作者：石牧民 （作者是台灣師範大學、靜宜大學台文系兼任助理教授）
Tuì雜誌第325期、326期、332期講到tann，lán有leh tshiau揣一个tsáng頭，lán「現代文學」ê tsáng頭。Tann lán lóng掠賴和先（sian）做「台灣文學之父」。「台灣文學之父」tsit个尊稱，值得lán來探討，幫贊lán理解台灣文學、台語文學ê意義。
賴和先tsit个人，身份不止仔濟；lán lóng知ê身份，是醫生kap文學創作者。文學創作者賴和，tī 1924年去hōo日本人關--出-來了後（「政治犯」mā是賴和先濟濟身份其中一个），就有文學作品公開發表。伊上早期ê作品大面lóng古典漢詩。Tsit个時期，黃呈聰已經發表〈論普及白話文的新使命〉，koh來，張我軍發表〈糟糕的台灣文學界〉。Tsia-ê文章，lóng leh鼓舞創作者寫「新」ê文學；同齊時，mā主張hìnn-sak古典ê漢文。1926年，賴和先發表〈鬥鬧熱〉、〈一桿稱仔〉tsia-ê短篇小說。「台灣文學之父」是指tsit兩篇小說ê作者來講。
Án-ne lán就看ē出--來，「賴和」tsit个文學創作者，伊ê性命是khah長「台灣文學之父」。具體來講，賴和先代先是一个古典漢文詩人，落尾tsiah tsiânn做新文學作家，開創lán ê台灣文學。是講，賴和先tsit个人，m̄是看著黃呈聰、張我軍ê文章tsiah來覺醒neh；伊iáu leh寫古典漢詩ê時，就真覺醒--ah。1924年，〈吾人〉tsit首詩內底，賴和先寫出lán呵咾到tsit-má ê詩句：「世間未許權存在，勇士當為義鬥爭。」Tsit首詩內底，上落尾兩句koh-khah有人道精神；賴和先講：「靈苗尚自無均等，何敢依違頌太平？」Tsit兩句詩是顯然leh講世情無公義，世間人無平等。面對tsit款狀況，賴和先問家己：「Thài ē-tàng激外外，假好吟詩唱歌，掠準風調雨順、國泰民安--leh？」
賴和先tsit首〈吾人〉，形式是古典漢詩。總--是，lán「台灣文學之父」有影gâu人；伊leh用漢詩話tū漢詩，講tsit款文學形式無夠額--lah！Tuì án-ne，lán就掠有寫古典漢詩ê賴和，幾冬後寫出〈鬥鬧熱〉、〈一桿稱仔〉ê tsáng頭。「台灣文學之父」賴和寫「新文學」，是用具體ê文學作品tàu贊聲tng當時智識分子ê呼籲：lán台灣需要新ê文學形式，需要kā kap現實無交tshap，無社會意識ê中國古典文體放hiat-ka̍k。
對賴和先kap伊仝沿ê台灣智識分子來講，「新」文學m̄-nā是用khah倚近口語ê文字來寫，koh-khah是ē-tàng分拆hit-tsūn台灣人去hông殖民ê悲哀處境，ē-tàng看比讀冊人箍仔內khah遠，看著致到讀冊人掠外iáu-koh有艱苦人ê社會因素，tsit款ê文學作品。在賴和先，he號做「新文學」；在lán，he就是「現代文學」。若在現此時ê文學體制來講，大學「台灣文學」科系比「中國文學」科系koh-khah注重逐項社會、文化ê理論訓練，因端正正是「台灣有家己ê文學」tsit款認知是出tī反對殖民，反對社會無公義，反對平平台灣人suah無平等tsit款ê理念。Tsia-ê理念，代先產生賴和、楊逵、呂赫若……所創作ê作品；落尾，lán siàu念ê林瑞明教授kap呂興昌教授、陳萬益教授tsia-ê讀著in ê作品ê人，tī 1990年代呼籲講：台灣人tio̍h-ài有台灣文學ê文學科系！
台灣文學科系成立了後，「台灣文學」ê定義漸漸thuah--開。Tsit个文學tsáng頭，有伊受著中國漢文影響tsiok大ê古典時期；án-ne，賴和先所寫ê漢詩，自然mā台灣文學。Tsit个文學tsáng頭，論真有漢字箍仔以外ê傳統，羅馬字ê傳統；雖bóng在來無受著大多數人重視，總--是一直tī hia。
Tse是lán後期beh接suà講ê主題。
