作者：石牧民
（作者是台灣師範大學、靜宜大學台文系兼任助理教授 ）
頂期專欄講著日常口語kap文學語言ê精差。具體來講，也就是「喙講台灣話」kap「手寫台語文」中ng iáu有濟濟mê角。無影講口語變做文字記號就tsiânn做文學。事實上，20世紀半中開始，研究者愈來愈發覺口語kap文字雖bóng有對應，對應kah bā-bā ê款，卻是完全無仝ê系統。準做無講全然無交tshap，mā無親像lán掠準--ê完全有對同án-ne。若beh講kah tsiok簡單，tsiânn做文字ê文學語言kap日常口語中間，上無，mā隔一个「寫hōo suí-khuì」ê文學手段。
在lán台語現代文學史來講，源起頭就有一篇kài重要ê作品，ē-tàng提來思想tsit个問題。He就是lán賴和先ê台語作品，〈富戶人的歷史〉tsit篇短篇小說。
賴和tsit篇用台語寫ê作品真特殊。伊寫了無發表tī報紙iah是雜誌。既然完成tsua̋nn囥--leh。到1990年代，lán siàu念ê成大林瑞明教授leh整理賴和文稿ê時tsūn tsiah來發現，隨刊tī 1991年頭一期《台灣文學》雜誌。Iáu一項特殊，是賴和tsit篇小說量其約tī 1930年代來創作。Hit个時期，拄仔好是黃石輝hit篇〈怎樣不提倡鄉土文學？〉引起文藝界逐个人辯論台灣話文ê期間。Lán看著賴和先行動力有夠強。人lóng leh sio諍台語kám ē-tàng提來寫作文學是--m̄？我就來寫hōo lín看māi！可惜無發表。致到逐个人m̄知影，tī台灣人拄仔leh質問「Lán thài ē無用台語來寫文學？」Tng當時，台語文就kiōng-beh tsiânn--ah。賴和先tsit篇〈富戶人的歷史〉kap今仔日《台文通訊BONG報》透lām羅馬字、漢字ê文章來比phīng，kan-na兩項無仝：賴和先無用羅馬字，賴和先用漢字需要借字、借音（kap歌仔冊ê步數beh sio仝），伊iáu無lán標準化ê漢字。Án-ne niā-niā。Kám無tsiok厲害？
〈富戶人的歷史〉tsit篇台語小說，故事tsiânn單純。Leh講兩个扛轎--ê，扛一位好額少爺；路上liam-mi三人開講，liam-mi好額少爺恬恬聽扛轎--ê議論世情世事。全篇小說大面lóng是對話，若無，就是坐轎ê好額少爺家己ê心聲。小說內底，lán khah看bē著一般小說ē出現ê描寫。Ē-sái講，〈富戶人的歷史〉tsit篇小說「形式」mā不止仔心適。
一篇大面lóng是對話ê台語小說，lán ē-tàng用兩種角度來看：第一，是按怎用全全對話tsit款tsiah特殊ê形式來寫小說？第二，全全對話達成啥mih文學效果？
頭一个角度（問題），論真是客觀條件ê限制。也就是講，台語iáu m̄ bat hōo人提來寫做書面ê文字--lah。拍算有人ē講：hit-tsūn to有歌仔冊leh出版，he kám m̄是書面？若在「形式」來看，歌仔冊kap〈富戶人的歷史〉仝款，lóng leh表記「話」。而且，歌仔冊內底書面ê台語，iáu-koh有古典文字ê氣味：大面七字一句，tse m̄ to tsiok成古典詩？Tse就是要緊ê tsáng頭；賴和ê時代，書面文字大面是古典漢文。就是tsit个因端，hōo賴和先beh用現代文學（小說）來反動古典ê書面文字。總--是，he是用khah接近口語ê華文leh反動古典ê華文，而且有《三國演義》、《西遊記》hia-ê口語白話小說做參考。Hit-tsūn，台語ê文學語言iáu未出現，致到賴和先用「話」來寫台語小說。
第二个角度，to用「話」來寫--ah，寫了kám有suí-khuì？有őo。〈富戶人的歷史〉內底，濟濟扛轎「巷仔內」ê話。Kan-na huah一聲「大」，意思是正uat；「小」，就倒uat。「大無地」是正爿路有空，「小掛角」是注意倒爿樹枝iah是厝角。「帶溜」是路ē滑……。賴和先tsit篇小說，是活跳跳leh表現艱苦人、作穡人ê形象。而且，坐轎好額少爺聽--著ê話，lóng是對tng當時社會問題真精準ê批判。Ē-sái講，角色是扛轎--ê，實際上是賴和先leh講話。Mā m̄是凊彩講，是對伊四圍環境有思考，koh再kā設計做小說內底ê話。
賴和先〈富戶人的歷史〉雖bóng是一篇大面lóng「話」ê小說（文），總--是，拄好ǹg lán顯明，日常ê話kap文學ê語言中間，隔一个賴和先neh。
#文學káng「台」 專欄，本文使用教育部推薦漢字kap臺灣閩南語羅馬字拼音方案。
#台文通訊BONG報 329期，2021年8月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
