作者：林子捷
「番薯m̄驚落塗爛，只求枝葉代代湠」，台灣ê文化對我來講，是tsiânn重要，而且是真有特殊性--ê。因為參阮厝--裡ê序大人講話lóng是用台語，學校suah lóng教華語，雙種語言ê環境hōo 我自細漢就感覺奇怪，是按怎逐工ê日記bē-sái寫「暗頓真好食」kan-na ē-tàng寫『晚餐真好吃』？老師hōo我ê解sueh是：台語m̄是正式ê語言。一直到大漢--ah，我讀中文系，mā iáu是有聽人leh講，台灣文化屬tī中國文化下跤，無去考慮著台灣文化ê主體性。
Koh講一件歷史事實，台灣經歷過日本時代，hit時tsūn保留tsiânn濟台灣意識、台灣文化ê作品，lán若去掀中國文學史，絕對看bē著tsia-ê作品，若去掀日本文學史，iáu是無。中國無愛收，日本mā無愛收，代表tsia-ê作品並m̄是in認定tī in國內ê文學——tse是台灣家己ê文學，以台灣為主體ê文學。社會上，在我觀察，逐家對台灣文學ê認知是tsiânn欠缺，不止仔可惜。
Tsit冬外，我開始學習台文、台語，hōo我了解著家己身為台灣人koh ài繼續精進ê部份。連橫bat講--過：『汝為台灣人，不可不知台灣事』。果然ài學，tsiah知影家己原本ê眼界有偌狹；開始學，tsiah有將台灣文學史tsit塊大餅補hōo齊ê感覺。
拄開始，我無想到ē應用著tsiah-nī濟ê聲韻學kap訓詁學ê智識，想bē到，tsia-ê考察漢語ê工具，ē-sái用來調查台灣字ê本字、來源，可惜真濟人學ē-hiáu tsia-ê技術，suah m̄知有thang為台灣本土文化貢獻tsit个功能。老師mā tiānn-tiānn提醒--lán，文字是為語言服務--ê，所以m̄-thang執死訣，認為文字kan-na有漢字一種，羅馬字mā無應該hông歧視。文字kap文字之間應該ài平坐徛，koh論歷史，羅馬字ê歷史比現在ê華語漢字koh-khah久，無啥mih正當無正當ê論辯。
學習過程中，透過台灣話ê使用，tsiah ē知影台灣hit時tsūn真真正正社會ê心聲。比論講二二八事件，hit時期ê受難者lóng是講台語ê台灣人，雖然有tsiânn濟華語作品mā寫kah tsiânn哀傷，m̄-koh論真ē-tàng反映時代ê心聲，khah濟是台語、用台文寫--出-來ê二二八作品，he是真真正正ui心肝ê文學作品。用台語思考、用台語表達，tsiah ē-tàng表現出時代ê思想、立場。
前一站仔，Marvel（『漫威』）電影有一个反派角色「Thanos（『薩諾斯』）」，伊利用非自然ê手路消滅一半ê人類，所以hia-ê超級英雄beh拯救世界，hōo世界恢復原狀。就復振母語來講，就親像beh hōo台灣語言生態恢復原樣。若準講台語是自然消失、自然淘汰，無人beh講，可能就是社會ê選擇，m̄-koh歷史上政府用非自然、無正當ê政策，強迫台灣ê社會kā tsit粒語言ê「飽仁」挽--起-來，hōo台灣語言ê生湠，出現tsiânn大ê危機。歷史已經過--去--ah，lán愛看向頭前，kā台灣ê母語揣倒tńg--來。
Lán m̄是聖人，無法度解救全世界，m̄-koh lán ē-sái透過講母語、寫母語來救台灣文化。做正確ê代誌m̄免驚別人講閒仔話，tī愛母語tsit條路上，ē聽著真濟歹聽話，m̄-koh lán m̄免失志，只要有心拍鐵，鐵成針，一定ē等到逐家lóng ē講母語ê hit工。
以早有張我軍〈為臺灣的文學界一哭〉，提倡伊ê文學主張，得著眾人ê注意kap支持。Tsit-má我mā為台灣文壇大聲háu--出-來，因為ài án-ne tsiah ē有人注意、án-ne tsiah ē有人發現，社會ê病根，ài眾人做伙拍拚。Lán ê目屎，m̄是目屎，是發願護持台灣文化ê沃田水，ǹg望看著台灣文化花園大開ê日子。
