（本文是2019年11月初6 ê 台語sa攏有講座摘要記錄，主講者曹欽榮長期投入台灣歷史遺址、紀念館設計實務、田野記錄ê事工）
「博物館」tuì字面來看，是一種kā五花十色ê mi̍h件，lóng總收藏ê所在，m̄-koh事實上，每一間博物館kan-na收藏特定主題ê藏品。所以博物館m̄是啥mi̍h lóng有，顛倒是經過「選擇」所展示--出ê「博物」。
既然博物館展覽、收藏--ê是特別主題iah是文化ê空間，其實就是leh呈現lán某一種集體記憶，將lán歷史發展上值得流傳--落-去ê代誌收集--起-來，甚至展覽。博物館kap集體記憶ê關係是密tsiuh-tsiuh，tsit擺台語sa攏有隨邀請曹欽榮老師來分享博物館kap集體記憶ê關係，mā透過老師ê經驗思考台灣ê集體記憶ài按怎重建。
Tuì日本時代開始，台灣做一个殖民地，總督府tī tsia進行人類學式ê調查、收集，koh不時舉辦執政博覽會，來宣傳家己ê國力，台灣tī hōo人殖民ê過程，mā經歷現代化，博物館tī台灣社會開始tsiânn做傳播國家認同ê方式。曹老師強調現代化kap集體記憶、文化有真大ê關係，lán ài先了解台灣ê歷史發展tsiah有法度討論suà--落-來ê問題。若án-ne，tsit-má吵kah pìn-pìn-piàng-piàng ê「轉型正義」又koh是按怎來--ê？一般lán ē認為轉型正義就是為著實現正義來重新定義過去，hōo歷史轉型、恢復伊應當ài有ê評價。M̄-koh，曹老師提出無仝ê看法，伊認為轉型正義是「轉型期間ê正義」，親像一條河時常tī hia，河內底ê水來來去去，看--起-來lóng仝款，m̄-koh bē是仝款ê河水。歷史mā是不斷leh變動，過去ē存在是因為「tsit-má」ê lán選擇按怎beh保存，伊是動態--ê，mā是現在--ê，所以轉型正義就是現在ê人利用過去來處理現代問題。
曹老師參與真濟台灣轉型正義ê運動，親像訪談白色恐怖受難者、出版調查專冊，伊mā bat擔任bē少人權博物館ê設計師，透過訪談受難者kap家屬，伊親身體會hông掩khàm ê hit段歷史記憶，開始讀白色恐怖、轉型正義相關ê冊，《文化記憶研究手冊》用跨學科、國際ê角度來探討文化記憶，說明文化記憶就是為著共同未來，想beh tuì過去揣著出路，好面對現在ê問題，tsiah ē需要無仝學科ê智識來了解多面相ê歷史，並且kap國際關係做伙討論，做一个跨學科、跨國家ê整體思考。利用科技、身體koh有生態等重新建立文化kap集體記憶。
除了老師推薦ê研究冊，文化需要tuì記憶開始保存，老師講起in出版ê訪談錄，tuì歷史中創作ê作品，就是走揣家己集體記憶ê成果，透過訪談記錄，書寫ê過程ē進入記憶ê場域，hōo過去ê故事kánn-ná「拼圖」一塊一塊鬥--起-來，然後出版、推廣，tsiah有法度推sak hōo koh-khah濟人知影，曹老師ê《流麻溝15號：綠島女生分隊與其他》、《228之後，祖國在哪裡：白色恐怖倖存者 六龜客家人吳聲潤的故事》、《自由遺產：台灣228、白恐紀念地故事》就是上好ê實踐。
M̄-nā出版，博物館koh-khah是推廣ê好所在，尤其台灣ê博物館tsiânn濟，人權議題應當ài運用人ē-tàng tī「空間」內底親身體驗ê優勢，kā展覽徙到過去白色恐怖ê地點，配合導覽kap當地ê產業，hōo博物館tsiânn做tshuā領ê角色。
曹老師上尾khai真濟時間kā lán介紹白色恐怖綠島紀念園區，創立、辦理活動koh有推廣人權觀念ê過程有juā-nī辛苦，兩點鐘ê演講根本無法度體會，m̄-koh tsit場演講beh強調--ê其實是集體記憶ê重要性。人類ê記憶kan-na tī集體記憶中存在，一个社會ài有家己ê認同，就ài有仝款ê記憶，he就是集體記憶，一旦有集體記憶，tsiah ē有家己ê文化kap文化認同。以現在ê心理狀態來重建lán ê過去，國家ê意識、主體性就顯現，相關ê產業mā自然存在。
「烏暗觀光」是曹老師為人權議題ê推廣所設ê期望，雖然是烏暗ê過去，m̄-koh為著共同體ê未來，lán ài重新理解過去，講hōo開、拆hōo明，親像「烏暗觀光」四字，頭前是烏，面對了後，後壁ē是光。
#台語sa攏有講座專欄，本文使用教育部推薦漢字kap臺灣閩南語羅馬字拼音方案。
台文通訊BONG報309期，2019年12月出刊。
--------------------------------------------
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
