台灣歷史sueh不盡，m̄-koh lán lóng bat無夠。做一个台北人，來聽台北城ê建築kap歷史，永遠是有真大ê趣味。
Beh講北部ê發展，首先ài uì荷蘭、西班牙kap鄭成功ê時期來了解。Hit-tsūn是全世界ê航海時期，地理ê大發現。Mā自hit-tsūn開始，有台灣北部ê第一張地圖，thang hōo lán了解過去ê地名、無仝族群所蹛ê範圍。現在ê基隆市長，揣專家beh做考古，m̄-koh想beh揣著過去ê城堡、砲台，目前已經是tsiânn有困難，kan-ta ē-sái知影差不多ê所在。
Koh來是《裨海紀遊》，福州人郁永河為著揣火藥ê原料來台灣，uì台南上岸，分兩批上北揣磺礦，沿路有真濟記載台灣ê風土人情。Mā因為伊ê記錄，lán ē-tàng知影hit當時台灣北部自桃園以北，有南崁社、八里坌社、淡水社、甘答門（關渡，一个水關ê地理，有兩塊大石頭）、麻少翁社等等，koh記錄著古早ê淡水河hām台北因為康熙時代大地動，規个土地lóng sìm--落，海水倒淹--過，過甘答門入--來，kā台北地區淹做大湖（到日本時代ê地圖，就發現台北ê大湖無--去--ah，出現真濟新ê土地）。
原本，台北地區漢人是無法度入--來--ê，因為傳染病嚴重，若入--來，無偌久就ē破病過身。M̄-koh經過康熙時代ê大湖，大批ê漢人ē-sái坐船入--來，tsiah沓沓仔改觀。雖然頭先m̄是hiah-nī順利，m̄-koh漢人ê人口也慢慢增加。
早期漢人坐船，是uì甘答門入--來就放帆，順海流，到第一關武朥灣，koh uì水返腳（「水轉跤」（Tsuí-tńg-kha），tsit-má ê汐止）流--出-去。武朥灣落尾就變成第一个漢人開始tī北部開墾ê所在，就是今仔日ê新莊（漢人ê一个新ê庄頭）。
Beh看新莊ê發展，lán就uì廟開始，看伊是啥mih時起--ê，thang知影伊kap tsit條街有啥mih關係，tsit條街是tang時開始做生理、有人tī hia生活。
譬如米市街，1686年新莊起第一間廟「慈佑宮」。到1757年，第三間叫做「大眾廟」，代表iáu-koh有死tsiok濟人。雖然漢人ê醫藥比原住民khah好，mā是iáu未完全適應當地ê傳染病，m̄-koh到尾--à m̄-nā傳染病ê問題，koh有族群間ê衝突。
看廟是啥mih族群起--ê、起廟ê原因，mā koh ē-sái看著tsiok濟歷史ê發展。譬如1760年來自福建汀州ê客人胡焯猷起「武聖廟」，koh起「明志書院」，除了代表客人重視教育，也是伊知影當時有一寡社會衝突，ài用教育、智識來化解。Tī族群械鬥了後，一寡地方官員感覺mā是ài講究教育，就有曹汝霖起ê「文昌祠」，透過伊ê一个細ê學堂，希望hōo逐家tī tsia上課讀一寡文學，khah mài去tshia拚。
「台北城市發展初探」是台灣蠻野心足生態協會ê蠻野講堂「台語棲地復育系列座談」2019年ê最後一場，華梵大學建築系助理教授葉乃齊先生用台北城形成ê角度，紹介台灣ê城市歷史，來對整個台灣做一个大概ê了解。Tsit爿kan-ta記錄部份內容，歡迎逐家上協會FB收看完整、精彩ê演講。
編按：本文是12/20棲地復育台語講座－「台北城市發展初探」講座摘要記錄，講者葉乃齊是華梵大學建築系 ê助理教授。台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃十場有關生態環境議題ê台語講座，歡迎逐家tī逐個月第三禮拜五暗時七點到九點，同齊來「呷米共食廚房」（台北市中正區衡陽路9號3樓）擴展家己ê台語棲地（tshe-tē）！詳細資料ē-tàng看「台灣蠻野心足生態協會」FB專頁。
#棲地復育台語講座專欄，本文使用教育部推薦漢字kap臺灣閩南語羅馬字拼音方案。
台文通訊BONG報311期，2020年2月出刊。
--------------------------------------------
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
