往上流” 原民農特產賣得好〉ê報導1，主播是讀做「水ǹg頂kuân流」。
阮將tsit个「水ǹg頂kuân流」ê講法tī委員會提出來討論，一寡委員認為應該是主播臨場反應tsiah講--ê，凡勢m̄是在地ê講法。建議阮ē用得khah保守--leh，參考文讀音標注做「Tsuí-óng-siōng-liû」khah無爭議。
總--是委員會無多數ê共識，加上附近也有tsiânn濟需要確定發音ê地號名，tse就需要訪問在地人。Beh揣啥人khah好？一下調查，『水往上流』屬tī交通部觀光局「東部海岸國家風景區」leh管理，阮就摃電話去附近ê「小野柳遊客中心」請教。說明狀況以後，承辦ê大姊tsiânn熱心kā阮說明台東在地ê台語講法。落尾問著『水往上流』，伊想--一-下，講：「我聽in講，應該是 “水倒流（Tsuí Tò-lâu）2”。」
Koh經過研究室ê整理，tsiah發現1990年代ê旅遊冊hām BBS（電子布告欄系統），確實是有人寫做「水倒流」，ē用得講是一个符合台語語感ê講法。顛倒是2000年以後進入網路時代，後--來tsiah創ê『水往上流』全面取代原底ê講法。Tsit-má去現場，看--著--ê lóng是『水往上流』ê牌仔。
趣味--ê是，阮將tsit个發現kap客語ê委員會分享，客語ê委員mā講：『對！客家話也可以這樣說，我們有好幾個地名叫做「水流東」，也是一樣的！』。就án-ne，決定客語mā照台語翻譯，讀做「suiˋ do liuˇ」（教育部採用苗栗四縣腔）。
1.網址：https://www.youtube.com/watch?v=eW384RfkcII
2.「水倒流」ê「水」讀本調。
（作者是「地圖與多媒體研究室」研究員）
編按：漢羅用字有調整，原文是全漢。全漢版ē囥tī雜誌網站，hōo讀者做參考、對照。
專欄簡介：有人講「台語無字」。事實上台語一直lóng有字，自以早就用漢字來寫lán ê地號名。但是因為借字、借音、走音、腔口差、連音等等各種ê變化，一寡地號名suah hām漢字鬥bē起--來。若到一个生份ê所在，tiānn-tiānn是一開喙讀地號名，就hông隨知影是外地人。台大地理系「地圖與多媒體研究室」一直以來，投入地圖製作、地理教育、地名研究。Tuì 2019年開始，執行教育部「以本土語言標注臺灣地名計畫」，成果已經用tī改善台鐵、捷運ê放送。Tuì tsit月日開始，「地圖與多媒體研究室」逐個月ē tuì台語ê角度，tī雜誌介紹一个地號名，後擺若是坐車、駛車經過，拄好tn̄g--著，一定ē koh-khah疼惜lán tsit塊土地ê大細項代誌！
以本土語言標注臺灣地名計畫 https://reurl.cc/XjozaR
---------------------
全漢版
佇這陣捌字率懸、網路普遍的時代，文字比口語的傳播閣較有效率。有一寡原底有臺語講法的地號名，就按呢顛倒予「書面語」寫出來漢字的共掩起來，甚至予人咧欲袂記得正確的臺語按怎講——尤其是觀光區的地號名上蓋明顯。
譬如，台東市北爿的郊區，台11線152公里的所在，有一个號做『水往上流』的風景區。這是因為旅客所徛的打馬膠路和附近的景色，攏比圳溝仔閣較崎，才產生圳溝仔的水是向天頂流去的錯覺。『水往上流』這个觀光區佇大路墘，閣毋免收門票，自開放「中國大陸」的觀光客以後，經過旅行社的推廣，尾仔也成做一个出名的國際景點。
阮研究室執行教育部計畫的時陣，因為觀光局的「台灣好行」公車佇遮有設站，就搪著『水往上流』欲按怎標注本土語言語音的問題。這馬的人攏慣勢先對網路落手，阮研究室嘛是按呢想。阮隨佇YouTube揣著2013年8月19日公視中晝新聞有一篇〈台東
“水往上流” 原民農特產賣得好〉的報導，主播是讀做「水向頂懸流（Tsuí ǹg tíng-kuân lâu）」。
阮將這个「水向頂懸流」的講法佇委員會提出來討論，一寡委員認為應該是主播臨場反應才講的，凡勢毋是在地的講法。建議阮會用得較保守咧，參考文讀音標注做「Tsuí-óng-siōng-liû」較無爭議。
總是委員會無多數的共識，加上附近也有誠濟需要確定發音的地號名，這就需要訪問在地人。欲揣誰較好？一下調查，『水往上流』屬佇交通部觀光局「東部海岸國家風景區」咧管理，阮就摃電話去附近的「小野柳遊客中心」請教。說明狀況以後，承辦的大姊誠熱心共阮說明臺東在地的臺語講法。落尾問著『水往上流』，伊想一下，講：「我聽in講，應該是
“水倒流（Tsuí Tò-lâu）”。」
閣經過研究室的整理，才發現1990年代的旅遊冊和BBS（電子布告欄系統），確實是有人寫做「水倒流」，會用得講是一个符合臺語語感的講法。顛倒是2000年以後進入網路時代，後來才創的『水往上流』全面取代原底的講法。這馬去現場，看著的攏是『水往上流』的牌仔。
趣味的是，阮將這个發現佮客語的委員會分享，客語的委員嘛講：『對！客家話也可以這樣說，我們有好幾個地名叫做「水流東」，也是一樣的！』。就按呢，決定客語嘛照臺語翻譯，讀做「suiˋ
do liuˇ」（教育部採用苗栗四縣腔）。
---------------------
