 |
| 作者：陳惇聿 。資料來源:陳惇聿 (發布於 臺灣生命大百科)。http://taieol.tw/data_objects/40169 |
M̄知逐家kám ē記得tsit个專欄幾若個月lóng teh講「猫」（bâ）？六--月介紹過「棕蓑猫」、八--月介紹過「黃葉猫」，有講過兩件代誌：頭一个，就是tse lóng是khah細隻ê肉食動物，khah m̄是像貓仔án-ne眾人khah熟sāi ê動物；第二个，就是號名ê時tsūn，lán台灣ê前輩對生物ê特徵，lóng是有夠用就好，所以俗稱lóng有掠無準ê狀況。頭一个代誌ê解說，進前ê專欄有khah詳細ê說明，tsit個月講著tse「羌仔虎」，就是beh來介紹第二个代誌：
頂個月講著tse「黃葉猫」，是介紹講伊是『台灣麝香貓』，但是mā有人講tse是『黃喉貂』。Ē-tàng理解--ê是講lóng是khah細隻ê肉食動物，mā是黃毛--ê，摻lām做伙是有可能ē發生--ê。Tsit種例，頂冬十二--月ê專欄講著「bā-hio̍h（鴟鴞）」、「暗光鳥」mā有講--著，就是名號是一種概念，無一定是針對特別ê動物。Tse mā是tsit个專欄存在ê目的之一，就是ē-tàng koh-khah了解tsia-ê動物，mā ē-tàng有機會知影無仝領域ê智識。
雖然講著「黃葉猫」，無一定是『黃喉貂』，但是若是講著「羌仔虎」，就一定是伊無m̄-tio̍h。台灣法律將動物分三等，beh滅絕、ài特別積極保護--ê是第一級，tsiânn珍貴、非常罕見--ê是第二級，koh有應該ài注意kap保護--ê第三等。全世界來講，『黃喉貂』是無絕種危險，但是台灣ê特有亞種「羌仔虎」，tī lán台灣ê「野生動物保育法」中，是第二級保育類動物，屬tī lán台灣需要khah努力保護ê動物。
In主要是tī樹林內底生活，雖然人為ê開發破壞，in mā受著影響，但是in mā ē tī「二代林」內底蹛kah tsiânn好勢。啥mi̍h是「二代林」--leh？就是原始樹林受著破壞了後，koh長成ê樹林，mā有可能是人工復育ê樹林；華語是講『次生林』。
「羌仔虎」是群體生活，一群有時兩三隻，有時七八隻，in ē做伙拍獵。時常是tī有日頭ê時tsūn，做伙行動，暗時若是月娘tsiânn光，mā有機會看著in ê影跡。「羌仔虎」其實是食臊食菜to ē-sái--得，食肉--ê親像膨鼠、niáu鼠、鳥仔、杜定、蛇tsit款細隻動物，lóng ē-tàng是in ê食物；但是in mā ē食水果，台灣就有看著in食菝仔ê記錄。Ē叫in 「羌仔虎」，就是以前有人看著in 做伙拍獵，teh食羌仔腹內內臟，所以就án-ne稱呼--in。
Tsit-tang-tsūn，因為lán人類開發破壞著環境，in ē-tàng食ê mi̍h件mā愈來愈少。所以mā有人看著in 來tshiau糞埽桶揣食物。雖然tse是in保命ê方式，但是知影了後、心內mā是tsiânn m̄甘。Lán人類ê開發，ē kā其他ê生物帶來衝擊，tse是lán人類ài注意ê所在。人類只是大自然內底ê一種生物，雖然lán有khah大ê能力來影響環境，lán就ài有相對ê責任感，ài koh-khah注意家己ê影響力，若造成無好ê影響，最後是家己受害。
（作者是台灣綠黨中央執行委員）
#台灣動物記事 專欄，本文使用教育部推薦漢字kap臺灣閩南語羅馬字拼音方案。
台文通訊BONG報306期，2019年9月出刊。
歡迎捐款贊助 #李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
有固定的長期捐款， 讓更多的台語文相關計畫可以穩定的推行，感謝逐家。
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
