水獺(tsuí-thuah)

作者:易俊宏

圖片出處:台北市立動物園


若到寒天,九降風吹--起-來,海邊ê生活ē khah艱苦。Lán台灣ê安平、金門所在,特別有一款鎮風辟邪ê信仰,就是「石獅公」,mā有人講是「風獅爺」。金門縣除了是tsit種信仰上濟ê所在,mā有一款特殊ê食肉目飼奶動物,就是「水獺」(tsuí-thuah)。

今年,食肉目ê動物已經介紹bē少,親像:黃葉猫、羌仔虎。大部份lóng是蹛tī台灣;仝款是食肉類ê動物,水獺只有tī-teh金門tsiah ē-tàng看--著。全世界ê水獺有13種,金門--ê是「歐亞種」,但是因為長久ê分開生湠,就變成「亞種」--ah。對全世界ê歐亞水獺來講,雖然無緊急ê絕種威脅,但是mā是teh sih黃燈--ah;tī-teh聯合國ê【國際自然保護聯盟瀕危物種紅色名錄】內底,伊是「淡薄危險」tsit級ê動物,kap舊年介紹--過ê「烏雉雞」、「蘭嶼貓頭鳥」仝款。但是若講著台灣金門ê水獺,就完全無仝款--ah:2017年ê【台灣紅皮書】(就是beh絕種ê動物名單)內底,就有伊ê名。有研究統計:金門ê水獺,tsit-má iáu無200隻。

Khah久以前,台灣其實mā有水獺。但是因為以前ê人認為,食水獺ē-tàng治病,結果病無好,水獺suah食了--ah。Tann,kan-na金門有水獺,tse就是lán進前做無好ê所在,tsit-má若是教育進步、資訊khah普遍,科技mā khah進步--ah,lán就ài好好仔來對待lán ê土地、lán ê環境。按怎看kám有好好仔對待?水獺tsit種動物就是一種標準:伊受--著ê威脅,親像無所在好蹛、hōo車挵--死……tsia--ê lóng是專欄以前有講--過ê開發問題kap「路殺」議題。對水獺來講,koh有一个tsiânn重要ê代誌,就是hōo貓仔、狗仔攻擊。無厝ê貓仔、狗仔,tī戶外環境,kap野生動物主要lóng是競爭ê關係;對貓仔、狗仔來講,in koh有人ē飼,in mā khah敢到人類生活ê所在揣mi̍h件食。但是對其他ê野生動物,親像水獺來講,野生動物就khah弱勢。水獺若是hōo貓仔、狗仔欺負,實際上是lóng可憐,但是對水獺來講,威脅是愈大,因為絕種就是完全無--去--ah,任何生湠ê可能是lóng無。

水獺主要是蹛tī溪流、海邊,伊上gâu--ê是掠魚仔。聽講以前有人ē訓練in 替人類掠魚,m̄-koh tse技術tsit-má已經失傳--去--ah。因為in ê跤短,所以主要lóng是泅水來移動;但是因為lán人類建設水壩、水庫、水閘門,hōo in必須ài來陸地行,對 in 來講khah無方便,所以若是受著其他動物ê攻擊,in mā走無路,就koh-khah m̄免講看青紅燈來走閃車輛--ah。In拄--著ê艱苦情形,lóng是lán人類ài來tàu-sann-kāng ê所在,mā是lán人類來表現愛台灣、愛lán ê島嶼土地ê所在。



#台灣動物記事 專欄,本文使用教育部推薦漢字kap臺灣閩南語羅馬字拼音方案。
台文通訊BONG報309期,2019年12月出刊。


歡迎捐款贊助 #李江却台語文教基金會 (捐款thang抵稅,匯款了後請通知02-23112199)
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox

郵政劃撥:19021486
戶名:財團法人李江却台語文教基金會
電匯:123-20-050514-2
華南銀行士林分行活儲
戶名:財團法人李江却台語文教基金會

李江却台語文教基金會需要你ê定期捐款,逐個月捐助NT$200以上,lán做伙來推動復振台灣語文ê事工,歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會(台文通訊BONG報發行單位)NT$200(iah是逐冬NT$2,400)以上,做伙支持基金會事工kap雜誌編印發行費用。歡迎利用郵局劃撥、信用卡(寫捐款單)、線頂捐款、現金贊助、銀行/ATM轉帳(轉帳了後請通知)、支票、郵局戶頭自動轉帳扣繳(寫授權書),捐款收據ē-tàng做『列舉扣除額』抵稅ê用途。