白醫師自細漢就看著做漢醫ê老爸，逐工lóng tsiok親切對患者leh問診，減輕患者ê痠疼、婦jîn人跤手冰冷、囡仔脾土無開、風邪khuh-khuh嗽、tio̍h痧等等，50幾冬前hit站時機kia̍t，見若艱苦人，辛苦病疼來看診，提藥仔lóng無收錢。 阿爸tiānn-tiānn講：攑頭三尺有神明，人leh做，天leh看，lán有khuì力thang幫贊--人，khah贏受人幫贊，上天hōo lán規家伙仔順序平安就是上大ê恩賜。
序大人真罕得出門，有閒ê時lóng leh看漢醫冊，親像是《傷寒論》、《神農本草經》，厝--裡八个囡仔mā同齊坐tī食飯桌仔leh讀冊。Tī tsit種厝--裡成長ê白醫師，就án-ne對中醫tsiânn有興趣，養成愛看冊ê習慣，讀小學就意向，後擺beh跟tuè阿爸，學做漢醫，m̄-nā醫術ài ē，醫德mā一定beh親像阿爸，名聲受厝邊ê肯定參呵咾。
1985年白醫師提著漢醫牌，就tī基隆徛館看診，逐工針灸--ê 70外名，治療筋骨kuāinn筋、閃--著、跤手骨uáinn--著，練出tsa̍t腹ê工夫。2001年koh踮七堵百福社區開館，hia是小庄頭，民眾koh-khah需要醫生來照顧。
白醫師講，傳統中醫對病症分科，無親像西醫分hiah幼，中醫診療模式是「辨證論治」為本、以「整體觀」來出發，tsit幾年大病院成立中醫部，中醫分科漸漸khah tsiūnn樣，sóo-pái 30幾冬來，mā利用歇睏，一直參加各種專科醫生課程，內科、婦科、兒科、傷科、耳科、針灸科……，tuè著時代ê跤步，若提著執照，tsiah ē-tàng對個別ê病人來醫護。
白醫師逐科lóng真老到（láu-tàu），問診輕聲細sueh，將每一位患者，lóng看做親人sio-siāng，少年囡仔tiānn-tiānn sńg手機仔sńg到翻點，精神bái；食頭路人khang-khuè濟、壓力大，規工拍電腦，sù常ē腰脊骨痠軟；查某人花bē tiâu枝；老大人老thuē……。一般診所一kái kan-na ē-sái揀一部位leh tsha̍k針灸，白醫師to lóng無窮分，頭殼、肩胛頭、腰脊骨、跤頭趺所有症頭同齊做一kái來tsha̍k針灸，而且對每一位患者，lóng仝款照顧。白醫生m̄-nā醫術高明mā兼心理醫生，「Tsit kái進步真濟！Ài ke減運動khah ē緊好、涼--ê、甜--ê lóng ài khiūnn喙……」。
熟sāi白醫師是guán tsiok大ê福氣，阿母、阿姨lóng是80幾歲ê老人，身體難免有koh-iūnn，guán tiānn-tiānn拜六陪老大人去白醫師hia；有一kái guán親目睭看著一位hông扛--入-來ê患者，醫生手ná針灸喙ná鼓勵，一個月後病人就有法度家己行來看診；『帕金森氏病』ê人，跤手khū-khū-tsùn、行路細步，一下針灸煞，即時有才調khuann-khuann仔一步一步行--起-來，患者kap家屬歡喜kah哭出聲；koh有一位逐工來針灸ê婦jîn人講：「我半年前中風蹛大病院加護病房40工，醫生叫我ài開刀，我驚有風險，m̄認命，tsiok掛慮變成khuê跤半遂suah行路ài枴仔，後--來朋友紹介白醫師，我即時辦出院來到tsia，lán逐家來看māi，講話無漏風，行路順序，現此時我是m̄是真正常啊！？」
開業到tann，白醫師變成tsiok濟患者ê家庭醫師，sù常是規家伙仔同齊來掛號，病人暗時9點來掛號，仝款歹勢拒絕，門診tiānn-tiānn看到暗時翻點，逐家lóng講伊是妙手回春，是救苦救難ê大仁醫。
台灣人寫真專欄，本文使用教育部推薦漢字kap臺灣閩南語羅馬字拼音方案。
台文通訊BONG報303期，2019年6月出刊。
--------------------------------------------
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
有固定的長期捐款， 讓更多的台語文相關計畫可以穩定的推行，感謝逐家。
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
