作者：陳淑娟
張裕宏老師是我博士論文ê指導委員。我運氣真好，tī台大讀冊ê時，有機會去語言所kah外文系修張老師ê課，後- -來揣老師做我博士論文ê指導委員。老師將台語研究當做一生ê志業，tī台大語言所退休了後逐工認真編字典。老師真心愛台灣，想beh為台語編ē-tàng流傳千秋萬世ê字典。Chit種精神hō͘我真感動，mā hō͘我真濟力量。
雖然老師chit幾年身體無好，m̄-koh只要有精神，老師就認真編字典。2019年老師寫email hō͘--我，上尾一句是寫：「字典照常拚」。老師ê字典編了真好，連tī外國教台語ê老師mā ài用。2018年我因為休假去日本訪問，去幾間日本ê大學看in按怎教台語，結果tī目白大學台灣語ê課，看著Tada Kei（多田惠）先生kah學生每一个人lóng提老師編ê《TJ台語白話小詞典》。看著in用老師ê字典chiok歡喜，證明好字典免宣傳、全世界逐家lóng愛用。
老師因為有一生ê志業kah信仰，所以身體健康出問題mā lóng樂觀面對，bē怨天怨地。老師原本因為治療鼻咽癌ê關係，有一耳聽無，2019年突然間連另外一耳mā聽無。老師驚人m̄知影伊聽無，家己寫一个『耳聾』ê牌仔掛--leh，提醒別人伊聽無。m̄-koh伊無因為án-ne就意志消沉，iáu是認真編字典，chit種精神hō͘我chiok敬佩。
老師對台語ê文字有伊ê理念，mā對伊ê理念真堅持。老師感覺白話字真好用，是上方便書寫、mā是推展台語上好ê文字系統，所以老師支持白話字。伊用白話字寫《阿鳳姨ê五度ê空間》hō͘囡仔讀，規本冊lóng用白話字寫。前幾年，我去台大教台語，老師特別kā我講，ài教學生白話字。我後--來mā tī清大教台語，老師mā是koh交代我ài教白話字。
對我來講，張老師是經師mā是人師，伊將一生lóng獻hō͘台語ê研究kah推展，老師完全無追求名kah利，恬恬做伊認為重要ê代誌。老師將一生lóng總獻hō͘台語，伊ê離開hō͘阮chiok m̄甘--ê，chit个世間上koh失去一个真關心--我ê長輩，我想懷念老師上好ê方式就是認真復振台語，hō͘台語tī台灣ê土地繼續流傳--落-去。
（本文作者是清華大學華文文學研究所教授、台灣語文學會前會長）
